16 Dec 2024, 12:48
އިންގްލިޝް ޕްރިމިއާ ލީގުގައި އެންމެ ފަހުގެ ޗެމްޕިއަން މެންޗެސްޓާ ސިޓީއާ ވާދަވެރި މެންޗެސްޓާ ޔުނައިޓެޑް ބައްދަލުކުރި މެޗު ފަހަތުން އަރާ ޔުނައިޓެޑް ކާމިޔާބު ކޮށްފިއެވެ.
ސިޓީގެ ދަނޑުގައި ކުޅުނު މެންޗެސްޓާ ޑާބީގެ ގޮތުގައި މަޝްހޫރުވެފައިވާ މިމެޗު ޔުނައިޓެޑުން ކާމިޔާބު ކޮށްފައި ވަނީ ދެ ލަނޑު އެއް ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ސިޓީން ބޯޅަ ގެންގުޅުން ނަމަވެސް ހަމަލާ އުފައްދާފައި ވަނީ ދެޓީމަށް ވެސް ހަމަހަމަ ކޮށެވެ.
ދެޓިމުގެ ފަރާތުންވެސް މެޗުގެ ކުރީކޮޅު މާރަނގަޅު ހަމަލާތަކެއް އުފެއްދިތަނެއް ފެނިގެން ގޮސްފައެއް ނުވެއެވެ. މިމެޗުގެ ފުރަތަމަ ލަނޑު މެޗުގެ 36ވަނަ މިނެޓުގައި ލިބުނު ކޯނަރަކުން ކާމިޔާބުކޮށް ލީޑު ނަގާފައި ވަނީ ސިޓީންނެވެ. މިލަނޑު އެޓީމަށް ކާމިޔާބު ކޮށްދިނީ ޖޮސްކޯ ގުވަޑިއޯލްއެވެ. މިލަނޑާއެކު ސިޓީން ކޮންމެވެސް ވަރަކަށް ހަމަޖެހިލި ތަން ފެނުނެވެ.
މިމެޗުގެ ދެވަނަ ހާފުގައި ސިޓީ ފެނިގެންދިޔައީ ލިބުން ލީޑާމެދު ހިތްހަމަ ޖެހި އެލީޑު ދިފާއު ކުރުމަށް މަސައްކަތް ކުރަމުންދިޔަ ތަނެވެ. އަދި ޔުނައިޓެޑުން ހަމަލާ އުފެއްދޭތޯ މަސައްކަތް ކުރި ނަމަވެސް ސިޓީގެ ޑިފެންސް ފޫއަޅުވާލުމުގައި މާބޮޑު ކުރިއެރުމެއް ލިބިގެން ދިޔަތަނެއް ނުފެނުނެވެ.
މިހާފުގައި ޔުނައިޓެޑަށް ލަނޑެއް ޖެހުމާ އެންމެ ގާތަށް ދިޔައީ މެޗު ނިމެން 17 މިނެޓަށް ވެފައި ވަނިކޮށް ކެޕްޓަން ބްރޫނޯ ފެނާންޑޭޒްއަށް ލިބުން ހުސް ފުރުސަތުންނެވެ. ނަމަވެސް އޭނާ ފޮނުވާލި ހަމަލާ ދިޔައީ ގޯލާ އަމާޒުނުވެ ބޭރަށެވެ. މިއާއެކު މިމެޗުން ސިޓީ މޮޅުވެދާނެކަމަށް ގިނަ ބަޔަކަށް ހީވެގެންދިޔައެވެ.
މިމެޗުގެ އޮވެވަރު ބަދަލުވީ މެޗު ނިމެން ދެ މިނެޓަށް ވެފައި ވަނިކޮށް ސިޓީގެ މެތިއަސް ނޫނޭސް އަށް ހެދުނު ބޮޑު ދެ ގޯހަކާ ގުޅިގެންނެވެ.
ޕެނަލްޓީއެއްގެ ސަބަބުން ޔުނައިޓެޑަށް ލިބުނު ފުރުސަތުގެ ބޭނުން ހިފާ ބްރޫނޯ ފެނާންޑެޒް އެޓީމުގެ ޕެނަލްޓީ ކާމިޔާބު ކޮށް މެޗުގެ ނަތީޖާ ހަމަހަމަ ކުރިއެވެ. މިލަނޑުގެ ސަބަބުން ސިޓީއަށް ލިބިގެންދިޔަ ސިހުމުން އެޓީމު އަރައި ނުގަނެވިގެން އުޅެނިކޮށް އަނެއްކާވެސް ފެނިގެންދިޔައީ އަމަޑް އެޑަސަން ކަޓުވާލުމަށްފަހު ގޯލް ތެރެއަށް ބޯޅަ ވައްދާލައިގެން މެޗުގެ ލީޑު ޔުނައިޓެޑަށް ނަގައިދިން ތަނެވެ.
މިކާމިޔާބީއާއެކު ޔުނައިޓެޑް މިހާރު އުޅެނީ 22 ޕޮއިންޓާއެކު ތާވަލްގެ 13 ވަނައިގައެވެ. އަދި ސިޓީ އުޅެނީ 27 ޕޮއިންޓާއެކު ތާވަލްގެ ފަސް ވަނައިގައެވެ. މިނާކާމިޔާބީއާއެކު ސިޓީ މިހާރު މިވަނީ މިސީޒަންގައި ލީގުގައި ފަސް މެޗުން ބަލިވެފައެވެ.
މެޗަށްފަހު ވާހަކަ ދައްކަމުން ސިޓިގެ މެދުތެރެއަށް ކުޅޭ ބެނާޑޯ ސިލްވާ ހާމަކުރިގޮތުގައި މެޗުގެ ފަހު ދެ މިނެޓުގައި ސިޓީގެ ފަރާތުން ފެނިގެންދިޔައީ 15 އަހަރުން ދަށުގެ ޓީމެއްގެ ފަރާތުން ފެނިގެންދާ ފަދަ ކުޅުމެކެވެ.