26 Nov 2025, 14:59
ދުނިޔޭގެ އެންމެ ބޮޑު ސިޓީ އަކީ އިންޑޮނޭޝިއާގެ ވެރިރަށް ޖަކާޓާ ކަމަށް އދ. ގެ ރިޕޯޓެއްގައި ބުނެފިއެވެ.
އެ ސިޓީގައި 41.9 މިލިއަން މީހުން ދިރިއުޅޭއިރު، ދެވަނައަށް އެންމެ ބޮޑު ސިޓީއަކީ 36.6 މިލިއަން މީހުން ދިރިއުޅޭ ބަންގްލަދޭޝްގެ ޑާކާއެވެ. ދެހާސް ފަންސާސް ވަނަ އަހަރު ދުނިޔޭގެ އެންމެ ބޮޑު ސިޓީއަށް ޑާކާ ވާނެ ކަމަށް ވަނީ ލަފާކޮށްފައެވެ.
އާބާދީ ބޮޑު ޖާވާ ޖަޒީރާގެ ހުޅަނގުގައި އޮންނަ ތިރި އައްސޭރިފަށުގެ ސިޓީއެއް ކަމަށްވާ ޖަކާޓާ އެންމެ ބޮޑު ސިޓީއަށްވީއިރު، މީގެކުރިން ލިސްޓުގެ އެންމެ ކުރީގައި އޮތީ ޖަޕާނުގެ ޓޯކިޔޯއެވެ.
އދ.ގެ ޑިޕާޓްމަންޓް އޮފް އިކޮނޮމިކް އެންޑް ސޯޝަލް އެފެއާޒްގެ ވޯލްޑް އާބަނައިޒޭޝަން ޕްރޮސްޕެކްޓްސް 2025 ރިޕޯޓުގައި ވެސް ދައްކާ ގޮތުގައި މެގަސިޓީތަކުގެ އަދަދު (10 މިލިއަނަށް ވުރެ ގިނަ މީހުން ދިރިއުޅޭ އާބަން ސަރަހައްދުތައް) 33 އަށް އިތުރުވެފައިވާއިރު، 1975 ވަނަ އަހަރު މެގަ ސިޓީގެ ގޮތުގައި އޮތީ އަށް ސިޓީއެވެ.
ބަންގްލަދޭޝްގެ ޑާކާގައި ރިކްޝާ އާއި ސައިކަލުގައި ބަޔަކު ބްރިޖެއް ހުރަސް ކުރަނީ. ފޮޓޯ/އީޕީއޭ
އޭޝިއާގައި ދުނިޔޭގެ 33 މެގަސިޓީގެ ތެރެއިން 19 މެގަސިޓީ ހިމެނޭއިރު، ގަދަ 10 ގައި އޭޝިއާގެ 9 ސިޓީ ހިމެނެއެވެ. ޖަކާޓާ، ޑާކާ އަދި ޓޯކިޔޯގެ އިތުރުން ގަދަ 10 ގައި ހިމެނޭ އޭޝިއާގެ އެހެން ސިޓީތަކަކީ އިންޑިއާގެ ނިއުދިއްލީ (30.2 މިލިއަން މީހުން)، ޗައިނާގެ ޝަންހާއީ (29.6 މިލިއަން މީހުން) ޗައިނާގެ ގުއަންޒޯ (27.6 މިލިއަން މީހުން) (ފިލިޕީންސްގެ މެނިލާ (24.7 މިލިއަން މީހުން)، އިންޑިއާގެ ކޮލްކަތާ (22.5 މިލިއަން މީހުން)، އަދި ދެކުނު ކޮރެއާގެ ސޯލް (22.5 މިލިއަން މީހުން) އެވެ.
ބައްތިރީސް މިލިއަން މީހުންގެ އާބާދީއެއް އޮންނަ މިސްރުގެ ޤާހިރާއަކީ އޭޝިޔާއިން ބޭރުގައި އޮތް ހަމައެކަނި ގަދަ 10 ސިޓީގެ ތެރޭގައި ހިމެނޭ ސިޓީ ކަމަށް އދ.އިން ބުނެއެވެ.
އަށާރަ މިލިއަން މީހުން ދިރިއުޅޭ ބްރެޒިލްގެ ސައޯ ޕައުލޯ އަކީ އެމެރިކާސްގެ އެންމެ ބޮޑު ސިޓީ ކަމަށްވާއިރު، ނައިޖީރިއާގެ ލަގޯސްގެ އާބާދީވެސް ވަރަށް ބޮޑަށް އިތުރުވެ، ސަބް ސަހަރާ އެފްރިކާގެ އެންމެ ބޮޑު ސިޓީއަށް ވަނީ ވެފައެވެ.
ޑާކާގައި އެހާ އަވަހަށް އާބާދީ އިތުރުވެގެން ދިޔައީ މޫސުމަށް އަންނަ ބަދަލުތަކުގެ ސަބަބުން ފެންބޮޑުވުމާއި، ކަނޑުގެ ލޮނުގަނޑު އުފުލުން ފަދަ މައްސަލަތަކުގެ ސަބަބުން ތަރައްގީނުވާ ބަންގްލަދޭޝްގެ އެހެން ހިސާބުތަކުން ޑާކާއަށް ހިޖްރަ ކުރަމުންދާތީ ކަމަށް އދ.ގެ ރިޕޯޓުގައި ވެއެވެ.
ޖަކާޓާއަށް ވެސް ކަނޑުގެ ލޮނުގަނޑު އުފުލުމުގެ ސަބަބުން މައްސަލަތަކާ ކުރިމަތިލާން ވަނީ ޖެހިފައެވެ. ލަފާކުރެވޭ ގޮތުގައި 2050 ވަނަ އަހަރުގެ ނިޔަލަށް އެ ސިޓީގެ ތިންބައިކުޅަ އެއްބައި ފެނުގެ އަޑިއަށްދާނެއެވެ.