26 Nov 2025, 10:15
ބޮލީވުޑް ބަތަލާ ރަކުލް ޕްރީތް ސިންގްގެ ނަމުގައި ނުދަން މީހަކު ވަޓްސްއަޕް މެދުވެރިކޮށް މެސެޖުތަކެއް ފޮނުވަމުންދާތީ އެކަމަށް ސަމާލުވުމަށް ބަތަލާ އެދެފިއެވެ.
ރަކުލް ކަމަށް ބުނެ ވަޓްސްއަޕް މެދުވެރިކޮށް ބަތަލާގެ ސަޕޯޓަރުންނާ ވެސް ޗެޓް ކުރަމުންދާ ކަމަށާއި ބަތަލާގެ ފޮޓޯ އާއި ވީޑިއޯ ވެސް އެ ޗެޓުތަކުގައި ބަދަލުކުރަމުންދާ ކަމަށް ރަކުލް ވަނީ ބުނެފައެވެ.
މިކަމާ ގުޅިގެން ސޯޝަލް މީޑިއާގަކު ކުރި ޕޯސްޓުގައި ރަކުލް ވަނީ ވަޓްސްއަޕްގައި ރަކުލް ކަމަށް ބުނެ ބޭނުންކުރާ ނަމްބަރު ވެސް ހާމަކޮށްފައެވެ. އެ ނަމްބަރަކީ 8111067586 ކަމަށާއި އެ ނަމްބަރު ބްލޮކް ކުރުމަށް ރަކުލް ވަނީ ސަޕޯޓަރުންނާއި ގާތް ރަހްމަތްތެރިންގެ ފަރާތުން އެދިފައެވެ.
ބަތަލާ ރަކުލްގެ ނަމުގައި ފޮނުވަމުންދާ ވަޓްސްއަޕް މެސެޖުތަކާ ގުޅިގެން ސޯޝަލް މީޑީއާގައި ކޮށްފައިވާ ޕޯސްޓު--ފޮޓޯ/ފިލްމުފެއަ
މީގެކުރިންވެސް ވަޓްސްއަޕް މެދުވެރިކޮށް ފިލްމީ ތަރިންގެ ނަމުގައި ބަޔަކު މީހުން އާއްމުންނަށް މެސެޖެ ކުރަމުންދާ ކަމުގެ ޝަކުވާތައް ވަނީ ފެން މަތިވެފައެވެ.
އޭގެތެރޭގައި ބަތަލާ އަދިތީ ރާއޯ ހައިދަރީ އަދި ޝްރިޔާ ސަރަން ހިމެނެއެވެ. މި ތަރިންގެ ނަމުގައި މެސެޖުކުރި މީހުން ވަނީ އެ ތަރިންގެ ނަމުގައި ފޮޓޯ ޝޫޓުތަކެއް ނެގުމަށް ބުކިންގްސް ހައްދަން އެދިފައެވެ.
ފިލްމު "ދޭ ދޭ ޕިޔާރު ދޭ 2"ގެ ބަތަލާ ބުނީ އެފަދަ ގޮތް ނޭނގޭ ނަމްބަރުތަކުން ކުރާ މުއާމަލާތްތަކުގައި ޝައްކުވާ ކަހަލަ ކަމެއް ފާހަގަ ކުރެވިއްޖެނަމަ ވީހާވެސް އަވަހަކަށް ކަމާބެހޭ އިދާރާތަކަށް އެ މައުލޫމާތުތައް ފޯރުކޮށްދިނުމަށެވެ.
އެއްވެސް ފިލްމީ ތަރިއަކު އެ ތަރިއެއްގެ އަމިއްލަ ޕާސަނަލް ނަމްބަރުން މަސައްކަތާ ގުޅޭ މުއާމަލާތު ކުރުމަށް ނުގުޅާނެ ކަމަށާއި އެފަދަ ކަންކަމުގައި އަބަދުވެސް އިސްވެ ހަރަކާތްތެރިވާނީ ފިލްމީ ތަރިން ހާއްސަކޮށްފައިވާ ޓީމަކުން ކަމަށް އަދިތީ ރާއޯ ވެސް ވަނީ ބުނެފައެވެ.