25 Nov 2025, 15:15
އެމްއެމްޕީއާރްސީ ޚިޔާނާތުގެ މައްސަލައިގައި ކުރީގެ ބަންޑާރަނައިބު ޢާއިޝަތު އާޒިމާ ޝަކޫރުގެ މައްޗަށް ދައުލަތުން އުފުލި ދެ ދައުވާ އަނބުރާ ގެންދަން ނިންމާފައިވާ ކަމަށް ޕްރޮސެކިއުޓާ ޖެނެރަލް (ޕީޖީ) އޮފީހުން މިއަދު ބުނެފިއެވެ.
ފެބްރުއަރީ 17، 2019 ގައި ދައުލަތުން ވަނީ އާޒިމާއާ ދެކޮޅަށް މަނީ ލޯންޑްރިންއަށް މަގުފަހިކޮށްދިނުމާއި، ރަސްމީ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާ އުފުލާފައެވެ.
އެކަމަކު، ޕީޖީން މިއަދު ވަނީ އެ މައްސަލަ އިތުރަށް ކުރިއަށް ނުގެންދަން ނިންމާފައެވެ.
ޕީޖީ އޮފީހުން ބުނީ، އެގޮތަށް ނިންމީ އާޒިމާގެ ފަރާތުން އެ އޮފީހަށް ހުށަހަޅާފައިވާ ކަންކަމާއި، އާޒިމާގެ މައްޗަށް ތުހުމަތުކުރެވޭ ކުށުގެ އަމަލުގެ ސަބަބުން މަގުފަހިވި މަނީ ލޯންޑްރިން ކުށުގެ އަސްލު ފާއިލުގެ މައްޗަށް ކުށް ސާބިތުނުވާކަމަށް ސުޕްރީމް ކޯޓުން ހުކުމްކޮށްފައިވާތީ ކަމަށެވެ.
އެ ދައުވާތަށް އާޒިމާގެ މައްޗަށް އުފުލާފައިވަނީ ކުރީގެ ރައީސް އަބްދުالله ޔާމީން އަބްދުލްގައްޔޫމް މަނީ ލޯންޑާ ކޮށްފައިވާ ކަމަށް ތުހުމަތުވި މައްސަލައާ ގުޅިގެންނެވެ. ނަމަވެސް، ދަށު ކޯޓުން ޔާމީނަށް ކުރި ހުކުމް ސުޕްރީމް ކޯޓުން ވަނީ ބާތިލުކޮށްފައެވެ.
އެހެންވެ، އެ ދައުވާ ކުރިއަށް ނުގެންދެވޭނެ ކަމަށް ކަނޑައަޅައިދޭން އެދި އާޒިމާ ހައިކޯޓާއި ސުޕްރީމް ކޯޓަށް ވެސް ހުށަހެޅިއެވެ. ނަމަވެސް މަތީ ކޯޓުތަކުން ނިންމާފައިވަނީ އެ ދައުވާތަށް ބާތިލް ކުރަން ޖެހޭ ގާނޫނީ އަސާސެއް ނެތް ކަމަށެވެ.
ފާހަގަކޮށްލެވޭ ގޮތުގައި އާޒިމާއަކީ ރައީސް ޑރ. މުހައްމަދު މުއިއްޒުގެ އާއިލާގެ ގާނޫނީ ވަކީލެވެ. އެ މަނިކުފާނުގެ އަނބިކަނބަލުން ހުށަހެޅުއްވި މައްސަލަތަކުގައި ވެސް ވަކާލާތުކުރެއްވީ އާޒިމާއެވެ. އޭގެ ކުރިން، އާޒިމާ ވަނީ ޕީއެންސީގެ ޓިކެޓުގައި މާލޭ މޭޔަރުކަމަށް ވެސް ވާދަކުރައްވާފައެވެ.
މީގެ އިތުރުން، އާޒިމާގެ ބޭބެ، އާތިފް ޝަކޫރުގެ މައްޗަށް އެމްއެމްޕީއާރްސީގެ ޚިޔާނާތާ ގުޅިގެން އުފުލި ދައުވާ ވެސް މީގެ ކުރިން ޕީޖީން ބާތިލުކޮށްފައިވެއެވެ. އޭނާއަށް ދައުވާކުރީ މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ދަށުން ހިންގާ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ)ގެ އިސްވެރިޔާގެ މަގާމުގައި ހުންނަވައި އެމްއެމްޕީއާރްސީގެ ޗެކަކުން އެސްއޯފް ކުންފުނީގެ އެކައުންޓަށް ގިނަ އަދަދެއްގެ ފައިސާ ޖަމާކޮށް ޝައްކު ކުރެވޭ މުއާމަލާތްތައް ކަމާ ބެހޭ ފަރާތްތަކަށް ރިޕޯޓުނުކުރާ ކަމަށް ބުނެއެވެ.
އާތިފް ވެސް މިހާރު ހުންނެވީ ސަރުކާރުގެ މަސް ކުންފުނި މިފްކޯގެ އެޑްވައިޒަރެއްގެ މަގާމުގައެވެ.