10 Nov 2025, 14:53
ޔޫޓިއުބް ޓީވީގެ ސަބްސްކްރައިބަރުންނަށް ޑިޒްނީގެ ޗެނަލްތައް ކެނޑުމުގެ ސަބަބުން ދިމާވި ދަތިކަމަށް ބަދަލެއްގެ ގޮތުގައި 20 ޑޮލަރުގެ ކްރެޑިޓެއް ދޭން ނިންމައިފިއެވެ.
މި ކްރެޑިޓް ބޭނުންކުރެވޭނީ އެމީހުންގެ ކުރިއަށް އޮތް ބިލް ސްޓޭޓްމަންޓްތަކުން އަގު އުނިކުރުމަށެވެ.
މި ކްރެޑިޓް ދެނީ އީއެސްޕީއެން، އޭބީސީ، އަދި ޑިޒްނީގެ އެހެނިހެން ޗެނަލްތައް އެއް ހަފްތާއަށްވުރެ ގިނަ ދުވަހު (އޮކްޓޯބަރު 31 އިން ފެށިގެން) ކެނޑުމާ ގުޅިގެންނެވެ.
ޔޫޓިއުބުން ބުނާގޮތުގައި ސަބްސްކްރައިބަރުންނަށް މިހާރުން މިހާރަށް އީމެއިލް މެދުވެރިކޮށް މިކަން އަންގަމުންދާނެއެވެ.
މި މައްސަލަ އުފެދުނީ މައިގަނޑު ގޮތެއްގައި އަގުތަކާ ގުޅިގެން ކަމަށް ރިޕޯޓްތައް ބުނެއެވެ. އެކަމާގުޅިގެން ޔޫޓިއުބް ޓީވީން ބުނެފައިވަނީ ޑިޒްނީން އަގު ބޮޑުކުރަން އުޅޭ ކަމަށާއި، ޑިޒްނީން ބުނެފައިވަނީ ޔޫޓިއުބް ޓީވީން އެމީހުންގެ ޗެނަލްތަކަށް އަގުހެޔޮ ރޭޓެއް ދޭން ދެކޮޅު ހަދާ ކަމަށެވެ.
މި ދެފަރާތުން އެއްބަސްވުމަކަށް އާދެވިއްޖެނަމަ، ކެނޑުނު ޗެނަލްތައް ގިނަވެގެން މަދު ގަޑިއިރުތަކެއްގެ ތެރޭގައި އަލުން ގެނެސްދޭނެ ކަމަށް ޔޫޓިއުބް ޓީވީން ބުނެއެވެ.
މީގެ ކުރިން 2022 ވަނަ އަހަރުވެސް މި ދެފަރާތުގެ މެދުގައި މިފަދަ މައްސަލައެއް ދިމާވެ، ޑިޒްނީގެ ޕްރޮގްރާމްތައް އެއް ދުވަހަށް ކެނޑުމުން، ޔޫޓިއުބް ޓީވީން ކަސްޓަމަރުންނަށް 15 ޑޮލަރުގެ ކްރެޑިޓެއް ދީފައިވެއެވެ.
ޔޫޓިއުބް ޓީވީ އަކީ ގޫގްލްގެ މިލްކިއްޔާތުގައިވާ އޮންލައިން ޓީވީ ސްޓްރީމިން ހިދުމަތެކެވެ. މީގެ ސަބްސްކްރައިބަރުންނަށް ކޭބަލް ޓީވީއާ އެއްގޮތަށް ލައިވް ޓީވީ ޗެނަލްތަކާއި އޮން-ޑިމާންޑް ކޮންޓެންޓް ބެލޭނެއެވެ.
ޑިޒްނީ އަކީ ދުނިޔޭގެ އެންމެ ބޮޑެތި މީޑިއާ ކުންފުނިތަކުގެ ތެރޭގައި ހިމެނޭ ކުންފުންޏެކެވެ. އެ ކުންފުނީގެ ދަށުގައި އީއެސްޕީއެން، އޭބީސީ، އަދި އެހެނިހެން ގިނަ ޗެނަލްތަކެއް ހުރެއެވެ.
ސްޓްރީމިންގ ހިދުމަތްދޭ ފަރާތްތަކާއި ކޮންޓެންޓް ޕްރޮވައިޑަރުންނާ ދެމެދު މިފަދަ މައްސަލަތައް ވަރަށް ގިނައިން ދިމާވެއެވެ. މައިގަނޑު ގޮތެއްގައި މިކަހަލަ މައްސަލަތައް ދިމާވަނީ މީޑިއާ ބްރޯޑްކާސްޓް ކުރުމުގެ ހުއްދަ (ކޮންޓެންޓް ޑިސްޓްރިބިއުޝަން އެގްރީމަންޓްސް) އާ ގުޅޭގޮތުންނެވެ. މި އެގްރީމަންޓްތަކުގައި ޗެނަލްތައް ސްޓްރީމް ކުރުމަށް ދައްކަންޖެހޭ އަގުތައް ހިމެނެއެވެ.