29 Nov 2025, 17:47
ކޮލަންބޯ (29 ނޮވެންބަރު 2025): ޓްރޮޕިކަލް ތޫފާން ދިތުވާ އެރުމުގެ ސަބަބުން ސްރީލަންކާއަށް ކުރަމުންދާ ގަދަ ވިއްސާރައިގެ ސަބަބުން ކުއްލި ހާލަތު އިއުލާންކޮށް، ހާލުގައި ޖެހިފައިވާ ބައިލައްކައެއްހާ މީހުން ސަލާމަތް ކުރުމަށްޓަކައި 20 ހާހަށްވުރެ ގިނަ ސިފައިން ހަރަކާތްތެރިވަމުންދާ ކަމަށް ސްރީލަންކާ ސަރުކާރުން ބުނެފިއެވެ.
ސްރީލަންކާގެ މަސްއޫލުވެރިންނާ ހަވާލާދީ އެގައުމުގެ މީޑިއާ ބުނާގޮތުން ފެންބޮޑުވުމާ ގުޅިގެން 44 ހާހަށް ވުރެގިނަމީހުންވަނީ ހާލުގައިޖެހި އަވަސް އެހީއަށް ބޭނުންވެފައެވެ. އޭގެތެރޭގައި ފެނުގެ ސަބަބުން ގެތަކުގައި ތާށިވެފައިވާ އެތަށް ހާސް ބަޔަކުވެސް ހިމެނޭއިރު އެމީހުން ރައްކާތެރި ތަންތަނަށް ގެންދިޔުމުގެ ބުރަ މަސައްކަތް ކުރަނީ ސިފައިންނެވެ. މިކަމުގައި 20 ހާހަށްވުރެ ގިނަ ސިފައިން ހަރަކާތްތެރިވެއެވެ.
ތޫފާން ދިތުވާ އެރުމުގެ ސަބަބުން ސްރީލަންކާއަށް ބޯކޮށް ވާރޭ ވެހެމުންދާއިރު އަދިވެސް އިތުރު އެއް ދުވަހަށް ނޫނީ ދެ ދުވަހަށް ވިއްސާރަ ދިގުލައިގެން ހިނގައިދާނެކަމަށް އެގައުމުގެ މޫސުމާބެހޭ އިދާރާއިން ވަނީ ލަފާކޮށްފައެވެ.
މޫސުމާބެހޭ ސްރީލަންކާގެ އިދާރާ (މިޓިއޮރޮލިޖިކަލް ޑިޕާޓްމަންޓް) އިން ނެރުނު ބަޔާނެއް ބުނާގޮތުން ތޫފާންގެ ދިތުވާ ސްރީލަންކާގެ ބައްރު ހުރަސްކުރުމަށްފަހު މިހާރު އެގައުމުގެ އިރުމަތީ އައްސޭރިފަށް ދޫކޮށް އިންޑިއާގެ އިރުދެކުނަށާއި ބޭ އޮފް ބެންގޯލްއަށް ގޮސްފައިވީނަމަވެސް އެ ތޫފާންގެ އަސަރު އަދިވެސް ސްރީލަންކާއަށް ދަނީ ކުރަމުންނެވެ.
ސްރީލަންކާގައި ފެންބޮޑުވެފައި
އެހެންވެ ކުރިއަށް އޮތް 24 ގަޑީއިރު ވައި ބާރުވެ، ބޯކޮށް ވާރޭވެހި، ފެންބޮޑުވުމުގެ މައްސަލަތައް ކުރިމަތިވާނެ ކަމަށް ބެލެވެއެވެ. ތޫފާން ދިތުވާ ސްރީލަންކާއަށް އަރާފައިވަނީ އިއްޔެގައެވެ. އެތޫފާންގެ ސަބަބުން ސްރީލަންކާގެ އެކި ސަރަހައްދުތަކުގައި އާދަޔާ ޚިލާފަށް ފެންބޮޑުވެ މާއްދީގޮތުން ބޮޑެތި ގެއްލުންތަކެއް ލިބުނެވެ. ފެންބޮޑުވުމުގެ ސަބަބުން މަރުވި މީހުންގެ އަދަދުވެސް ވަނީ 69 އަށް އަރާފައެވެ. ގެއްލިފައިވާ މީހުންގެ އަދަދުވެސް 34 އަށް އަރައެވެ.
މީހުން މަރުވީވެސް އަދި މީހުން ގެއްލުނީވެސް ގިނައިރު ބޯކޮށް ވާރޭވެހުމުގެ ސަބަބުން ސައިލުހެދި ބިންގަނޑު ކަނޑައިގެން ދިޔުމުގެ ހާދިސާތަކުގައެވެ. މިއީ ފަހުގެ ތާރީޚެއްގައި ސްރީލަންކާއަށް އެރި އެންމެ ނުރައްކާތެރި ތޫފާންކަމަށް އެގައުންވަނީ ސިފަކޮށްފައެވެ.
ކާރިސާތަކާބެހޭ ސްރީލަންކާގެ އިދާރާ ބުނެފައިވާގޮތުން ފެންބޮޑުވުމާ ގުޅިގެން 44 ހާހަށް ވުރެގިނަމީހުންވަނީ ހާލުގައިޖެހި އަވަސް އެހީއަށް ބޭނުންވެފައެވެ. ބައެއް ސަރަހައްދުތަކުގައި ތިން ފޫޓު ބަޔަށް ވަނީ ފެންބޮޑުވެފައެވެ. މިކަމުގެ ސަބަބުން ސްރީލަންކާގެ އެކި ސަރަހައްދުތަކުގެ އެތަށް ހާސް ގެއަކަށްވަނީ ފެންވަދެ ބޮޑެތި ގެއްލުންތަކެއް ލިބިފައެވެ. ގިނަ ދަނޑުތައްވެސްވަނީ ފެނުގެ ސަބަބުން ހަލާކުވެފައެވެ.
ހާލުގައި ޖެހިފައިވާމީހުންނާއި ފެންވަނުމުގެ ސަބަބުން ގެދޮރުގައި ނޫޅެވޭވަރު ވެފައިވާ އާއިލާތައްވަނީ އެކި ސަރަހައްދުތަކުގައިވާ ސްކޫލްތަކާއި ސަރުކާރުގެ އެކި އިމާރާތްތަކަށް ވަގުތީގޮތުން ބަދަލު ކޮށްފައެވެ.
ސްކޫލްތަކާއި ސަރުކާރުގެ އޮފީސްތަކާ އަދި ގިނަ ވިޔަފާރިތައްވެސް ވަނީ ބަންދުކޮށްފައެވެ. ސްރީލަންކާ ސަރުކާރު ބުނާގޮތުން ތޫފާން ދިތުވާގެ ސަބަބުން ހާލުގައި ޖެހިފައިވާ އެތަށް ހާސްބަޔަކު ރައްކާތެރި ތަންތަނަށް ގެންދިޔުމަށްޓަކައި 20 ހާހަށްވުރެ ގިނަ ސިފައިން ދަނީ ހަރަކާތްތެރިވަމުންނެވެ. ހާލުގައި ޖެހިފައިވާމީހުންނަށް ކާބޯތަކެއްޗާއި ބޭހާއި އަންނައުނާއި ސާފުތާހިރުވުމަށް ބޭނުންވާ ސާމާނު ފޯރުކޮށްދިނުމަށް އެގައުމުގެ ޖަމްއިއްޔާ ޖަމާއަތްތަކާ އަދި ބައިނަލްއަގްވާމީ ޖަމްއިއްޔާ ޖަމާއަތްތަކުންވެސް ދަނީ ހަރަކާތްތެރިވަމުންނެވެ.
މިގެއްލުންތަކުން އަރައިގަތުމަށްޓަކައި ސްރީލަންކާގެ ސަރުކާރުންވަނީ ބައިނަލްއަގްވާމީ އެހީއަށްވެސް އެދިފައެވެ. އިންޑިއާ ވަނީ އަވަސްއެހީގެ ގޮތުގައި 6.5 ޓަކުގެ ކާބޯތަކެތި ވައިގެމަގުން މިއަދު ސްރީލަންކާއަށް ފޮނުވާފައެވެ. ޗައިނާއާއި ގަލްފުގެ ބައެއް ގައުމުތަކުންވެސް ވަނީ އަވަސްއެހީގެ ގޮތުގައި ކާބޯތަކެއްޗާއި އިންސާނީ އެހީގެ ސާމާނު ފޮނުވުމުގެ މަސައްކަތް ފަށާފައެވެ. މިތަކެތި މާދަމާއިން ފެށިގެން ސްރީލަންކާއަށް ލިބޭނެކަމަށް ރިޕޯޓްތައް ބުނެއެވެ.
ފެންބޮޑުވުމުގެ ސަބަބުން ސްރީލަންކާގައި ރޭލުގެ ޚިދުމަތްތައްވެސްވަނީ ހުއްޓާލާފައެވެ. ތޫފާންގައި އާދަޔާ ޚިލާފަށް ވައިބާރުވުމުގެ ސަބަބުން ކޮލަމްބޯގެ ބައިނަލްއަގްވާމީ ވައިގެ ބަނދަރުކަމަށްވާ ބަންޑާރަނަޔަކަ ވައިގެ ބަނދަރަށް ދަތުރު ކުރަމުން ދިޔަ ގިނަ އަދަދެއްގެ މަތިންދާބޯޓު ވަނީ އެހެން ގައުމުތަކަށް ޑައިވާޓްކޮށްފައެވެ. ނަމަވެސް މިއަދު މެންދުރުފަހުން ބަންޑާރަނަޔަކަ އެއާޕޯޓަށް ފްލައިޓްތައް ޖައްސަން ފަށާފައިވާކަމަށް ވެއެވެ.