26 Nov 2025, 13:41
ގައުމީ ސިއްހީ އިންޝުއަރެންސް ނިޒާމު އާސަންދަ އޮތީ ސަލާންޖަހަން ޖެހޭ ފަދަ ހާލަތެއްގައިކަން ގަބޫލުކުރަން ދަތި ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހީމް މިއަދު ވިދާޅުވެއްޖެއެވެ.
އާސަންދައިގެ އެހީގައި ފަރުވާ ހޯދުމަށް ރައްޔިތުން ސަލާންޖަހަން ޖެހޭ ކަމަށް ވިދާޅުވެ މިއަދުގެ ރައްޔިތުންގެ މަޖިލީހުގެ ޖަލްސާގައި ކެޔޮދޫ ދާއިރާގެ މެންބަރު މުހައްމަދު ނިއުޝާދު ކުރެއްވި ސުވާލަށް ޖަވާބުދެއްގައި ނާޒިމް ވިދާޅުވީ އެއީ ސަލާންޖަހަން ޖެހޭ ގޮތަށް އޮތް ނިޒާމެއް ކަމަށް ގަބޫލުކުރަން ދަތި ކަމަށެވެ.
އެންމެ ފުރަތަމަ ކަމަކަށް އެ ނިޒާމު އުފެއްދީ ވެސް ބޭސްފަރުވާއަށް ސަލާންޖަހަންޖެހޭ ގޮތަށް އޮތް އޮތުން ނައްތާލުމަށް ކަމަށް އޭނާ ވިދާޅުވިއެވެ. އަދި އެ ނިޒާމަކީ ދުނިޔޭގައި ވެސް އޮތް އެންމެ 'ޖެނެރަސް' ނުވަތަ ދީލަތު ސިއްހީ ނިޒާމު ކަމަށް ނާޒިމް ވިދާޅުވިއެވެ.
އަޅުގަނޑުގެ އަމިއްލަ ތަޖުރިބާއާއި މިކަމުގައި ފެންނަ މަންޒަރަށް ބަލާއިރު ދިވެހި ރާއްޖޭގައި އާސަންދައިން ކުރެވިފައި ހުރި ޚަރަދުތަކާއި، އާސަންދަ ނިޒާމު ރަނގަޅުވަމުން އަންނަ ގޮތާއި، މި ހުރިހާ ކަންކަމަށް ބަލާއިރު އަޅުގަނޑަށް ވަރަށް ބޮޑަށް ބުރަވެވޭ އާސަންދަ ނިޒާމު [އޮތީ އެހެނެއް [ސަލާންޖަހަން ޖެހޭ ގޮތަށް] ނޫންކަން،ހެލްތު މިނިސްޓަރު އަބްދުﷲ ނާޒިމް އިބްރާހީމް
ނާޒިމް ވިދާޅުވި ގޮތުގައި ރާއްޖޭގެ ކޮންމެ ރައްޔިތަކަށް ޑޮކްޓަރަށް ދެއްކުމާއި، ބަލިވުމުން ބޭސް ހޯދުން ފަދަ ކަންކަން ހުރީ ދުނިޔޭގެ ގިނަ ގައުމުތަކާ އަޅާ ބަލާއިރު ރަނގަޅު ގިންތިއެއްގައެވެ. އެހެންކަމުން އާސަންދަ ނިޒާމު އޮތީ ސަލާންޖަހަން ޖެހޭ ގޮތަކަށޭ ބުނުމުން އެކަމާ އެއްބަސްވާން ތަންކޮޅެއް ދަތި ކަމަށް ނާޒިމް ވިދާޅުވިއެވެ. ސަބަބަކީ އެ ނިޒާމް ހިނގާ ގޮތް ރަނގަޅަށް އެނގޭ އަދި އެ ނިޒާމު ބަލަމުންދާ މީހަކަށް ވާތީ ކަމަށް ނާޒިމް ވިދާޅުވިއެވެ.
އާސަންދަ ނިޒާމު މިހާރު އޮތް ގޮތަށް ތައުރީފުކުރައްވައި ނާޒިމް ވާހަކަދެއްކެވިއިރު، އާސަންދައަކީ ދައުލަތަށް ބޮޑު ބުރައަކަށް ވެފައި އޮތް ކަމެއްގެ ގޮތުގައި ގިނަ މީހުން ދެކެއެވެ. މި ސަރުކާރުން ވެސް އެ މޭރުމުން ވާހަކަދައްކާފައިވާއިރު، އާސަންދަ ރިފޯމްކުރުމުގެ ވާހަކަ މިދިޔަ އަހަރު ވެސް ދައުލަތުގެ ބަޖެޓު ހެދި ދުވަސްވަރު ދެއްކިއެވެ. ނަމަވެސް ފަހުން އެ ކަން ނުކުރަން ނިންމައި ނިންމުން ބަދަލުކުރީއެވެ.
މި އަހަރު އާސަންދައަށް ބަޖެޓުކޮށްފައިވަނީ 1،859.6 މިލިއަން ރުފިޔާއެވެ. ނަމަވެސް އަހަރު ނުނިމެނީސް އާސަންދައަށް ކަނޑައެޅި ބަޖެޓު ވެސް ވަނީ ހުސްވެފައެވެ.