25 Nov 2025, 13:53
އަންނަ އަހަރަށް ހުށަހަޅާފައި އޮތް 64 ބިލިއަން ރުފިޔާގެ ރެކޯޑު ބަޖެޓު، ރައްޔިތުންގެ މަޖިލީހުން މިއަދު ފާސްކޮށްފިއެވެ.
ބަޖެޓު ފާސްކުރުމަށް 74 މެންބަރުން ވޯޓު ދެއްވިއިރު، ފާސްކުރުމާ ދެކޮޅަށް 12 މެންބަރުން ވޯޓު ވަނީ ދެއްވައިފައެވެ.
އެއީ، އާމްދަނީއާއި ހިލޭ އެހީގެ ގޮތުގައި ޖުމުލަ 40.4 ބިލިއަން ރުފިޔާ ލިބޭނެ ކަމަށް އަންދާޒާކޮށްފައެވެ. ބަޖެޓުގެ ޖުމުލަ ޚަރަދަކީ 49.9 ބިލިއަން ރުފިޔާއެވެ. އޭގެ ތެރެއިން 39.9 ބިލިއަން ރުފިޔާ ހިމަނާފައިވަނީ ހިންގުމުގެ ޚަރަދަށެވެ. އެއީ ޖުމުލަ ބަޖެޓުގެ 62 އިންސައްތައެވެ.
އެ ބަޖެޓުގައި ދަރަނި އަނބުރާ ދައްކަން 9.3 ބިލިއަން ރުފިޔާ ވަނީ ހިމަނާފައެވެ.
ބަޖެޓު ހުށަހަޅުއްވަމުން ފިނޭންސް މިނިސްޓަރު މޫސާ ޒަމީރު ވިދާޅުވީ، އަންނަ އަހަރު ރަސްމީ ރިޒާވް 903.7 މިލިއަން ޑޮލަރަށް އިތުރުވާނެ ކަމަށް ލަފާކުރެވޭ ކަމަށެވެ. މިހާރު ރަސްމީ ރިޒާވްގައި ހުރީ 838.6 މިލިއަން ޑޮލަރެވެ. އޭގެ ކުރިން މިދިޔަ 2024 ވަނަ އަހަރު ނިމުނުއިރު ރިޒާވްގައި ހުރީ އެންމެ 673.9 މިލިއަން ޑޮލަރެވެ.
މީގެ އިތުރުން، މިނިސްޓަރު ވިދާޅުވި ގޮތުގައި އަންނަ އަހަރު އިގުތިސާދީ ދުވެލި ހުންނާނީ 5.3 އިންސައްތައިގައެވެ.
ފިނޭންސް މިނިސްޓަރު ބަޖެޓު ހުށަހަޅުއްވަނީ --- ފޮޓޯ/ މަޖިލިސް
ޒަމީރު ވިދާޅުވީ، ޖުމުލަ ބަޖެޓުގެ އަދަދު ރިކޯޑު މިންވަރެއް ކަމަށްވާ 64 ބިލިއަން ރުފިޔާއަށް އެރީ އެ ދަރަނި ދައްކަން ޖެހުމުގެ ސަބަބުން ކަމަށެވެ. އެކަމަކު، އެ ޚަރަދު ކަނޑާލުމުން ބަޖެޓަކީ ޖުމުލަ 55 ބިލިއަން ކަމަށް އޭނާ ވިދާޅުވިއެވެ.
އަންނަ އަހަރު އާމްދަނީގެ ގޮތުގައި ލިބޭނެ ކަމަށް ލަފާކުރި 40 ބިލިއަންގެ ތެރެއިން 31.1 ބިލިއަން ރުފިޔާއަކީ ޓެކުހުގެ އާމްދަނީގެ ގޮތުގައި ލިބޭނެ ކަމަށް ޖަހާފައިވާ އަދަދެވެ. ޓެކްސް ނޫން އާމްދަނީގެ ގޮތުގައި ވެސް 8.7 ބިލިއަން ރުފިޔާ ލިބޭނެ ކަމަށް ވަނީ ހިސާބު ޖަހާފައެވެ. އަދި، ހިލޭ އެހީގެ ގޮތުގައި 373.6 މިލިއަން ރުފިޔާ ލިބޭނެ ކަމަށް ބަޖެޓުގައިވެއެވެ.
އެހެންވެ، މިއީ މި އަހަރަށް އަންދާޒާކުރި އާމްދަނީއާއި ހިލޭ އެހީއަށްވުރެ 6.6 އިންސައްތަ އިތުރު އަދަދެއް ކަމަށް ޒަމީރު ވިދާޅުވިއެވެ.
މީގެ އިތުރުން އަންނަ އަހަރު 31.7 އިންސައްތައިން ކެޕިޓަލް ޚަރަދު ނުވަތަ މަޝްރޫއުތަކަށް ކުރާ ޚަރަދު އިތުރުވެ، އެ ކަމަށް 9.3 ބިލިއަން ރުފިޔާ ހޭދަވާނެ ކަމަށް ބަޖެޓުގައިވެއެވެ.
އަންނަ އަހަރު ފައިނޭންސިންގެ ގޮތުގައި 26.3 ބިލިއަން ރުފިޔާ ހޯދަންޖެހޭނެ ކަމަށް އަންދާޒާކޮށްފައިވާއިރު، އޭގެ ތެރެއިން 16.8 ބިލިއަން ރުފިޔާ ހޯދަން ރާވާފައިވަނީ ބޭރުގެ ފަރާތްތަކުންނެވެ.
މިދިޔަ އަހަރެކޭ ވެސް އެއްގޮތަށް މިއަހަރު ވެސް މި ސަރުކާރުން ހުށަހެޅި ދެވަނަ ބަޖެޓަށް ބޮޑެތި ފާޑުކިޔުންތަކެއް އަމާޒުވިއެވެ. ނަމަވެސް ސަރުކާރުން ވަނީ އެ ފާޑުކިޔުންތައް ދިފާއުކޮށްފައެވެ.
އެގޮތުން މި އަހަރުގެ ބަޖެޓާއި އަންނަ އަހަރަށް ލަފާކޮށް ހުށަހެޅި ދައުލަތުގެ ބަޖެޓުގައި ވަކިވަކި މަޝްރޫއުތަކުގެ ތަފްސީލު އެއްވެސް ވަރަކަށް ނުހިމަނަނީ ރައްޔިތުން ބޭނުންވާ ގޮތަށް މަޝްރޫއުތައް ކުރިއަށް ގެންދިއުމުގެ ބޭނުމުގައި ކަމަށް، ޒަމީރު ވިދާޅުވިއެވެ. އަދި ބަޖެޓުގެ މައިގަނޑު އަސާސަކީ ދައުލަތުން ދައްކަން ހުރި ދަރަނިތައް ދެއްކުމަށް މަގުފަހިކުރުން ކަމަށް ޒަމީރު ވިދާޅުވިއެވެ.