20 Dec 2024, 11:31
ބޮލީވުޑްގެ އެކްޓަރު/ފިލްމު ޑައިރެކްޓަރު ފަރުހާން އަޚްތަރު ލީޑް ރޯލް ކުޅޭ ފިލްމު "120 ބަހާދުރު" އަންނަ އަހަރުގެ ނޮވެމްބަރު މަހު 21 ވަނަ ދުވަހު ސިނަމާތަކަށް ގެންނަން ނިންމައިފިއެވެ.
މި ފިލްމަކީ ފަރުހާންގެ އަމިއްލަ ފިލްމު ކުންފުނި އެކްސެލް އެންޓަޓެއިންމަންޓް އާއި ހެޕީ ސްޓޫޑިއޯ ގުޅިގެން ގެނެސްދޭ ފިލްމެކެވެ. މި އަހަރުގެ ސެޕްޓެމްބަރު މަހު މަސައްކަތް ފަށާފައިވާ މި ފިލްމުން ފަރުހާން ފެންނާނީ ވަރަށް ހިތްވަރުގަދަ އަސްކަރީ އޮފިސަރެއްގެ ރޯލްއިންނެވެ.
މި ފިލްމަކީ، އިންޑިއާ އާއި ޗައިނާއާ ދެމެދު 1962ވަނަ އަހަރުތެރޭ ކުރެވުނު ރެޒާންގް ލާ ހަނގުރާމައިގެ ހާދިސާއަށް ބިނާކޮށް އުފައްދާފައިވާ ފިލްމެކެވެ. ފިލްމުގައި ފަރުހާން ކުޅެފައި ވަނީ އިންޑިއާގެ 120 އޮފިސަރުން ޗައިނާގެ ބާރުގަދަ 3000 ސިފައިންނާ ދެކޮޅަށް ކުރި ހަނގުރާމައިގައި އިންޑިއާގެ އަސްކަރިއްޔާގެ ލީޑަރަކަށް ހުރި މޭޖާ ޝައިތާން ސިންގް ބާޓީގެ ރޯލެވެ.
ފަރުހާން އަދި ބަތަލާ ސޯނަމް ކަޕޫރު ފިލްމު "ބާގް މިކާ ބާގް"ގެ މަންޒަރެއްގައި--ފޮޓޯ/ބޮލީވުޑްހަންގާމާ
ކާމިޔާބު ފިލްމުތައް ޑައިރެކްޓްކޮށްފައިވާ ފަރުހާން އެންމެފަހުން ބެލުންތެރިންނަށް ފެނިފައި ވަނީ 2021 ވަނަ އަހަރު ރިލީޒްވި ފިލްމު "ޠޫފާން"އިންނެވެ. ފަރުހާން އާ ފިލްމެއްގެ މަސައްކަތް ފެށިއިރު 2021 ވަނަ އަހަރު އޭނާ ވަނީ "ޖީ ލޭ ޒަރާ"ގެ ނަމުގައި ފިލްމެއް އުފައްދަން ނިންމިކަން އިއުލާނުކޮށްފައެވެ.
މީގެ އިތުރުން ފަރުހާންގެ މަގުބޫލު ފްރެންޗައިސް "ޑޮން"ގެ ތިން ވަނަ ފިލްމުގެ މަސައްކަތް ވަރަށް އަވަހަށް ފަށާނެކަން ފަރުހާން ވަނީ އިއުލާނުކޮށްފައެވެ. ފަރުހާނު ޑައިރެކްޓްކޮށް ބޮޑު ކާމިޔާބީއެއް ހޯދި ފިލްމުތަކުގެ ތެރޭ "ޑޮން" އަދި ފިލްމު "ދިލް ޗަހަތާ ހޭ" ހިމެނެއެވެ.