19 Dec 2024, 13:48
ކަރަބާއޯ ކަޕްގެ ކުއާޓާ ފައިނަލްގައި އާސެނަލް އާއި ކްރިސްޓަލް ޕެލަސް ބައްދަލުކުރި މެޗު އާސެނަލްއިން ކާމިޔާބުކޮށް މިމުބާރާތުގެ ސެމީފައިނަލުން ޖާގަހޯދައިފިއެވެ.
އާސެނަލްގެ ދަނޑުގައި ކުޅުނު އެ މެޗު އެ ޓީމުން ކާމިޔާބު ކޮށްފައިވަނީ ފަހަތުން އަރައި 3-2 ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނުނު މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ އާސެނަލް އިންނެވެ. ނަމަވެސް މިއާއެކުވެސް މެޗުގެ ފެށުން ރަނގަޅުވީ ޕެލަސްގެއެވެ. މިގޮތުން މެޗުގެ ހަތަރު ވަނަ މިނެޓުގައި އުފެއްދި ހަމަލާއެއްގައި ޕެލަސްއިން ވަނީ މެޗުގެ ލީޑު ނަގައިފައެވެ. މިލަނޑު އެޓީމަށް ކާމިޔާބު ކޮށްދިނީ ޖޮން ފިލީޕޭ މަޓޭޓާއެވެ.
މިމެޗުގެ ފުރަތަމަ ހާފުގައި އިތުރު ލަނޑެއް ނުފެނުނު ނަމަވެސް ލަނޑު ޖަހާނެ ރަނގަޅު ފުރުސަތު ދެޓީމަށްވެސް ލިބުނެވެ. މިމެޗުގައި އާސެނަލްގެ ފުރަތަމަ ލަނޑު ކާމިޔާބު ކޮށްދީ އެޓީމަށް މެޗުގެ ނަތީޖާ ހަމަހަމަ ކޮށްދިނީ މެޗުގެ 54 ވަނަ މިނެޓުގައި ގެބްރިއެލް ޖޭސުސް ކާމިޔާބު ކޮށްދިން ލަނޑުންނެވެ. އަދި މެޗުގެ 73 ވަނަ މިނެޓުގައި ޖޭސުސް ކާމިޔާބު ކޮށްދިން ދެވަނަ ލަނޑާއެކު އޭނާ އާސެނަލަށް މެޗުގެ ލީޑު ނަގައިދިން އިރު މެޗުގެ 81 ވަނަ މިނެޓުގައި ކާމިޔާބުކުރި ލަނޑާއެކު އޭނާ ވަނީ މިމެޗުގައި ހެޓްރިކެއްވެސް ފުރިހަމަ ކޮށްފައެވެ.
މިމެޗުގައި ޕެލަސްގެ ދެވަނަ ލަނޑު މެޗުގެ 85 ވަނަ މިނެޓުގައި ކާމިޔާބު ކޮށްދިނީ އެޑީ އެންކެޓިއާއެވެ. މިލަނޑާއެކު ނަތީޖާ އެއްވަރު ކުރެވޭތޯ ޕެލަސްއިން މަސައްކަތް ކުރި ނަމަވެސް އެކަން ކާމިޔާބު ކުރެވޭގޮތެއް ނުވިއެވެ.