މިދިޔަ އާދީއްތަ ދުވަހު، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ވަނީ "ސީދާ ކުއްލި ހަރަކާތުގެ" ނަމުގައި ދެމިގެންވާ މުޒާހަރާއެއް ފަށައިފަ އެވެ. ރާއްޖޭގެ ވެރިކަން ބަދަލުވީ ގޮތާ މެދު އެހާ ސާފުކޮށް ގޮތެއް ކަނޑައަޅާފައި ނުވާ، އެމެރިކާގެ މިނިވަން ދުވަސް ފާހަގަ ކުރުމަށް ޓްރޭޑާސް ހޮޓަލުގައި ބޭއްވި ހަފުލާއެއް ކުރިއަށް ދިޔަ ވަގުތު ފެށި އެ މުޒާހަރާ ކުރިއަށް ދިޔަ އިރު އެމެރިކާ އިން ރާއްޖެ އަށާއި ސްރީލަންކާއަށް ކަނޑައަޅާފައިވާ ސަފީރު ޕެޓްރީސިއާ އޭ ބޫޓެނިސް ވެސް ހުންނެވީ އެހަފުލާގައި، ޓްރޭޑާސް ހޮޓަލުގަ އެވެ.

އެ ދުވަހު "އިންތިހާބު އަވަސްކުރޭ،" ގޮަވަމުން އެމްޑީޕީން ފެށި އެމުޒާހަރާ އަދި ނިމާލިކަން އަދި އެމްޑީޕީއަކުން އިއުލާންކޮށްފައެއް ނުވެ އެވެ.

މުޒާހަރާ ރޭ ވެސް ކުރިއަށް ގެންދިޔައީ އެމްއެމްއޭ ސަރަހައްދާއި ޗާންދަނީމަގާއި އޯކިޑްމަގު ގުޅުނު ހިސާބު ރީފް ސައިޑް ކުރިމަތީގަ އެވެ. އެ ދެ ތަނުގައި ވެސް އަމަން ބެލެހެއްޓުމަށް ހަރަކާތްތެރިވަމުން ދިޔައީ ނިސްބަތުން މަދު ފުލުހުންތަކެކެވެ.

ނަމަވެސް ރޭ ފެނުނު އެންމެ ހައިރާންކުރުވަނިވި އެއް ކަމަކީ މުޒާހަރާގައި ބައިވެރިވެވަޑަގެންނެވުމަށް ކުރީގެ ރައީސް މުހައްމަދު ނަޝީދު މުޒާހަރާ ތެރެއަށް ވަޑަގެންނެވުމުން ހިނގާ ދިޔަ ހާދިސާތަކެވެ. އެގޮތުން ރައީސް ނަޝީދު ވަޑައިގެން ޗާނދަނީ މަގުގެ ސްވެނިއަ ޝޮޕްތައް ކައިރީ ތިބި އެމްޑީޕީގެ ސަޕޯޓަރުންގެ ތެރެއަށް ވެދެވަޑައިގެންނެވިތާ ކުޑަ އިރުކޮޅެއްގެ ތެރޭގައި އިތުރު ފުލުހުން އެސަރަހައްދަށް އައެވެ. އަދި އެއްވެސް އިންޒާރެއް ނުދީ، ފުލުހުންގެ އެ ފައުޖުން މުޒާހަރާގެ ބައިވެރިންނާ ކުރިމަތިލައި، ބައެއް މީހުން ހައްޔަރުކުރަން މަސައްކަތް ކުރަން ފެށުމުން ދެން ފެނުނީ ދެފަރާތުގެ ދެމެދުގައި ވަރުގަދަ ހަމަނުޖެހުން ހިނގިތަނެވެ.

އިއްޔެގެ ދުވާލުގެ ވަގުތުތަކުގައި ބައެއް ނޫސްވެރިންނަށް ހުރަސް އެޅި ނަމަވެސް ރޭ، އެފަދަ ކަމެއް ކުރިމަތި ނުވާތީ، ތަޅާފޮޅުމުގެ މެދަށް އަޅުގަނޑަށް ވަދެވުނެވެ. ބައެއް އާންމުން ބިންމައްޗަށް ވެއްޓިފައި ތިބިތަން ފެނުނު އިރު ބައެއް ފުލުހުން ވެސް ވެއްޓުނުތަން ފެނުނެވެ. ބޮޑަށް އަނިޔާވީ ކޮން ބަޔަކަށް ކަން އޭރު ނޭނގުނު ނަމަވެސް، ފަހުން އެނގުނީ ދެ ފަރާތަށް ވެސް ބޮޑެތި އަނިޔާތައްވީ ކަމެވެ.

މެންދަމުން އަލިވެ، ތިނެއް ވެސް ޖެހި ފަހުން ހޮސްޕިޓަލަށް ދިޔަ އިރު އެތަނުގައި އާއްމުންގެ ތެރެއިން ހާލު ދެރަ އެެކަކު އޮތެވެ. އިންދިރާ ގާންދީ މެމޯރިއަލް ހޮސްޕިޓަލުގެ އިމަޖެންސީ ރޫމްގައި އޮތް އެމީހާއާ ބެހޭ ގޮތުން ޑޮކްޓަރެއްގެ ބަހެއް ލިބޭ ގޮތް އެވަގުތު ނުވި ނަމަވެސް އޭނާގެ އާއިލާ އިން ބުނީ އޭނާ އަށް ބޮޑެތި އަނިޔާތައް ލިބިފައިވާ ކަމަށެވެ. އަދި ފުލުހެއްގެ މޫނު މައްޗަށް ބޮޑެތި ޒަހަމްތަކެއް ލިބިފައިވާތީ އިތުރަށް ފަރުވާ ދޭން، ރާއްޖޭން ބޭރަށް ގެންދަން ޖެހޭ ކަމަށް ފުލުހުން ވެސް އޭރު ބުނެފަ އެވެ. ފުލުހުން ބުނީ އޭނާ އަށް އަނިޔާވީ މުޒާހަރާ ކުރި މީހުން އެއްލި ގަލަކުން އޭނާގެ މޫނުމަތީގައި ޖެހިގެން ކަމަށެވެ.

ސީދާ ހަރަކާތް ނިންމާލިކަން އެމްޑީޕީން އިއުލާންކޮށްފައި ނުވާ އިރު ދެ ފަރާތުން ވެސް ބައެއް މީހުން ވަނީ ސީދާ ހޮސްޕިޓަލަށް ގެންދަން ޖެހިފަ އެވެ.

އާންމުންނާއި ފުލުހުންގެ ކުރިމަތިލުންތަކެއް ހިނގައިފި އެވެ. ފުލުހުން ވަނީ ކުއްލިއަކަށް މުޒާހަރާގެ ބައިވެރިންގެ ތެރެއަށް ވަދެގެންފަ އެވެ.

ކުރީގެ ރައީސް މުހައްމަދު ނަޝީދު، އެމްޑީޕީ އިން ބާއްވަމުން އަންނަ "ސީދާ ކުއްލި ހަރަކާތާ" ދެންމެ ގުޅިވަޑައިގެންފި އެވެ. އަދި އެ ތަނުން މީހަކު ވެސް ފުލުހުން ހައްޔަރުކޮށްފި.

މަޖިލިސް މެންބަރު އިބްރާހިމް ރަޝީދު (ބޮންޑާ) ފުލުހުން ދެންމެ ހައްޔަރުކޮށްފި. މުޒާހަރާގެ ތެރެއަށް ވަނީ ޕެޕާސްޕްރޭވެސް ޖަހާފައި.

އެމްޑީޕީ މެންބަރުން އަދިވެސް އަންނަނީ އެ ސަރަހައްދުގައި ތިބެ ސަރުކާރާއި ދެކޮޅަށް އަޑު އުފުލަމުން. ފުލުހުން މިއަދުގެ މުޒާހަރާ ކޮންޓްރޯލް ކުރުމުގައި ހަރަކާތްތެރިވަނީ އެހެން ދުވަސް ދުވަހާ ހިލާފަށް އަނިޔާވެރިކޮށް. ރާއްޖެ ޓީވީގެ ނޫސްވެރިޔަކުވެސް ދެންމެ ވަނީ ހައްޔަރުކޮށްފައި.

ގިނަ އަދަދެއްގެ ފުލުހުން އައިސް ސީދާ ހަރަކާތުގެ ބައިވެެރިން ފަހަތަށް ޖައްސަން ފަށައިފި.

ނޫސްވެރިންވެސް ވަނީ ފުލުހުންގެ ބެރިކޭޑްތަކުން ބޭރަށް ނެރެފައި. ފުލުުހުންނާއި ދިމާކޮށް ހަމަނުޖެހުން ހިންގަން މަސައްކަތް ކުރާ މީހުން އަންނަނީ ހައްޔަރުކުރަމުން.