25 Nov 2025, 21:58
މީގެ ހަތަރު އަހަރު ކުރިން، ގއ. މާމެންދޫގައި ގްރޫޕަކުން ހަމަލާދީ އުމުރުން އެންމެ 17 އަހަރުގެ އަހުމަދު އުދައްޔު މަރާލި މައްސަލައިގައި ކްރިމިނަލް ކޯޓުގައި ކުށް ސާބިތުނުވި މީހާގެ މައްސަލަ ދައުލަތުން ހައިކޯޓުގައި އިސްތިއުނާފު ކޮށްފިއެވެ.
ފެބްރުއަރީ އަށެއް، 2021ގައި ހިނގި އެ މާރާމާރީގައި އުދައްޔުގެ ބޭބެ، ފިރުޝާން ޒާހިރު ވެސް ޒަޚަމުކޮށްފައިވެއެވެ. އެގޮތުން އޭނާގެ ބުރަކައްޓަށް ތޫނު އެއްޗަކުން ހަމަލާދީފައިވެއެވެ.
ފިރުޝާނަށް ގއ. އަތޮޅު ހޮސްޕިޓަލާއި ގދ. ތިނަދޫގައި ހުންނަ އަބްދުއްސަމަދު މެމޯރިއަލް ހޮސްޕިޓަލުން ފަރުވާ ދިނެވެ. އުދައްޔުއަށް ފަރުވާ ދެމުން ދަނިކޮށް އޭނާ މަރުވީއެވެ.
އުދައްޔުގެ މަރުގެ މައްސަލައިގައި ދައުލަތުން ދައުވާ ކުރި، ގއ. މާމެންދޫ ބިލަތްމާގޭ ޝަރަފް ރަޝީދުގެ މައްޗަށް ގަސްދުގައި މީހަކު މެރުމުގައި ބައިވެރިވުމުގެ ދައުވާކުރި ނަމަވެސް އެ ދައުވާ ސާބިތުނުވެއެވެ. ނަމަވެސް ތޫނު އެއްޗެއް ބޭނުންކޮށްގެން އެހެން މީހަކާ މެދު މާރާމާރީ ހިންގުމުގައި ބައިވެރިވުމުގެ ކުށް ސާބިތުވެ، ހަތް އަހަރުގެ ޖަލު ހުކުމެއް އޭނާގެ މައްޗަށް އިއްވިއެވެ.
ދައުލަތުން ހައިކޯޓުގައި އިސްތިއުނާފު ކޮށްފައިވަނީ މަރުގެ ބައި ސާބިތު ނުވުމުން އެބައެވެ. މި މައްސަލަ ހައިކޯޓަށް ހުށަހަޅާފައި އޮތަސް އެ ކޯޓަށް އަދި އެ މައްސަލަ ބަލައިގެން ކަމެއް އެނގިފައެއް ނުވެއެވެ.
އުދައްޔު މަރާލި މައްސަލައިގައި، ގަސްދުގައި މީހަކު މެރުމުގައި ބައިވެރިވުމުގެ ކުށް ސާބިތުވެ މަރަން ހުކުމްކޮށްފައިވަނީ މާމެންދޫ, ރިހިފަރުދާގޭ އަހުމަދު ޝަމީމާއި އެ ރަށު ގުލްފާމްގޭ, މުހައްމަދު މާޒިނެވެ.
މި ދެ މީހުން މަރަން ހުކުމް ކުރީ، މަރަށް މަރު ހިފުމަށް އުދައްޔުގެ ވާރިސުން އެދިފައިވާތީއެވެ. މި މައްސަލައިގައި ކުށް ސާބިތުވީ މީހުންގެ މައްޗަށް އަދަބު ކަނޑައެޅުމުގެ ކުރިން، އުދައްޔުގެ ވާރިސުންގެ ބަސް ހޯދުމަށް ބޭއްވި އަޑުއެހުމުގައި އުދައްޔުގެ މަންމައާއި ބައްޕަ ބުނީ އެ މީހުންނަށް ދޭން ބޭނުންވަނީ މަރަށް މަރު ކަމަށެވެ.
"ހަމަ މަރަށް މަރު މަ ބޭނުމީ، ނަފުސަކަށް ނަފުސެއް މަ ބޭނުމީ." އުދައްޔުގެ މަންމަ ޝަރީއަތުގައި ބުންޏެވެ.
އުދައްޔުގެ މަރާ ގުޅިގެން 17 އަހަރުގެ ކުއްޖެއްގެ މައްޗަށް ވެސް ޖުވެނައިލް ކޯޓުގައި ވަނީ ކުރިން ކުށް ސާބިތުވެފައެވެ. އެ ކުއްޖާ 25 އަހަރަށް ޖަލަށްލާން ކުރިން އޮތީ ހުކުމްކޮށްފައެވެ.