"ޗައިލްޑިޝް ގެމްބިނޯ"ގެ ނަމުން މަޝްހޫރު އެމެރިކާގެ މިއުޒީޝަން ޑޮނަލްޑް ގްލޮވާއަށް ކުރިމަތިވި ސިއްހީ މައްސަލަތަކަކާ ގުޅިގެން އޭނާގެ މިއުޒިކް ޓުއާ ނުބާއްވަން ނިންމައިފިއެވެ.

އެމެޒޯން މިއުޒިކަށް ދިން އިންޓަވިއުއެއްގައި ވާހަކަ ދައްކަމުން ޑޮނަލްޑް ބުނީ، އޭނާގެ މިއުޒިކް ޓުއާ ކެންސަލް ކުރަން ނިންމީ އަމިއްލަ ސިއްހަތާމެދު އިތުރަށް ފަރުވާތެރިވެ ހަށިގަނޑަށް އަރާމު ބޭނުންވާތީ ކަމަށެވެ.

މި އަހަރުގެ ސެޕްޓެމްބަރު މަހު ކުރިއަށް ގެންދަން ނިންމި "ދަ ނިއު ވާލްޑް ޓުއާ"ގެ މަސައްކަތުގައި އުޅެނިކޮށް އޭނާއަށް ސްޓްރޯކެއް ޖެހިފައިވާކަން ދެނެގަނެވި އަވަސްވެގަތީ އެކަމަށް ފަރުވާ ހޯދުމަށް ކަމަށް 42 އަހަރުގެ މިއުޒީޝަން ވަނީ ބުނެފައެވެ.

އޭނާއަށް ސްޓްރޯކް ޖެހުނީ ވެސް ވަރަށް ބުރަކޮށް, ޓުއާއެއްގައި އުޅެނިކޮށް ކަމަށާއި އެ ދުވަހު ވަރަށް ބޮޑަށް ބޮލުގައި ރިއްސާފައި އެތަނަށް އެއްވެތިބި މީހުން ނުފެންނަ ހާލަތަށް ދިޔަ ކަމަށް ޑޮނަލްޑް ވަނީ ބުނެފައެވެ.

ޑޮނަލްޑް ގްލޮވާ ސްޓޭޖްގައި ޕާފޯމް ކުރަނީ--ފޮޓޯ/ޓެލެގްރާފްއިންޑިއާ

އޭނާއަށް ޖެހުނު ސްޓްރޯކަށް ފަރުވާ ހޯދުމަށްފަހު އެ ބަލިން ރަނގަޅުވީތަނާހެން ހިތުގައި ލޯވަޅެއް ހުރިކަމަށް ޑޮކްޓަރުން އެންގުމާ އެކު އަމިއްލަ ސިއްހަތާމެދު ވަރަށް ސީރިއަސްކޮށް ވިސްނަން ނިންމި ކަމަށް ޑޮނަލްޑް ވަނީ ބުނެފައެވެ.

ހިތުގައި އުފެދިފައިވާ ލޯވަޅާ ގުޅިގެން ދެ ސާޖަރީއަކަށް އޭނާ ވަނީ ތައްޔާރުވެފައެވެ. އަމިއްލަ ސިއްހަތާ މެދު މީގެކުރިން މާބޮޑު ފަރުވާލެއް ނުބެހެއްޓި ނަމަވެސް ނޭނގި ހުއްޓާ ދިމާވި ސިއްހީ މައްސަލަތަކާ ގުޅިގެން މިވަގުތު ބޭނުންވަނީ އަމިއްލަ ސިއްހަތަށް އިސްކަން ދިނުމަށް ކަމަށް އެކްޓިންގް ދާއިރާގެ އިތުރުން ފިލްމު އުފެއްދުމުގެ މަސައްކަތް ވެސް ކުރަމުން އަންނަ ޑޮނަލްޑް ވަނީ ބުނެފައެވެ.

ވަރަށް އަވަހަށް ބެލުންތެރިންނާ ޓުއާއަކުން ބައްދަލުވާނެ ކަމުގެ އުއްމީދު އެބައޮތް ކަމަށް ޑޮނަލްޑް ވަނީ ބުނެފައެވެ. ގްލޯވާ ދެން އެންމެ އަވަހަށް ބެލުންތެރިންނަށް ފެންނާނީ "ބެންޑޯ ސްޓޯން އެންޑް ދަ ނިއު ވާލްޑް" އަދި "ކޮމިއުނިޓީ"ގެ ނަމުގައި އުފައްދާ ފިލްމަކުންނެވެ.