26 Nov 2025, 10:13
މީގެ ތިން އަހަރު ކުރިން ރިލީޒްކޮށް ބޮކްސް އޮފީހުގައި ބޮޑު ކާމިޔާބީއެއް ހޯދި ތެލުގޫ ފިލްމު "ބޭބީ"ގެ ހިންދީ ރިމޭކް އެކްޓަރު ބާބިލް ޚާންއަށް ގެއްލިއްޖެއެވެ.
މި ފިލްމު ބާބިލްއަށް ގެއްލުނުއިރު ޒުވާން އެކްޓަރު ވަނީ ފިލްމުގެ ބައެއް މަންޒަރުތައް ވެސް ޝޫޓްކޮށްފައެވެ. ނަމަވެސް އޭރު ފިލްމުގެ މަސައްކަތްތައް މެދުކަނޑާލީ ބާބިލްއަށް ސިއްހީ މައްސަލަތަކެއް ކުރިމަތިވެ ފަރުވާ ހޯދުމަށް ވަގުތު ބޭނުންވުމާ ގުޅިގެންނެވެ.
ސައި ރާޖޭޝް ޑައިރެކްޓްކޮށް އާނަންދު ދެވެރަކޮންދާ ލީޑް ރޯލް ކުޅުނު ފިލްމުގެ ހިންދީ ރިމޭކްގެ ލީޑް ރޯލްއިން ބާބިލްގެ ބަދަލުގައި ދެން ފެންނާނީ އާއިޝްވަރީ ތާކަރޭއެވެ. ތާކަރޭއާ އެކު ހިންދީ ރިމޭކްގެ ބަތަލާގެ ރޯލްއިން ފެންނާނީ ތެލުގޫ ތަރި އުޕަސާނާ ޝެޓީއެވެ.

ތެލުގޫ ފިލްމު "ބޭބީ"ގެ ޕޯސްޓަރެއް--ފޮޓޯ/ޕިންކްވިލާ
ފިލްމު "ބޭބީ"ގެ ހިންދީ ރިމޭކް ވެސް ޑައިރެކްޓް ކުރާނީ ސައި ރާޖޭޝްއެވެ. މައިތިރީ މޫވީ މޭކާސްއިން ގެނެސްދޭ ހިންދީ ރިމޭކްގެ ޝޫޓިންގް ވަރަށް އަވަހަށް ފަށަން ވަނީ ނިންމާފައެވެ. ފިލްމު "ބޭބީ" އަކީ ތިން ޒުވާނުންގެ މެދުގައި އުފެދޭ ތިނެސްކަން ލޯބީގެ ވާހަކައެއްގެ މައްޗަށް ބިނާކޮށް އުފެއްދި ފިލްމެކެވެ.
އެންމެ 10 ކްރޯޑު ރުޕީސްގެ ބަޖެޓަކުން އުފެއްދި މި ފިލްމަށް ބޮކްސް އޮފީހުގައި ވަނީ 80 ކްރޯޑު ރުޕީސްގެ އާމްދަނީއެއް ލިބިފައެވެ.
ފިލްމު "ޤާލާ"އިން 2022ގައި އެކްޓިންގް ކެރިއަރު ފެށި ބާބިލް އެންމެފަހުން ބެލުންތެރިންނަށް ފެނިފައި ވަނީ މި އަހަރުގެ އޭޕްރިލް މަހު ޒީ5އިން ގެނެސްދިން "ލޮގްއައުޓް"އިންނެވެ.