26 Nov 2025, 10:40
ބައިނަލްއަގުވާމީ ގާނޫނުތަކާ ޚިލާފަށް ހިފާފައިވާ ހުޅަނގު އައްސޭރިން ފަލަސްތީނުގެ އެތައް ހާސް ބަޔަކު ގެދޮރު ދޫކުރުމަށް އިސްރާއީލުން މަޖުބޫރުކުރަން ފަށައިފިއެވެ.
ހިއުމަން ރައިޓްސް ވޮޗް (އެޗްއާރުޑަބްލިއު)އިން މިދިޔަ ހަފުތާގައި ޝާއިއުކުރި ރިޕޯޓެއްގައި ބުނެފައިވާ ގޮތުގައި މި އަހަރު 32،000 ފަލަސްތީނުގެ މީހުން ގެދޮރުން ބޭރުކޮށް އެ ހުރިހާ އެންމެން އެންމެ ތިން ރެފިއުޖީ ކޭމްޕްގައި ދިރިއުޅެން މަޖުބޫރުކުރިވިއެވެ.
ޖަނަވަރީ މަހު އިސްރާއީލުން ޖެނިން، ނޫރު ޝަމްސް އަދި ތުލްކަރެމް ރެފިއުޖީ ކޭމްޕްތަކުގައި ފެށި އޮޕަރޭޝަނުގެ ސަބަބުން ގެދޮރު ދޫކޮށް ދިއުމަށް މަޖުބޫރުވި އެތައް ބަޔަކު ތިބި ކަމަށާއި އެއީ 1967 ވަނަ އަހަރަށް ފަހު ހުޅަނގު އައްސޭރިން އެންމެ ގިނައިން މީހުން ބޭރުކުރި ފަހަރު ކަމަށް އެޗްއާރްޑަބްލިޔުއިން ބުނެއެވެ.
ފަލަސްތީނުގެ ރަމްޒީ އިދާރީ ކޮންޓްރޯލެއް ވެސް ނެތް ހުޅަނގު އައްސޭރީގެ އޭރިއާ ސީގައި، އިސްރާއީލުގެ ހަމަލާތަކުގެ ސަބަބުން ފަލަސްތީނުގެ 1،000 އަށް ވުރެ ގިނަ މީހުން ގެދޮރު ގެއްލިފައިވާ ކަމަށާއި، ހިފާފައިވާ އިރުމަތީ ގުދުސްގައި އިތުރު 500 މީހުން ގެދޮރު ނެތް ކަމަށް އދ އިން ބުނެއެވެ.
ހުޅަނގު އައްސޭރީގެ ރެފިއުޖީ ކޭމްޕްތަކުގައި އިސްރާއީލު ސިފައިން އަމަލުކުރާ ގޮތާއި އާންމުން ގެދޮރު ދޫކޮށް ދިއުމަށް މަޖުބޫރުކުރާ މައްސަލަ އިސްރާއީލުގެ އަސްކަރީ އަދި ސިޔާސީ އިސް އޮފިޝަލުން ތަހުގީގުކުރާނެ ކަމަށް ބުނާ ނަމަވެސް، ހިފާފައިވާ ހުޅަނގު އައްސޭރީގައި އިސްރާއީލުން ހިންގާ އަމަލުތަކަށް މިހާތަނަށް ވެސް މާ ބޮޑު އަދަބެއް ދީފައެއްނުވެއެވެ.
އިސްރާއީލުގެ މަގުސަދަކީ ކޮބާ؟
އިސްރާއީލު ސަރުކާރުގެ އިސް ގިނަ މީހުން ބުނާ ގޮތުގައި، އެ މީހުންގެ އަމާޒަކީ ހުޅަނގު އައްސޭރި އެއްކޮށް ހިފުމެވެ.
އޮކްޓޯބަރު މަހު އިސްރާއީލުގެ ޕާލަމެންޓުން ވަނީ ހިފާފައިވާ ހުޅަނގު އައްސޭރީގެ މައްޗަށް އިސްރާއީލުގެ އިސްތިގުލާލު އިތުރުކުރާ ބިލަކަށް ރުހުން ދީފައެވެ.
އިސްރާއީލުން ހުޅަނގު އައްސޭރީގައި ވަޒަންވެރިވާނެ ގޮތުގެ ޕްލޭނެއް އިއުލާނު ކުރަނީ. ފޮޓޯ/އޭޕީ
އިސްރާއީލުގެ ހަރުކަށި މާލީ ވަޒީރު، ބެޒާލެލް ސްމޮޓްރިޗް ވެސް ވަނީ ހުޅަނގު އައްސޭރި ހިފަން ބޭނުންވާކަން ފާޅުގައި ހާމަކޮށްފައެވެ.
މިދިޔަ އަހަރު އޭނާގެ ޒަޔަނިޒަމް ޕާޓީގެ ބައްދަލުވުމެއްގައި ވާހަކަދައްކަމުން ސްމޮޓްރިޗް ބުނެފައިވާ ގޮތުގައި ހުޅަނގު އައްސޭރި އިސްރާއީލުގެ ދައުލަތުގެ މުހިންމު ބަޔަކަށް ހެދުމަށްޓަކައި އޭނާ އަންނަނީ މަސައްކަތްކުރަމުންނެވެ. އެގޮތުން، އޮގަސްޓް މަހު ސްމޮޓްރިޗް ވަނީ ހުޅަނގު އައްސޭރީގައި، ރާވަފައިވާ ސެޓްލްމަންޓް މަޝްރޫއުގެ ދަށުން 3،000 އަށް ވުރެ ގިނަ ގެދޮރު އަޅަން ނިންމައި، ވަޒަންވެރިވާނެ ގޮތުގެ ޕްލޭނެއް ވެސް އިއުލާނުކޮށްފައެވެ.
ހުޅަނގު އައްސޭރިއާއި އިރުމަތީ ގުދުސްގެ ފަލަސްތީނުގެ ބިންތަކުގައި ގަވާއިދާ ހިލާފަށް އާބާދުވެފައިވާ ތަންތަނުގައި 700،000 އަށް ވުރެ ގިނަ އިސްރާއީލު މީހުން ދިރިއުޅެއެވެ.