24 Nov 2025, 18:55
ޖަޕާނު ސަރުކާރުގެ ހިލޭ އެހީގެ ދަށުން ދޭ "ދަ ޕްރޮޖެކްޓް ފޯ ހިއުމަން ރިސޯސަސް ޑިވެލޮޕްމަންޓް ސްކޮލަޝިޕް" ޖޭޑީއެސް ސްކޯލާޝިޕް ނިންމި ފަސް ދަރިވަރުންނަށް ރިޕޯޓިން ސެޝަނެއް ބާއްވައިފިއެވެ.
މި ސެޝަންގައި އެ ދަރިވަރުންގެ ދިރާސީ ހޯދުންތަކާއި ތަޖުރިބާތައް ހިއްސާކޮށްފައިވެއެވެ.
މި ރިޕޯޓިން ސެޝަންގައި ޖޭޑީއެސްގެ ހިންގާ ކޮމިޓީގެ މެމްބަރުން ކަމަށްވާ ޖަޕާންގެ ސަފީރު އިޝިގަމީ ރުމިކޯ، ފޮރިން މިނިސްޓްރީގެ ސްޓޭޓް މިނިސްޓަރު އަބްދުالله ހަމީދާއި، ހަޔާ އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. ޢަބްދުއްރަޙީމް ހަސަނާއި ރާއްޖޭގައި ހުންނަ ޖައިކާ ރެޒިޑެންޓް ރިޕްރެޒެންޓޭޓިވް ޓަކީ މޮޓޯ އާއި ސިވިލް ސާވިސް ކޮމިޝަނުގެ މެމްބަރު ޑރ. ދީބާ މޫސާ ބައިވެރިވެވަޑައިގެންނެވިއެވެ.
މިއަހަރުގެ ސްކޯލާޝިޕަށް ކުރިމަތިލުމުގެ ފުރުސަތު ހުޅުވާލާފައިވަނީ އަންނަ މަހުގެ ފުރަތަމަ ދުވަހުގެ ނިޔަލަށެވެ.
ޖޭޑީއެސް ސްކޯލާޝިޕަކީ މިނިވަން މުއައްސަސާތަކާއި، ސިވިލް ސާވިސްގެ ދާއިމީ މުވައްޒަފުންނާއި، ކޯޓުތަކާއި ގުޅުން ހުރި އިދާރާތަކާއި، މަޖިލީހުގެ ދާއިމީ މުވައްޒަފުންނަށް ޚާއްސަކުރެވިފައިވާ ސްކޮލާޝިޕެކެވެ. އެގޮތުން މިއަހަރު ތިން ޕްރޮގްރާމަކުން ސްކޯލާޝިޕްގެ ފުރުސަތުތައް ޖަޕާން ސަރުކާރުން ވަނީ ހުޅުވާލައިފައެވެ. އެ ތިން ޕްރޮގްރާމަކީ:
ޖަޕާންގެ އިންޓަނޭޝަނަލް ޔުނިވާސިޓީ (އައިޔޫޖޭ): މާސްޓާ އޮފް އާޓްސް އިން އިކޮނޮމިކްސް ނުވަތަ މާސްޓާ އޮފް އާޓްސް އިން އިންޓަނޭޝަނަލް ޑިވެލޮޕްމަންޓް
- ރިޓްސުމެއިކަން ޔުނިވާސިޓީ: މާސްޓާ އޮފް އާޓްސް އިން އިންޓަނޭޝަނަލް ރިލޭޝަންސް
- ރިޓްސުމެއިކަން އޭޝިއާ ޕެސިފިކް ޔުނިވާސިޓީ (ރިޓްސުމެއިކަން އޭޕީޔޫ): މާސްޓާ އޮފް ސައިންސް އިން އިންޓަނޭޝަނަލް ކޯޕަރޭޝަން ޕޮލިސީ
މި ސްކޯލާޝިޕްގައިކޮންމެ ޔުނިވާސިޓީއަކުން ލިބޭނީ ދެ ފުރުސަތެވެ. ކިޔެވުމުގެ ހުރިހާ ޚަރަދަކާއި ދަތުރުގެ ޚަރަދުގެ އިތުރުން ޖަޕާނުގައި ދިރިއުޅުމާއި ރާއްޖެ އެނބުރި އައުމުގެ ޚަރަދުވެސް ދޭނީ ޖަޕާނު ސަރުކާރުންނެވެ.
ރާއްޖެއަށް މި ސްކޯލާޝިޕް ދިނުމުގެ ބޭނުމަކީ ސަރުކާރުގެ އިދާރީ ހިންގުމަށް ބޭނުންވާ އިންސާނީ ވަސީލަތް އިތުރަށް ތަރައްގީކުރުމަށް އެހީތެރިވެދިނުމުގެ ގޮތުން އެކި އިދާރާތަކުގެ މުވައްޒަފުންނަށް މާސްޓާސް ޑިގްރީއަށް ކިޔެވުމުގެ ފުރުސަތު ފަހިކޮށްދިނުމެވެ. އެ މުވައްޒަފުންނަކީ ގައުމުގެ އިޖުތިމާއީ އަދި އިގްތިސޯދީ ތަރައްގީގެ ޕްލޭންތައް އެކުލަވާލުމުގައި ފުރިހަމައަށް ބައިވެރިވާ، ގައުމީ ތަރައްގީގައި އިސްދައުރެއް އަދާކުރާނެ ބަޔަކަށް ހެދުމެވެ.