26 Nov 2025, 13:09
ވިޔަފާރިކުރުމުގެ މަގުފަހިކުރުމަށްޓަކައި ސަރުކާރު ހިއްސާވާ ކުންފުނިތަކަށް ރިސޯޓު ތަރައްގީކުރުމަށް ރަށް ނުވަތަ ބިން ނުވަތަ ފަޅު ދޫކުރެވޭ ގޮތަށް ގާނޫނު އިސްލާހުކުރުމަށް މިއަދު ހުށަހަޅައިފިއެވެ.
ފަތުރުވެރިކަމާ ބެހޭ ގާނޫނަށް ސަރުކާރުގެ ފަރާތުން މި އިސްލާހު ހުށަހެޅުއްވީ ހިތަދޫ އުތުރު ދާއިރާގެ ޕީއެންސީ މެންބަރު މުހައްމަދު ސިނާންއެވެ.
ވިހި ވަނަ މަޖިލީހުގައި މީގެކުރިން ވެސް މި ގާނޫނަށް ދެތިން ފަހަރަކު އިސްލާހެއް ގެނެސްފިއެވެ.
މިފަހަރު ހުށަހަޅާފައި އޮތް އިސްލާހުގައި އެންމެ ބޮޑަށް ފާހަގަކުރެވުނު ކަމަކީ ސަރުކާރު ހިއްސާވާ ކުންފުނިތައް ނުވަތަ އެސްއޯއީތަކަށް ފަތުރުވެރިކަމުގެ ދާއިރާގައި ވިޔަފާރި ކުރެވޭ ގޮތް މަގުފަހިކުރާ ގޮތަށް އޮތް މާއްދާއެވެ. އެގޮތުން އެ ގާނޫނުގެ ފަސް ވަނަ މާއްދާއަށް ރިސޯޓެއް ނުވަތަ އިންޓަގްރޭޓެޑް ޓޫރިސްޓް ރިސޯޓެއް ތަރައްގީ ކުރުމަށް ރަށް ނުވަތަ ބިން ނުވަތަ ފަޅު ދޫކުރެވޭ ގޮތަށް އަކުރެއް އިތުރުކުރަން އޮތީ ހުށަހަޅައިފައެވެ.
މި މާއްދާ މިހާރު އޮންނަ ގޮތަކީ:
ޓޫރިޒަމް މިނިސްޓްރީން އިއުލާން ކޮށްގެން، ކަނޑައަޅާފައިވާ އުސޫލެއްގެ މަތިން އެކަށީގެންވާ ހުށަހެޅުމެއް ހުށަހަޅާ މީހަކަށް ނުވަތަ ފަރާތަކަށް ކުށްޔަށް ދިނުން.
- މަޝްރޫއޫއެއްގެ ތަފްސީލާއެކު، އެތަނަކަށް އެދި ޓޫރިޒަމް މިނިސްޓްރީއަށް ހުށަހެޅުމުން އެ ރަށެއް، ބިމެއް ނުވަތަ ފަޅެއް ކުށްޔަށް ދިނުން.
- ދުރާލާ އިއުލާންކޮށްފައިވާ އުސޫލުތަކާ އެއްގޮތްވާ ގޮތުގެ މަތިން ސަރުކާރުން ކަނޑައަޅާ މުހިންމު މަޝްރޫއެއް ހަވާލު ކުރެވޭ ފަރާތަކަށް ނުވަތަ އެފަދަ މަޝްރޫއަކަށް ހަރަދުކުރާ ފަރާތަކަށް، ކްރޮސް ސަބްސިޑީގެ ގޮތުގައި ރިސޯޓެއް ނުވަތަ އިންޓަގްރޭޓަޑް ރިސޯޓެއް ތަރައްގީކުރުމަށް ރަށް ނުވަތަ ބިން ނުވަތަ ފަޅު ދޫކުރުން.
އެ މައްދާއަށް އަކުރެއް އިތުރު ކުރުމުގެ ގޮތުގައި ސަރުކާރުން ހުށަހެޅީ، ދައުލަތުގެ ކުންފުންޏަކަށް ރިސޯޓެއް ނުވަތަ ބިމެއް ނުވަތަ ފަޅެއް ކަނޑައެޅޭ ވަކި ޝަރުތުތަކާ އެކު ދޫކުރެވޭ ގޮތަށް ހެދުމަށެވެ.
އެ ޝަތުރުތަކަކީ:
އެސްއޯއީއަކަށް ތަން ދޫކުރާނީ ވަޒީރުންގެ މަޖިލީހުން ނިންމައިގެން.
- އެފަދައިން ދޫކުރާ ރަށް، ބިން ނުވަތަ ފަޅު ދޫކުރާނީ ދައުލަތުގެ ކޮން ކުންފުންޏަކަށްތޯ ވަޒީރުންގެ މަޖިލީހުން ފާސް ކުރަން ޖެހޭނެ.
- ދައުލަތުގެ ކުންފުންޏަކަށް އެތަނެއް ދޫކުރެވޭނީ، މި އިސްލާހުގައިވާ ގޮތުގެ މަތިން، ސަރުކާރާއެކު ވެވޭ އެއްބަސްވުމެއްގެ ދަށުން.
- އެ އެއްބަސްވުމުގެ ދަށުން ލިބޭ ހައްގުތައް، އެހެން އެއްވެސް ފަރާތަކަށް ބަދަލުކޮށް ނުވަތަ ކުއްޔަށްދީ ނުވަތަ ސަބް ލީސްކޮށްގެން ނުވާނެ.
- ދޫކުރާ ތަނަށް ދަކަން ޖެހޭ އެކުއިޒިޝަން ފީ އެ ކުންފުންޏަކުން ސަރުކާރަށް ދެއްކުން.
މި އިސްލާހުގައިވާ ގޮތުން ޔޮޓް ބަނދަރު ހިންގުމަށް ވެސް ރަށް ނުވަތަ ބިން ނުވަތަ ފަޅު އެސްއޯއީތަކަށް ދެވޭ ގޮތަށް ހިމަނާފައިވެއެވެ. މި ބަދަލުތަކަށް އަމަލު ކުރަން ފެށުން އޮތީ، ބިލު މަޖިލީހުން ފާސްކޮށް، ތަސްދީގު ކުރާ ދުވަހުން ފެށިގެންނެވެ.
މި އިސްލާހުގައި ދައުލަތުގެ ކުންފުނި ކަމަށް މާނަ ކުރަނީ އެ ކުންފުންޏެއްގައި މަދުވެގެން ސަރުކާރުގެ 45 އިންސައްތަ ހިއްްސާ އޮންނަ ކުންފުނިތަކެވެ.
ސަރުކާރުގެ ފަރާތުން މި އިސްލާހު ހުށަހަޅާފައިވާއިރު، އެސްއޯއީތަކުގެ މެންޑޭޓުގެ ބޭރުން މަޝްރޫއުތައް ވެސް ދަނީ އެސްއޯއީތަކާ ހަވާލުކުރަމުންނެވެ. ސަރުކާރުން ބުނާ ގޮތުގައި އޭގެ ބޭނުމަކީ ޚަރަދުކުޑަކުރުމެވެ. ކަން އެހެން އޮއްވައި، ސަރުކާރުން މިހާރު ފަތުރުވެރިކަމުގެ ދާއިރާގައި ރިސޯޓުތައް ހިންގޭނެ ގޮތަށް ގާނޫނަށް މިވަނީ އިސްލާހެއް ހުށަހަޅައިފައެވެ.
ފާހަގަކޮށްލެވޭ ގޮތުގައި އެންމެ ފަހުން ކްރޮސް ސަބްސިޑީގެ ގޮތުގައި ޓޫރިސްޓު ރިޒޯޓު ތަރައްގީކުރުމަށް ދޫކުރާ ރަށް ނުވަތަ ބިން ނުވަތަ ފަޅު އަދި ކައުންސިލްތަކުގެ އިހުތިޞާސްގައި ހިމެނޭ ރަށްތަކާއި ފަޅުތައް ވެސް ޓޫރިޒަމްގެ ބޭނުމަށް ދޫކުރުމުގެ ބާރު ރައީސުލްޖުމްޙޫރިއްޔާއަށް ލިބިދޭ ގޮތަށް މި ގާނޫނަށް ވަނީ އިސްލާހު ގެނެސްފައެވެ.