އެފްއޭއެމް/ އިންތިހާބު:
ހޫނުވެ ކުރިއަށް ނުގެންދެވިގެން އެފްއޭއެމްގެ އިންތިހާބު ވަކި ތާރީހެއް ނެތި ފަސްކޮށްފި

ބުލޮގު ޚުލާސާ

*** އެފްއޭއެމްގެ އިންތިހާބު ފެށުމާއެކު މައްސަލަ ހޫނުވެ އިންތިހާބީ ހަރަކާތްތައް މެދު ކަނޑައިލައިފި އެވެ. މައްސަލަ އުފެދުނީ އިއްޔެ ކޯޓުން ނެރުނު އަމުރާ ގުޅިގެން ޔުނައިޓެޑް ވިކްޓަރީއަށް އިންތިހާބުގައި ވޯޓް ލެވޭނެ ތޯ ނުވަތަ ނޫންތޯ ކެންޑިޑޭޓުންގެ މެދުގައި ސުވާލުތައް އުފެދިގެނެވެ. އިންތިހާބު ހޫނުވެފައިވާއިރު އޮބްޒާވް ކުރުމަށް ފީފާއާ އޭއެފްސީގެ އޮފިޝަލުން ވެސް އެބަތިއްބެވެ.

14:12

ޒުވާންނުގެ މަރުކަޒުގައި މިއަދު ބާއްވަން ހަމަޖެއްސި އެފްއޭއެމްގެ ފަސް ވަނަ ކޮންގްރެސް ހޫނުވެ ވަކިމުއްދަތެއް ނެތި ފަސްކޮށްފި އެވެ.

މިއަދުގެ ކޮންގްރެސް ފަސްކުރަން ޖެހުނީ މިދިޔަ އަދީއްތަ ދުވަހު ސިވިލްކޯޓުން ކޯޓުން ނެރުނު އަމުރާ ގުޅިގެން ޔުނައިޓެޑް ވިކްޓަރީ އަށް އިންތިހާބުގައި ވޯޓް ލެވޭނެތޯ ނުވަތަ ނޫންތޯ ކެންޑިޑޭޓުންގެ މެދުގައި ސުވާލުތައް އުފެދި، މަސްރަހް ހޫނުވުމުގެ ސަބަބުންނެވެ. އަދި އިންތިހާބު ބާއްވާ މުއްދަތެއް ނެތި ފަސްކުރި އިރު، އިންތިހާބް އޮބްޒާވް ކުރުމަށް ފީފާއާ އޭއެފްސީގެ އޮފިޝަލުން ވެސް މިއަދުގެ ޒުވާނުންގެ މަރުކަރުގައި ތިއްބެވި އެވެ.

އެފްއޭއެމްގެ އިންތިހާބު ވަކި މުއްދަތެއް ނެތް ގޮތަށް ފަސްކުރި އިރު، އެ އިންތިހާބުގައި މިހާރުގެ ރައީސް އަލީ އާޒިމްއާ ވަދަކުރެއް ވުމަށް، ވީބީ އައްޑޫ އެފްސީގެ ޓިކެޓްގައި ނުކުތް، ރައްޔިތުންގެ މަޖިލީހުގެ ގެމަނަފުށީ ދާއިރާގެ މެންބަރު އިލްހާމް ވަނީ އިންތިހާބުގައި ވޯޓް ލުމަށް ބަހައްޓާފައި ހުރި ވޯޓް ފޮށި ބިންމައްޗަށް ވައްޓާލައި ހަލާކު ކޮށްލާފަ އެވެ. އަދި އިލްހާމް، ވޯޓްފޮށި ބަހައްޓާފައި ހުރި ސްޓޭންޑްގައި ފައިން ޖެހިތަން ސަންގެ ނޫސްވެރިންނަށް ވަނީ ފެނިފަ އެވެ.

ޔުނައިޓެޑް ވިކްޓަރީއަށް ވޯޓް ނުލެވި، މިއަދުގެ އިންތިހާބު ވެސް ނުބޭއްވި އިންތިހާބު ވަކި މުއްދަތަކަށް ފަސްކުރި އިރު، ރައީސްގެ މަގާމަށް ވާދަކުރައްވައިފައިވާ އިލްހާމް އަހުމަދަށް ތާއީދުކުރައްވާ ފަރާތްތަކުން ވަނީ މިހާރުގެ ރައީސް އަލީ އާޒިމްގެ އިސްތިއުފާއަށް ގޮވާ މުޅިތަނުގެ މަސްލަހަތު ވެސް ނަގާލައިފަ އެވެ. އަދި އެވަގުތު ނަތަނުގެ ސެކިއުރިޓީ ބަލަހައްޓަން ތިބި މީހުންނަށް ހުރަސްއަޅާ، އިލްހާމް އަށް ތާއިދު ކުރާބަޔަކު ފާސްނެތި، އެތަނުގެ ތެރެއަށް ވަދެ، އަޑު ގަދަ ކުރަން ފެށުމުން ފުލުހުން ވެސް ވަނީ އެތަނަށް އައިސްފަ އެވެ.

އެފްއޭއެމްގެ މިހާރުގެ ރައީސް އަލީ އާޒިމް ވިދާޅުވީ، އިންތިހާބު ނުބޭއްވި ފަސްކުރަން ޖެހުނީ ތަނުގެ މަސްލަހަތު ނަގާލުމަށް ބަޔަކު މަސައްކަތްތަކެއް ކުރުމުން ކަމަށެވެ. އަދި އެވަގުތު އިންތިހާބު ބާއްވަން ނިންމި ނަމަ މިނިވަން އިންސާފްވެރި ކަމާ އެކު އިންތިހާބު ކުރިއަށް ނުގެން ދެވޭނެ ކަމަށް ވެސް އާޒިމް ވިދާޅުވި އެވެ. އަދި އިންތިހާބަށް ސަރުކާރުގެ ނުފޫޒް ވަދެފައިވާ ކަަމަށް ވެސް އާޒިމް ވަނީ ވިދާޅުވެފަ އެވެ.

އެފްއޭއެމްގެ ޖެނެރަލް ސެކްރެޓަރީ ޝާހް އިސްމާއިލް ވިދާޅުވީ، މިއަދުގެ އިންތިހާބު ފެށުމާ އެކު ތަނުގެ މަސްލަހަތު ގޯސްވެ، އެ މައްސަލައިގައި ވާހަކަދައްކައިގެން ގޮތެއް ނުނިމުން، ކޮންގްރެސް ފެށުން އެއް ގަޑިއިރަށް މެދުކަނޑާލި ނަމަވެސް، ދެ ވަނަ ފަހަރަށް ވެސް އިންތިހާބު ކުރިއަށް ނުގެންދެވުނީ ވަކި ބައެއްގެ ނުފޫޒްތަކެއް އިންތިހާބަށް ފޯރު ކުރުވަފައި ވާތީ އެވެ.

މިއަދުގެ ކޮންގްރެސްގައި ކުރިއަށް ގެންދިއުމަށް ނިންމާފައި ވަނީ، ކުރިއަށް އޮތް ހަތަރު އަހަރަށް އެފްއޭއެމްގެ ރައީސާއި ނައިބް ރައީސް އަދި އެގްޒެކެޓިވް ކޮމެޓީއަށް މެމްބަރުން އިންތިހާބުކުރުމުގެ އިތުރުން މިދިޔަ އަހަރުގެ އަހަރީ ރިޕޯޓާއި ބަޖެޓް ފާސްކުރުމެވެ.