09 Nov 2025, 18:57
ކޮލެޖު ހިންގާތާ 15 އަހަރުވެފައިވާނަމަ، އެ ކޮލަޖަކަށް ޔުނިވާސިޓީއެއްގެ ދަރަޖަ ލިބޭހެން މަތީ ތައުލީމާއި ތަމްރީނުގެ ގާނޫނަށް އިސްލާހެއް ގެންނަ ބިލު މިއަދު ރައީސް ޑރ. މުޙައްމަދު މުއިއްޒު ތަސްދީގު ކުރައްވައިފިއެވެ.
މިދިޔަ ބުދަ ދުވަހު މަޖިލީހުން ފާސްކުރި އެ އިސްލާހުގެ މަގުސަދަކީ ދިވެހިރާއްޖޭގައި މަތީ ތައުލީމުގެ ދޮރު މިހާރަށްވުރެ ބޮޑަށް ހުޅުވާލައި، ވަސީލަތްތަކާއި ގާބިލުކަން ހުރި ފަރާތްތަކަށް ރާއްޖޭގައި ޔުނިވަސިޓީ ތައުލީމު ފޯރުކޮށްދިނުމުގެ ފުރުސަތު ފަހިކޮށްދިނުމެވެ.
މަޖިލީހުން އެ އިސްލާހު ގެންނަ ބިލު ފާސްކުރީ، ވޯޓުގައި ބައިވެރިވެވަޑައިގެންނެވި 55 މެންބަރުންގެ އިއްތިފާގުންނެވެ.
އެގޮތުން ކޮލެޖެއް، ޔުނިވަސިޓީއަކަށް ބަދަލުކުރަން އެދޭއިރު އެ ކޮލެޖަކީ ހިންގާތާ 15 އަހަރުވެފައިވާ ކޮލެޖަކަށް ވާންޖެހޭނެއެވެ.
އެ ކޮލެޖެއް ޔުނިވަސިޓީއަކަށް ބަދަލުކުރުމަށް އެދޭއިރު ހުންނަންޖެހޭނެ ޝަރުތުތަކުގެ ތެރޭގައި މޯލްޑިވްސް ނޭޝަނަލް ކޮލިފިކޭޝަން ފްރޭމްވޯކް ލެވެލް ހަތެއް އަދި ލެވެލް ނުވައަކުން މަދުވެގެން ތިން ދާއިރާއަކުން ޕްރޮގްރާމްތައް ހިންގަންޖެހޭނެއެވެ. އެ ދާއިރާތަކަކީ:
އާޓް އެންޑް ހިއުމަނިޓީޒް
- އިންޖިނިއަރިން އެންޑް ޓެކްނޮލޮޖީ
- ލައިފް ސައިންސް އެންޑް މެޑިސިން
- ނެޗުރަލް ސައިންސަސް
- ސޯޝަލް ސައިންސް
އޭގެއިތުރަށް، އެ ކޮލެޖަކީ މޯލްޑިވްސް ނޭޝަނަލް ކޮލިފިކޭޝަން ފްރޭމްވޯކްގެ ލެވެލް ހަތަކުން ފެށިގެން މަތީގެ ކޯސްތަކުގައި މަދުވެގެން 1،000 ދަރިވަރުން ކިޔަވަމުންދާ ކޮލެޖަކަށް ވާންޖެހޭނެއެވެ.
ބައިނަލްއަގްވާމީ ޔުނިވަސިޓީ ރޭޓިންއެއް ނުވަތަ ރޭންކެއްގައި ބައިވެރިވެ، ރޭޓުކުރެވިފައިވާ ކޮލެޖަކަށް ވެސް ވާންޖެހޭނެއެވެ. ނުވަތަ އެފަދަ ގިންތިއެއްގެ ޔުނިވަސިޓީއެއްގެ ޕްރޮގްރާމްތައް ހިންގާތާ މަދުވެގެން ފަސް އަހަރުވެފައިވާ ކޮލެޖަކަށް ވާންޖެހޭނެއެވެ.
މީގެއިތުރުން، ބައިނަލްއަގްވާމީ ޔުނިވަސިޓީތައް ބައިވެރިވާ ޖަމާއަތެއްގެ މެންބަރެއްގެ ގޮތުގައާއި، ބައިނަލްއަގްވާމީ ކޮލިޓީ އެޝިއުރެންސް ޖަމާއަތެއްގެ މެންބަރެއްގެ ގޮތުގައި މަދުވެގެން ފަސް އަހަރު ދުވަހުގެ ތަޖުރިބާ އެ ކޮލެޖަކަށް ލިބިގެން ވާންވާނެއެވެ. އަދި، އެ ކޮލެޖަކީ ބައިނަލްއަގްވާމީ ފެންވަރުގެ ރިސާޗާއި، ބޭރު ޔުނިވަސިޓީތަކާއި ޖަމާއަތްތަކުގެ ހިންގުމުގެ ތަޖުރިބާ ލިބިފައިވާ ކޮލެޖަކަށް ވެސް ވާންވާނެއެވެ.
ކޮލެޖުގެ އެކަޑަމިކް ފެންވަރު ކަށަވަރުކުރުމުގެ ގޮތުން އެކަޑަމިކް ޕްރޮގްރާމުތަކުގައި ކިޔަވައިދޭ މުވައްޒަފުންގެ މަދުވެގެން 10 އިންސައްތައަކީ ޕީއެޗްޑީ ހާސިލުކޮށްފައިވާ ފަރާތްތަކަށް ވާންޖެހޭނެކަމަށް ވެސް މި އިސްލާހުގައި ވަނީ ބަޔާންކޮށްފައެވެ.