26 Nov 2025, 09:33
ޔުއެފާ ޗެމްޕިއަންސް ލީގުގައި ރޭ ބާސެލޯނާ ބަލިކޮށް ޗެލްސީން ލީގު ތާވަލުގެ ފަސްވަނަ މަގާމަށް ޖެހިލައިފިއެވެ.
ލަންޑަނުގެ ސްޓެމްފަޑް ބްރިޖުގައި ކުޅުނު މި މެޗު ޗެލްސީ ކާމިޔާބުކޮށްފައިވަނީ 3-0 ގެ ނަތީޖާއަކުންނެވެ.
ޗެލްސީން ވަނީ މި މެޗަށް ވަރުގަދަ ކުޅުންތެރިން ނެރެފައެވެ. މި މެޗުގެ ކުރިން ޗެލްސީ ކުޅުނު ލީގު ބައެއް މެޗުތަކުގައި ސީނިއާ ބައެއް ކުޅުންތެރިން ބޭނުންކޮށްފައެއް ނުވެއެވެ. މީގެތެރޭގައި މޯސެސް ކައިސޭޑޯ ހިމެނެއެވެ.
މި މޮޅާއެކު ޗެލްސީ އޮތީ ކުޅުނު ފަސް މެޗުން ލިބިފައިވާ 10 ޕޮއިންޓާއެކު ތާވަލުގެ ފަސްވަނައިގައެވެ. ބާސެލޯނާއަށް ފަސް މެޗުން ލިބިފައިވާ ހަތް ޕޮއިންޓާއެކު އެ ޓީމު އޮތީ ތާވަލުގެ 15 ވަނައިގައެވެ.
މެޗުގެ ފުރަތަމަ ލަނޑަކީ ބާސެލޯނާ ކުޅުންތެރިން އަތުން ބައިކޮޅަށް ވަން ލަނޑެކެވެ. މި ލަނޑު ވަދެފައިވަނީ މެޗުގެ 27 ވަނަ މިނިޓުގައި ޗެލްސީގެ ޕެޑްރޯ ނެޓޯ ފޮނުވާލި ހަމަލާއެއް ދިފާއުކުރަން އުޅުމުގެ ތެރޭގައި ބާސެލޯނާގެ ކޫންޑޭ އަތުންނެވެ.
ބާސެލޯނާއަށް ލަނޑުޖަހަން މާގިނަ ފުރުސަތުތަކެއް ނުލިބުމުގެ ނަތީޖާއަކަށްވީ މުޅި ޓީމު ޕްރެޝަރަށްދިއުމެވެ. އޭގެ ނަތީޖާއެއްގެ ގޮތުން ދުރަތަމަ ހާފުގެ ފަހުކޮޅު ކެޕްޓަން ރޮނަލްޑް އަރައުހޯ އަށް ދެވަނަ ރީނދޫ ކާޑަކާއިއެކު ރަތްކާޑެއް ދައްކާފައެވެ.
ބާސެލޯނާއިން ދެވަނަ ހާފާ ކުރިމަތިލީ އެއް ކުޅުންތެރިއެއް މަދުކޮށެވެ. ޗެލްސީން ވަނީ ދެވަނަ ހާފުގެ ފުރަތަމަ 10 މިނިޓުގެ ތެރޭގައި އޭގެ ފައިދާ ނަގާފައެވެ. ޗެލްސީގެ ކެޕްޓަން ރީސް ޖޭމްސް ދިން ބޯޅައަކުން އުމުރުން 18 އަހަރުގެ ޒުވާން ފޯވަޑް އެސްޓެވާއޯ ވިލިއަމް ވަނީ އެ ޓީމަށް ލީޑު ފުޅާކޮށްދީފައެވެ.
ޗެލްސީގެ ތިންވަނަ ލަނޑަކީ މެޗުގެ 73 ވަނަ މިނިޓުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ލިއާމް ޑެލަޕް ޖެހި ލަނޑެކެވެ.
މި ލަނޑުތަކަށްފަހު ވެސް ބާސެލޯނާ ފެނުނީ ޕްރެޝަރުން އަރައިނުގަނެވި އުޅުނު ތަނެވެ. އަދި ގިނަ ގޯސްތަކެއްވެސް ދަނޑުމަތީގައި ހެދިއެވެ.