29 Jun 2025, 10:11
ގޫގުލް އިން އެ ކުންފުނީގެ ވީޑިއޯ އެޑިޓިން އެޕްލިކޭޝަން، "ޔޫޓިއުބް ކްރިއޭޓް"، އެޕަލްގެ އައިއޯއެސް ޑިވައިސްތަކަށް ނެރުމުގެ މަސައްކަތް ފަށައިފިއެވެ.
އެންޑްރޮއިޑަށް މި އެޕް ނެރުނުތާ ގާތްގަނޑަކަށް ދެ އަހަރު ފަހުން މި ކަން ކުރާއިރު، މީގެ މައިގަނޑު މަޤްޞަދަކީ ބައިޓްޑާންސްގެ "ކެޕްކަޓް" ފަދަ މަޝްހޫރު އެޕްތަކާ ވާދަކޮށް، ޔޫޓިއުބް ކޮންޓެންޓް ކްރިއޭޓަރުންނަށް ފަސޭހަ ޓޫލްތަކެއް ފޯރުކޮށްދިނުމެވެ.
ޓެކްކްރަންޗް އިން ރިޕޯޓްކޮށްފައިވާ ގޮތުގައި، މިކަން ހާމަވެފައިވަނީ، ގޫގުލް އިން އިންޑިއާގެ ބެންގަލޫރުގައި އައިއޯއެސްއަށް ޚާއްސަކޮށް ސޮފްޓްވެއާ އިންޖިނިއަރުން ހޯދުމަށް ކޮށްފައިވާ ވަޒީފާގެ އިޢުލާނުތަކަކުންނެވެ. މިއީ ޔޫޓިއުބް ކްރިއޭޓްގެ އައިފޯނާއި، އައިޕެޑް ވާޝަން ތަރައްޤީކުރުމަށް ކުރާ މަސައްކަތެއްކަން މި އިޢުލާނުތަކުން ކަށަވަރުވެއެވެ.
ޔޫޓިއުބް ކްރިއޭޓްގެ އެންޑްރޮއިޑް ވާޝަން ފުރަތަމަ ނެރުނީ 2023 ވަނަ އަހަރުގެ ސެޕްޓެމްބަރު މަހެވެ.
ޔޫޓިއުބް ކްރިއޭޓް އަކީ ކޮންޓެންޓް ކްރިއޭޓަރުންނަށް އަމާޒުކޮށްގެން ހިލޭ ފޯރުކޮށްދޭ މޮބައިލް ވީޑިއޯ އެޑިޓަރެކެވެ. މި އެޕްލިކޭޝަން ބޭނުންކޮށްގެން ޔޫޓިއުބް ޝޯޓްސް އާއި ދިގު ވީޑިއޯތައް ފަސޭހަކަމާއެކު އެޑިޓްކޮށް، ސްޓިކާ، ޖީއައިއެފް، އަދި އެކި އެފެކްޓްސްތައް އިތުރުކުރެވޭނެއެވެ. ގޫގުލްއިން ބުނާ ގޮތުގައި މި އެޕް ތަރައްޤީކޮށްފައިވަނީ 3,000 އަށްވުރެ ގިނަ ކްރިއޭޓަރުންގެ ޚިޔާލާއި މަޝްވަރާގެ މަތިންނެވެ.
ނަމަވެސް، މި ދާއިރާގައި ޔޫޓިއުބް ކްރިއޭޓްއަށް ވަރުގަދަ ވާދަވެރިކަމަކާ ކުރިމަތިލާން ޖެހިފައިވެއެވެ. ސެންސަރު ޓަވަރުގެ ތަފާސްހިސާބުތައް ދައްކާ ގޮތުގައި، މި އަހަރުގެ ދެވަނަ ކުއާޓަރުގައި ކެޕްކަޓް 66 މިލިއަން ފަހަރު ޑައުންލޯޑް ކުރެވުނުއިރު، ޔޫޓިއުބް ކްރިއޭޓް ޑައުންލޯޑް ކުރެވިފައިވަނީ އެންމެ 500,000 ފަހަރުއެވެ. މަހަކު އެކްޓިވް ޔޫޒަރުންގެ އަދަދަށް ބަލާއިރު ވެސް، ކެޕްކަޓްގެ 442 މިލިއަނަށްވުރެ ގިނަ ޔޫޒަރުން ތިބިއިރު، ޔޫޓިއުބް ކްރިއޭޓް ބޭނުންކުރަނީ އެއް މިލިއަނަށްވުރެ މަދު މީހުންނެވެ.
މިފަދަ ބޮޑު ތަފާތެއް ހުރި ނަމަވެސް، ޔޫޓިއުބް ކްރިއޭޓް އިން އަންނަނީ ފާހަގަކޮށްލެވޭ ކުރިއެރުންތަކެއް ހޯދަމުންނެވެ. އެގޮތުން، އެޕްގެ މަހަކު އެކްޓިވް ޔޫޒަރުންގެ އަދަދު މިދިޔަ އަހަރާ އަޅާބަލާއިރު 28 ޕަސެންޓު އިތުރުވެފައިވެއެވެ. މިއާ ޚިލާފަށް، ކެޕްކަޓްގެ ޔޫޒަރުން ނުވަ ޕަސެންޓު އަދި އިންޝޮޓްގެ ޔޫޒަރުން ހަތް ޕަސެންޓު ދަށްވެފައިވާކަން ފާހަގަކޮށްލެވެއެވެ. ސެންސަރު ޓަވަރުގެ އެނަލިސްޓް އޭބް ޔޫސެފް ވިދާޅުވާ ގޮތުގައި، މިއީ ޔޫޓިއުބް ކްރިއޭޓް އިން ވަފާތެރި ޔޫޒަރުންތަކެއް ހޯދަމުން އަންނަ ކަމުގެ ހެއްކެކެވެ.