29 Nov 2025, 13:50
މާލޭގެ ކެފޭއެއްގައި މިއަދު ހިނގި އަލިފާނުގެ ހާދިސާގައި ބިދޭސީއެއްގެ ފައި ފިހިއްޖެއެވެ.
މިއަދު 12:53 ހާއިރު، އެމްއެންޑީއެފުން ބުނީ، ހ. ވިލާ ޓީވީ ކައިރީ ހުންނަ އަލް ޒައިދު ކެފޭގައި އަލިފާނުގެ ހާދިސާއެއް ހިނގައިގެން ފަޔާފައިޓަރުން ހަރަކާތްތެރިވަމުން އަންނަ ކަމަށެވެ.
އޭގެފަހުން، 13:07ހާއިރު އެމްއެންޑީއެފުން ވަނީ، ކެފޭގައި ރޯވި އަލިފާން ކޮންޓްރޯލްވި ކަމަށް ބުނެފައެވެ.
އަލް ޒަކާ ކެފޭގައި ރޯވެގެން ފުލުހުންނާއި އެމްއެންޑީއެފް ހަރަކާތްތެރިވަނީ ---- ސަން ފޮޓޯ/ އަފްވާން ސޮލާހު
އެ ހާދިސާއާ ގުޅިގެން ނެޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ)އިން ވެސް ހަރަކާތްތެރިވިކަން ފާހަގަކޮށް، އެންޑީއެމްއޭއިން ބުނީ، މި ހާދިސާގައި ބިދޭސީއެއްގެ ފައި ކޮންމެވެސް މިންވަރަކަށް ފިހުނު ކަމަށެވެ. ނަމަވެސް އެއްވެސް މީހަކަށް އިންސާނީ އެހީ ބޭނުންވާ ހާލަތަކަށް ގޮސްފައިނުވާ ކަމަށް އެންޑީއެމްއޭއިން ވަނީ ބުނެފައެވެ.
'ސަން'އަށް ލިބިފައިވާ ވީޑިއޯތަކާއި ފޮޓޯތަކުން ފެންނަ ގޮތުގައި، މި ހާދިސާ ހިނގި ސަރަހައްދުގައި ފުލުހުން ވެސް އަންނަނީ ހަރަކާތްތެރިވަމުންނެވެ. އަދި، އެ ސަރަހައްދު ބަންދުކޮށްފައިވާއިރު، ކޮންމެވެސް މިންވަރަކަށް މީހުން ވެސް ވަނީ އެ ސަރަހައްދުގައި ހަރަކާތްތެރިވެފައެވެ.
އެ ހާދިސާ ހިނގަން މެދުވެރިވި ސަބަބެއް މިހާތަނަށް ސާފުވެފައެއް ނުވެއެވެ.