29 Nov 2025, 17:23
ސްރީ ލަންކާއަށް މިހާރު ކުރަމުންދާ ވިއްސާރައާ ގުޅިގެން، އެ ގައުމުން ނުފުރި ތިބި މީހުންނަށް ވިސާގެ ލުއިތަކެއް ދިނުމަށް ނިންމައިފިއެވެ.
މިދިޔަ ހަފުތާއިން ފެށިގެން ލަންކާއަށް މޫސުން ގޯސްވެ، ބޯކޮށް ވާރޭވެހުމުގެ ސަބަބުން ފެންބޮޑުވެ، ބިންގަނޑު ކަނޑައިގެން ދިޔުން ފަދަ ނުރައްކާތެރި ހާދިސާތައް ހިނގައިފައިވެއެވެ.
ލަންކާގެ ނޫސްތަކުގައިވާ ގޮތުން، ތޫފާނުގެ ސަބަބުން މިހާތަނަށް 123 މީހަކު މަރުވެ، 130 މީހަކު ގެއްލިފައިވެއެވެ. އެ މީހުން ހޯދުމަށް މަސައްކަތް ކުރަމުން އަންނައިރު، އަދިވެސް ބޯކޮށް ވާރޭވެހެމުން ދިޔުމުންނާއި ފެންބޮޑުވެ، މަގުތައް ބަންދުވެފައި ވުމުން އެ މަސައްކަތަށް ދަތިތަކާ ކުރިމަތިވެފައިވެއެވެ.
ސްރީ ލަންކާގައި ހުންނަ ދިވެހިރާއްޖޭގެ ހައި ކޮމިޝަނުން މިއަދު ނެރުނު ބަޔާނެއްގައި ވަނީ، މި ވިއްސާރައާ ގުޅިގެން، އެ ގައުމުން ނުފުރިފައިވާ މީހުންނަށް ވިސާގެ ޚާއްސަ ލުއިތަކެއް ދިނުމަށް ސްރީ ލަންކާގެ ޑިޕާޓްމަންޓް އޮފް އިމިގްރޭޝަން އެންޑް އެމިގްރޭޝަނުން ނިންމާފައިވާ ކަމަށެވެ.
އެ ލުއިތަކުގެ ދަށުން، އިއްޔެއިން ފެށިގެން ފުރަން މަސައްކަތްކޮށް، ވިއްސާރައިގެ ސަބަބުން ނުފުރި ތިބި މީހުންނަށް، ވިސާގެ މުއްދަތު އިތުރުކުރަން ފީއެއް ނުނަގާނެއެވެ. އަދި އެ މީހުން ވިސާ ޖަހައިފައިވާ މުއްދަތަށް ވުރެ އިތުރަށް ލަންކާގައި ތިބި ނަމަވެސް އިތުރު ފީއެއް ނުނަގާނެ ކަމަށް އެ ގައުމުގެ އިމިގްރޭޝަން ޑިޕާޓްމެންޓުން ބުނެފައިވެއެވެ.
މީގެ އިތުރުން، ކުރު މުއްދަތުގެ ޓޫރިސްޓް ނުވަތަ ބިޒްނަސް ވިސާ އަދި ރެޒިޑެންސް ވިސާ ޖަހާފައިވާ މީހުންނަށް އިތުރު ހަތް ދުވަހަށް ވިސާގެ މުއްދަތު އިތުުރުވާ ގޮތަށް ލަންކާގެ އިމިގްރޭޝަނުން ނިންމާފައިވެއެވެ.
ލަންކާގައި ފެންބޮޑުވެފައި: ނުފުރި ތިބި ދިވެހީންނަށް ވެސް ވިސާގެ ލުއިތަކެއް ލިބޭނެ -- ފޮޓޯ/ ރޮއިޓާސް
ކުރު މުއްދަތުގެ ޓޫރިސްޓް ވިސާގެ މުއްދަތު، އޮންލައިންޕޯޓަލްމެދުވެރިކޮށް އިތުރުކުރެވޭނެ ކަމަށް ބަޔާނުގައި ބުނެފައިވެއެވެ. އަދި އިތުރު އެހީތެރިކަން ބޭނުންނަމަ، ހައި ކޮމިޝަންގެ ހޮޓްލައިން 6666 881 76 94+ އަށް ގުޅުމަށް ނުވަތަ އެ ކޮމިޝަނަށްއީމެއިލްކުރުމަށް ލަންކާ ހައި ކޮމިޝަނުން އެދިފައިވެއެވެ.
ލަންކާ ހައި ކޮމިޝަނުން ވަނީ އެ ކާރިސާގެ ހާލަތު ގާތުން ބަލަމުން އަންނަ ކަމަށާއި، އެންމެ ފަހުގެ އަދާހަމަތައް ފޯރުކޮށްދެމުން ގެންދާނެ ކަމަށް ވެސް ބުނެފައެވެ.
ފަހުގެ ތާރީޚެއްގައި ލަންކާއަށް ކުރިމަތިވެފައިވާ އެންމެ ނުރައްކާތެރި އެއް މޫސުމީ މި ކާރިސާގައި 44،000 މީހުންގެ ގެދޮރު ގެއްލިފައިވާ ކަމަށް ލަންކާގެ ނޫސްތަކުގައިވެއެވެ.
މިއީ ލަންކާއަށް އާންމުކޮށް ވިއްސާރަކުރާ ދުވަސްވަރެއް ނަމަވެސް މިހާރު ވިއްސާރަ ކުރަމުންދަނީ ވަރަށް ބޮޑަށެވެ.
ލަންކާއަކީ ގިނަ އަދަދެއްގެ ދިވެހީން ދިރިއުޅޭ އަދި ބޭސްފަރުވާއަށާއި ކިޔެވުމަށާއި ޗުއްޓީ ހޭދަކުރަން ވެސް ދިވެހީން އާންމުކޮށް ގޮސް އުޅޭ ގައުމެކެވެ. އަދި ވިއްސާރައިގެ ސަބަބުން ނުރައްކާ އެންމެ ބޮޑުވެފައިވާ ސަރަހައްދުތަކުގެ ތެރޭގައި ނުވަރަލިޔާ ހިމެނޭއިރު، އެއީ ދިވެހީން ވަރަށް ގިނައިން ދިރިއުޅޭ ސަރަހައްދެކެވެ.
ލަންކާގައި ހުންނަ ހައިކޮމިޝަނުން މިހާރު އަންނަނީ، އެ ގައުމުގައި ތިބި، އެހީ ބޭނުންވާ ދިވެހީންނަށް އަސާސީ ކާބޯތަކެތި ފޯރުކޮށްދެމުންނެވެ. އަދި ބައެއް ދިވެހީން ބައިނަލްއަގުވާމީ އެއާޕޯޓުގައި ތާށިވެފައިވާތީ، އެ މީހުންނަށް އެހީވުމަށް ވެސް މަސައްކަތް ކުރަމުން އަންނަ ކަމަށް ހައި ކޮމިޝަނުން ބުނެފައިވެއެވެ.