އާދައިގެ މަތިން ކޮންމެ ހުކުރު ދުވަހަކު ވެސް މާލޭގައި އުޅޭ ބިދޭސީން ޖަމާވާ ޖުމްހޫރީ މައިދާނުގައި އެމްޑީޕީގެ މުޒާހަރާ ފެށީ މިއަދު ހަވީރު 5:30ގަ އެވެ. މުޒާހަރާ ޖުމްހޫރީ މައިދާނުގައި ފެށިތާ މާގިނައިރުތަކެއް ނުވެ، ސަލާމަތީ ބާރުތަކުން ވަނީ ބާރުގެ ބޭނުންކޮށް، އެ ސަރަހައްދުން މީހުން ދުރަށް ލުމަށް މަސައްކަތް ފަށާފަ އެވެ. އެއްވި މީހުން އެ ސަރަހައްދުން ދުރަށް ލުމަށް ރަޔަޓް ފުލުހުންނާއި ސިފައިން މަސައްކަތް ކުރުމުގެ ތެރޭގައި ބައެއް މީހުންނަށް އެކިވަރުގެ އަނިޔާތަށް ލިބުނެވެ.

ރައީސުލްޖުމްހޫރިއްޔާ ޑރ. މުހައްމަދު ވަހީދު އިސްތިއުފާ ދެއްވުމަށާއި އަވަސް އިންތިހާބަކަށް ގޮވާލި މުޒާހަރާގައި ފުލުހުން ވަނީ 32 މީހުން މިއަދު ހައްޔަރުކޮށްފަ އެވެ. އެ މީހުން ހައްޔަރު ކުރީ ޖުމްހޫރީ މައިދާން ދޫކޮށް ދިއުމަށް ފުލުހުން ތަކުރާރުކޮށް އެދުމުން ވެސް އެކަމާ ދެކޮޅު ހެދުމުންނެވެ.

ހައްޔަރުކުރި މީހުންގެ ތެރޭގައި ރައީސް މުހައްމަދު ނަޝީދުގެ ސަރުކާރުގެ ޓްރާސްޕޯޓް މިނިސްޓަރު އާދިލް ސަލީމް ވެސް ހިމެނިވަޑައިގަންނަވަ އެވެ. ޖުމްހޫރީ މައިދާނުގައި ހުންނަވައިގެން ސަރުކާރާ ދެކޮޅަށް އަޑުއުފުއްލަވަނިކޮށް، އާދިލް ހައްޔަރު ކުރަން އުޅުޅުނު ފުލުހުން ވަނީ އޭނާއާ ހަޑިހުތުރު ބަހުން މުއާމަލާތްކޮށްފަ އެވެ. ރައްދުގައި އާދިލް ސަލީމް ވެސް ވަނީ ފުލުހުންނާ ހަޑިހުތުރު ބަހުން މުހާތަބު ކުރައްވާފަ އެވެ.

އެކަމާ ގުޅިގެން ފުލުހުންގެ މީޑިއާ އޮފިޝަލް ސަބްއިންސްޕެކްޓާ އޮފް ޕޮލިސް ހަސަން ހަނީފު ވިދާޅުވީ އާންމުންނާ މުއާމަލާތް ކުރުމުގައި ފުލުހަކު އެފަދަ ބަސްތަކެއް ބޭނުން ކުރާނަމަ އެ މައްސަލަ ފުލުހުންނަށް ހުށަހެޅުމުން އެކަމެއް ތަހުގީގު ކުރާނެ ކަމަށެވެ. އަދި ފިޔަވަޅު އަޅަންޖެހިއްޖެ ނަމަ އެ ފުލުހަކާ ދޭތެރޭގައި ފިޔަވަޅު ވެސް އަޅާނެ ކަމަށް ވިދާޅުވި އެވެ.

މިއަދުގެ މުޒާހަރާގައި ހައްޔަރު ކުރި 32 މީހުންގެ ތެރޭގައި ހިމެނެނޭ ހަމައެކަނި އަންހެން މީހާ ހައްޔަރު ކުރީ ފިރިހެން ފުލުހުންތަކެކެވެ. ނަމަވެސް ކުށެއްގެ ތުހުމަތުގައި އަންހެނަކު ހައްޔަރު ކުރާއިރު، އަދި މުޒާހަރާއެއްގެ ތެރެއިން އަންހެނަކު ހައްޔަރު ކުރާއި އެ އަންހެނަކު ހައްޔަރު ކުރަނީ އަންހެން ފުލުހުންނެވެ. މީގެ ކުރިން ފުލުހުން އަމަލު ކުރަމުން ވެސް ދަނީ އެގޮތަށެވެ.

މިއަދުގެ މުޒާހަރާގައި އަންހެނަކު ހައްޔަރުކޮށް އަތުގައި ލޮކް އެޅުވުމުގައި ފިރިހެން ފުލުހުން ބައިވެރިވެފައިވާ މައްސަލާގައި ފުލުހުންގެ މީޑިއާ އޮފިޝަލް ވިދާޅުވީ އަންހެނަކު ހައްޔަރު ކުރުމުގައި ފިރިހެން ފުލުހުންތަކެއް ހަރަކާތްތެރިވީ "ހާލަތައް ބަލާފައި" ކަމަށެވެ. އަދި އެވަގުތު އެ ސަރަހައްދުގައި އަންހެން ފުލުހުންތަކެއް ހަރަކާތްތެރިވަމުން ނުދާނީ ފިރިހެން ފުލުހުން ނުކުމެ، އޭނާ ހައްޔަރު ކުރީ ކަމަށެވެ.

ފުލުހުންތަކެއް އެ އަންހެން ކުއްޖާ ހައްޔަރު ކުރަން އުޅުމުން އޭނާ ވަނީ ފުލުހުންގެ ބެލުމުގެ ދަށަށް ދިއުމަށް ގަދަދައްކާފަ އެވެ. އަދި ފުލުހުން އޭނާގެ ގައިގައި ހިފަހައްޓައި ފުރަގަހަށް އަތް ގެންގޮސް ލޮކް އަޅުވަން އުޅުމުން އެ އަންހެން މީހާ ވަނީ ފުލުހެއްގެ މޫނު މަތީގައި ޖެހިތަން ސަންގެ ނޫސްވެރިންނަށް ފެނުނެވެ.

ރޯދަ މަހުގެ ފުރަތަމަ ދުވަހުގެ ހަވީރު ޖުމްހޫރީ މައިދާނަށް އެމްޑީޕީން މިއަދު އެއްވުމާއެކު، އެ ސަރަހައްދުގެ މަގުތަކުގެ ޓްރެފިކް ކާރުބާރުބޮޑުވެގެންދިޔަ އެވެ. އެމްޑީޕީގެ ސަޕޯޓަރުން ޖުމްހޫރީ މައިދާނުން ދުރަށް ޖައްސާލިއިރު ރޯދަވީއްލަން 15 ވަރަކަށް މިނިޓް ހުއްޓެވެ.