20 Dec 2024, 13:30
ކަރަބާއޯ ކަޕްގެ ސެމީފައިނަލްއިން ޓޮޓްނަމް ހޮޓްސްޕާސް ޖާގަ ހޯދައިފިއެވެ.
މި މުބާރާތުގެ ސެމީ ފައިނަލްގެ ޖާގައެއް ސްޕާސް ހޯދާފައި މި ވަނީ ކްއާޓާ ފައިނަލްގައި މެންޗެސްޓާ ޔުނައިޓެޑާއި ބައްދަލުކުރި މެޗު ހަތަރު ލަނޑު ތިން ލަނޑުން ކާމިޔާބު ކޮށްގެންނެވެ.
މި މެޗު ވެގެންދިޔައީ ދެ ޓީމުގެ ކީޕަރުންނަށް ވެސް ގިނަ ގޯސްތަކެއް ހެދިގެންދިޔަތަން ފެނިގެންދިޔަ މެޗަކަށެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޔުނައިޓެޑުންނެވެ.
މި މެޗުގެ ފުރަތަމަ ލަނޑު މެޗުގެ 15 ވަނަ މިނެޓުގައި ޔުނައިޓެޑްގެ ކީޕަރުކަން މި މެޗުގައި ކުރަމުންދިޔަ އަލްޓޭ ބަޔިންޑާއަށް ހެދުނު ގޯހެއްގެ ފައިދާ ނަގާ ސްޕާސްއިން ކާމިޔާބުކޮށް މެޗުގެ ލީޑު ނެގިއެވެ. މި ލަނޑު އެ ޓީމަށް ކާމިޔާބު ކޮށްދިނީ ޑޮމިނިކް ސޮލާންކީއެވެ. މި މެޗުގެ ފުރަތަމަ ހާފުގައި އިތުރު ލަނޑެއް ފެނިގެން ނުދިޔަ ނަމަވެސް ލަނޑު ޖަހާނެ ރަނގަޅު ފުރުސަތު ދެ ޓީމަށް ވެސް ލިބިގެންދިޔައެވެ.
މި މެޗުގެ ފޯރި ގަދަވެގެންދިޔަތަން ފެނިގެންދިޔައީ ދެވަނަ ހާފުގައެވެ. މިގޮތުން ދެވަނަ ހާފުގެ ކުޅުން ފެށުނުތާ އެއް މިނެޓްގެ ތެރޭގައި ޑެޔާން ކުލުސޭވްސްކީ ލަނޑެއް ޖަހާ ސްޕާސްގެ ލީޑު ފުޅާކޮށްދިން އިރު ސޮލަންކީވަނީ 54 ވަނަ މިނެޓްގައި ސްޕާސްގެ ތިން ވަނަ ލަނޑު ކާމިޔާބުކޮށްދީފައެވެ.
މި މެޗުގައި ޔުނައިޓެޑުން ކާމިޔާބުކުރި ފުރަތަމަ ލަނޑު މެޗުގެ 63 ވަނަ މިނެޓުގައި ސްޕާސްގެ ކީޕާ ފްރޭސާ ފޮސްޓާއަށް ހެދުނު ގޯހެއްގެ ފައިދާ ނަގާ ކާމިޔާބު ކޮށްދީފައިވަނީ ބަދަލު ކުޅުންތެރިޔާ ޖޯޝުއާ ޒާކްޒީއެވެ. އަދި މީގެ ހަތް މިނެޓް ފަހުން ސްޕާސްގެ ކީޕާއަށް ހެދުނު އިތުރު ގޯހަކާ އެކު އަމަޑް ޑިއާލޯ ޔުނައިޓެޑްގެ ދެވަނަ ލަނޑު ކާމިޔާބު ކޮށްދީ މެޗުގެ ފޯރި އިތުރަށް ގަދަކޮށްދިނެވެ.
ނަމަވެސް ޔުނައިޓެޑުން މެޗުގެ ނަތީޖާ އެއްވަރު ކުރުމުގެ ބަދަލުގައި މެޗުގެ 88 ވަނަ މިނެޓުގައި ފެނިގެންދިޔައީ ސްޕާސްގެ ކެޕްޓަން ސޮން ހެއުން މިން ލަނޑެއް ޖަހާ އެ ޓީމުގެ ހަތަރު ވަނަ ލަނޑު ކާމިޔާބު ކޮށްދިން ތަނެވެ. މި މެޗުގައި ޔުނައިޓެޑްގެ ފަހު ލަނޑު މެޗުގެ އިތުރު ވަގުތުގެ ހަތަރު ވަނަ މިނެޓުގައި ކާމިޔާބު ކޮށްދިނީ ޖެނޯ އިވާންސްއެވެ. މި ލަނޑު ވެސް ކާމިޔާބު ކޮށްފައިވަނީ ފޮސްޓާއަށް ހެދުނު ގޯހަކުންނެވެ.
މި ކާމިޔާބީއާއެކު ސްޕާސް މިހާރު މި ވަނީ މި މުބާރާތުގެ ސެމީފައިނަލުން ޖާގައެއް ކަށާވަރުކޮށް މި ސީޒަންގައި ތައްޓަކާއެކު ނިންމާލުމަށް އެ ޓީމުގެ ކޯޗު އެންގާ ޕޮސްޓެކޮގްލޫ ކުރާ އުންމީދު ދަމަހައްޓާފައެވެ. ސެމީ ފައިނަލްގައި ސްޕާސް ބައްދަލުކުރުމަށް ހަމަޖެހިފައިވަނީ އެންމެ ފަހުގެ ޗެމްޕިއަން ލިވަޕޫލް އާއެވެ. އަދި ދެވަނަ ސެމީފައިނަލް މެޗުގައި ބައްދަލުކުރާނީ އާސެނަލް އާއި ނިއުކާސްލް ޔުނައިޓެޑްއެވެ.
މި މުބާރާތުގެ ސެމީފައިނަލްގެ ފުރަތަމަ ލެގުގެ ދެ މެޗު ޖެނުއަރީ ފުރަތަމަ ހަފުތާގައި ކުޅުމަށް ހަމަޖެހިފައިވާއިރު ދެވަނަ ލެގު ކުޅުމަށް ހަމަޖެހިފައިވަނީ ފެބްރުއަރީ މަހުގެ ފުރަތަމަ ހަފުތާގައެވެ. އަދި ފައިނަލް މެޗު އޮންނާނީ މާޗް މަހުގެ 16 ވަނަ ދުވަހު ވެމްބްލީ ސްޓޭޑިއަމްގައެވެ.