19 Dec 2024, 21:38
ބިންވެރިޔާ ސްކީމުން ގޯތި ހައްގު ނޫން ބަޔަކަށް ގޯތި ދިން ކަމަށް ތުހުމަތު ކުރެވޭ މައްސަލައިގައި ހިންގާ ތަހުގީގާ ގުޅޭ ހެކިތަކެއް ހައުސިން ޑެވެލޮޕްމެންޓް ކޯޕަރޭޝަން (އެޗްޑީސީ)އިން ނައްތާލި ކަމަށް މިހާތަނަށް ފާހަގަނުވާ ކަމަށާއި، ތިން މިނިސްޓްރީއެއް ހިންގަމުންދިޔަ އިމާރާތުގައި މިދިޔަ ހަފުތާގައި ހިނގި އަލިފާނުގެ ހާދިސާއާ އެ މައްސަލައާ ގުޅުވެސް ނެތް ކަމަށް ފުލުހުން ބުނެފިއެވެ.
ފުލުހުން އެހެން ބުނީ، އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑީއެމްޑީ މުހައްމަދު ފަޒީލް ރަޝީދު ހިމެނޭ ގޮތަށް ނުހައްގުން ގޯތި ދިން ކަމަށް ތުހުމަތުވާ މައްސަލައިގައި ފަށައިފައިވާ ޖިނާއީ ތަހުގީގާ ގުޅޭ ގޮތުން މައުލޫމާތު ދިނުމަށް ފުލުހުން ބޭއްވި ނޫސްވެރިންގެ ބައްދަލުވުމެއްގައެވެ.
އެ މައްސަލައިގައި ސޯޝަލް މީޑިއާގައި ކުރާ ބައެއް ތުހުމަތުތަކުގެ ތެރޭގައި، ހައުސިން މިނިސްޓްރީ ހިންގަމުންދިޔަ އިމާރާތުގައި ރޯވި ހާދިސާއަކީ، ބިންވެރިޔާ ސްކީމާ ގުޅޭ ކޮރަޕްޝަނުގެ އަމަލުތަކެއް ފޮރުވުމަށް ގަސްތުގައި ރޯކޮށްލި ހާދިސާއެއް ކަމަށް ބުނާ ތުހުމަތުތަކެއް ހިމެނެއެވެ.
މީގެ އިތުރުން ގޯތިތައް ނުހައްގުން ދޫކުރީ، ހުޅުމާލެ ބަލަހައްޓާ އެޗްޑީސީން ކަމަށާއި މި މައްސަލައިގެ ތަހުގީގު ފެށުމުން އެ ކުންފުނިން ހެކި ނައްތާލަން މަސައްކަތް ކުރި ކަމަށް ވެސް ތުހުމަތުކޮށްފައިވެއެވެ.
އެ ތުހުމަތުތަކާ ގުޅޭ ގޮތުން ނޫސްވެރިން ކުރި ސުވާލަށް ޖަވާބު ދެއްވައި އެސިޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވީ، އަލިފާނުގެ ހާދިސާއާ އެޗްޑީސީއާ މިހާތަނަށް ގުޅުވޭކަށް ނެތް ކަމަށެވެ.
"އަދި އަޅުގަނޑުމެން ބޭނުންވާ ޑޮކިއުމެންޓެއް ހޯދުމަށް ޓަކައި ކުރާ މަސައްކަތުގެ ތެރޭގައި އަދި އެކަމާ ގުޅިގެން ޑޮކިއުމެންޓެއް ނުލިބޭނެ ކަމަށް ވެސް އަދި ފާހަގަ ކުރެވިފައެއް ނެތް،" އޭނާ ވިދާޅުވިއެވެ.
މީގެ އިތުރުން އެޗްޑީސީން ހެކި ނައްތާލުމުގެ އެއްވެސް ކަމެއް ވެސް މިހާތަނަށް ފާހަގަވެފައި ނުވާ ކަމަށް ޝަރީފް ވިދާޅުވިއެވެ.
"އަޅުގަނޑުމެން މިހާ ހިސާބަށް ބޭނުންވި ހުރިހާ މައުލޫމާތެއް ވަނީ ލިބިފައި،" އޭނާ ވިދާޅުވިއެވެ.
ފާހަގަކޮށްލެވޭ ގޮތުގައި، އިއްޔެ ފުލުހުން ވަނީ، ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް އެޗްޑީސީން ގޯތިތަކެއް ދީފައިވާ ކަމަށް ބެލެވޭ މައްސަލައެއްގައި ޖިނާއީ ތަހުގީގެއް ހިންގަމުން އަންނަ ކަމަށް ބުނެ، އެޗްޑީސީއަށް ވަދެ ބަލައި ފާސްކޮށްފައެވެ.
މީގެ އިތުރުން އެ މައްސަލައިގެ ތަހުގީގު ކުރިއަށްގެންދާނެ ގޮތާ ގުޅޭ ގޮތުން މިއަދު ޕޮލިސް ކޮމިޝަނަރު އަލީ ޝުޖާއު، އެންޓި ކޮރަޕްޝަން ކޮމިޝަން (އޭސީސީ)އާ ބައްދަލުކުރައްވައި މަޝްވަރާތައް ކުރައްވައިފައިވެއެވެ.
އެ މައްސަލައިގައި ޕްރޮސެކިއުޓާ ޖެނެރަލް އައްބާސް ޝަރީފް ވަނީ، ބިންވެރިޔާގެ އިތުރުން ގެދޮރުވެރިޔާގެ މައްސަލައިގެ ވެސް އަވަސް ތަހުގީގެއް ހިންގައި، އެކަމާ ގުޅޭ މައުލޫމާތު ކޮންމެ ހަފުތާއަކު އެއް ފަހަރު ހިއްސާކުރުމަށް އަމުރު ކުރައްވައިފައެވެ.