15 Dec 2024, 12:41
ސްޕެނިޝް ލަލީގާގައި އެންމެ ފަހުގެ ޗެމްޕިއަން ރެއާލް މެޑްރިޑާއި ރާޔޯ ވަޔެކާނޯ ބައްދަލުކުރި މެޗު އެއްވަރުވެ ތާވަލްގެ އެއްވަނައަށް އެރުމަށް ރެއާލަށް ލިބުން ފުރުސަތު ނަގައިލައިފިއެވެ.
ވަޔެކާނޯގެ ދަނޑުގައި ކުޅުނު މިމެޗު ނިމުނީ ތިން ލަނޑު ތިން ލަނޑުން ދެޓީމު އެއްވަރު ވެގެންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ރެއާލުން ބޯޅަ ގެންގުޅުނު އިރު ގިނަ ހަމަލާ އުފައްދާފައިވަނީ ވަޔެކާނޯއިންނެވެ. އަދި މިމެޗުގެ ފެށުން ރަނގަޅުވީ ވެސް ވަޔެކާނޯގެއެވެ.
މިގޮތުން މެޗުގެ ހަތަރުވަނަ މިނެޓުގައި އުނާއި ލޯޕޭޒް ކާމިޔާބު ކޮށްދިން ލަނޑުން ވަޔެކާނޯއިން މެޗުގެ ލީޑު ނެގިއެވެ. އަދި މެޗުގެ 36ވަނަ މިނެޓުގައި އަބްދުލް މޫމިން ވަނީ ވަޔެކާނޯގެ ލީޑު ފުޅާކޮށްދީފައެވެ. މިމެޗުގައި ރެއާލްގެ ފުރަތަމަ ލަނޑު އެޓީމަށް ކާމިޔާބު ކޮށްދިނީ 39ވަނަ މިނެޓުގައި ފެޑެރީކޯ ވަލްވާޑޭއެވެ. އަދި ފުރަތަމަ ހާފުގެ ފަހު މިނެޓުގައި ޖޫޑް ބެލިންހަމް ކާމިޔާބު ކޮށްދިން ލަނޑާއެކު ރެއާލް އިން ފަހަތުން އަރާ މެޗުގެ ނަތީޖާ ހަމަހަމަ ކުރިއެވެ.
ދެވަނަ ހާފުގައި މެޗުގެ 56ވަނަ މިނެޓުގައި ރޮޑްރިގޯ ކާމިޔާބު ކޮށްދިން ލަނޑުން މިމެޗުގައި ފުރަތަމަ ފަހަރަށް ރެއާލް އިން ލީޑު ނެގިއެވެ. ނަމަވެސް ހިތްވަރާއެކު ވަޔެކާނޯ ކުޅެމުންދިއުމުގެ ނަތީޖާއަކަށް ވެގެންދިޔައީ މެޗުގެ 64ވަނަ މިނެޓުގައި އިސީ ޕަލަޒޯން ކާމިޔާބު ކޮށްދިން ލަނޑުން މެޗުގެ ނަތީޖާ ވަޔެކާނޯއިން އެއްވަރު ކުރިއެވެ.
މިގޮތުން މޮޅުވޭތޯ ދެޓީމުން މަސައްކަތް ކުރި ނަމަވެސް ދެޓީމުން ކުރެ އެއްވެސް ޓީމަކަށް އިތުރު ލަނޑެއް ކާމިޔާބު ކުރެވޭގޮތެއް ނުވިއެވެ. މިކާމިޔާބީއާއެކު ރެއާލް މިހާރު އުޅެނީ 17 މެޗުން ލިބިފައިވާ 37 ޕޮއިންޓާއެކު ތާވަލްގެ ދެވަނައިގައެވެ. އެއީ އެއްވަނައިގައި އުޅޭ އެފްސީ ބާސެލޯނާއަށް ވުރެ އެއް ޕޮއިންޓް ފަހަތުންނެވެ. އަދި ވަޔެކާނޯ އުޅެނީ 20 ޕޮއިންޓާއެކު ތާވަލްގެ 13ވަނައިގައެވެ.
މިމުބާރާތުގައި ސެވިއްޔާ އާއި ސެލްޓަ ވީގޯ ބައްދަލުކުރި މެޗު އެއް ލަނޑު ސުން ލަނޑުން ކާމިޔާބު ކޮށްފައި ވަނީ ސެވިއްޔާއެވެ. މިމެޗުގެ ހަމައެކަނި ލަނޑު މެޗުގެ 65ވަނަ މިނެޓުގައި ކާމިޔާބު ކޮށްދިނީ މާނޫ ބުއޭނޯއެވެ. މިކާމިޔާބީއާއެކު ސެވިއްޔާ މިހާރު އުޅެނީ 22 ޕޮއިންޓާއެކު ތާވަލްގެ 10 ވަނައިގައެވެ. އަދި ސެލްޓާ އުޅެނީ 21 ޕޮއިންޓާއެކު ތާވަލްގެ 12ވަނައިގައެވެ.