15 Dec 2024, 12:03
އިޓާލިއަން ސެރީއާގައި ނަޕޯލީ އާއި އުދިނޭސީ ބައްދަލުކުރި މެޗު ނަޕޯލީން ކާމިޔާބު ކޮށްފިއެވެ.
އުދިނޭސީގެ ދަނޑުގައި ކުޅުނު މިމެޗު ނަޕޯލީން ކާމިޔާބު ކޮށްފައިވަނީ ފަހަތުން އަރާ ތިން ލަނޑު އެއް ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައި ވަނީ ނަޕޯލީންނެވެ. މިއާއެކު ވެސް މިމެޗުގެ ފުރަތަމަ ހާފުގައި ނަޕޯލީއަށް އުދިނޭސީގެ ޑިފެންސް ފޫއަޅުވާލެވޭ ގޮތެއް ނުވިއެވެ.
އޭގެ ބަދަލުގައި ފެނިގެންދިޔައީ މެޗުގެ 22ވަނަ މިނެޓުގައި ފްލޮރިއަން ތައުވީން ކާމިޔާބު ކޮށްދިން ލަނޑާއެކު އުދިނޭސީން މެޗުގެ ލީޑު ނެގި ތަނެވެ. މިމެޗުގައި ނަޕޯލީން މެޗުގެ ނަތީޖާ ހަަމަހަމަ ކޮށްފައިވަނީ ދެވަނަ ހާފުގެ ކުޅުން ފެށިތާ ފަސްވަނަ މިނެޓުގައި ރޮމެލޫ ލުކާކޫ ކާމިޔާބު ކޮށްދިން ލަނޑުންނެވެ. އަދި މެޗުގެ 76ވަނަ މިނެޓުގައި އުދިނޭސީގެ ލައުޓާރޯ ޖިއަނޭޓީ އަތުން ބައިކޮޅަށް ވަން ލަނޑަކާއެކު ނަޕޯލީން މެޗުގެ ލީޑު ނެގިއެވެ. ނަޕޯލީން މެޗުގައި ކާމިޔާބުކުރި ފަހު ލަނޑު މެޗުގެ 81ވަނަ މިނެޓުގައި ޖަހައިދިނީ އަންޑްރޭ ފްރޭންކް ޒަމްބޯ އަންގުއިސާއެވެ.
މިކާމިޔާބީއާއެކު ނަޕޯލީ މިހާރު އުޅެނީ ކުޅުނު 16 މެޗުން ލިބިފައިވާ 35 ޕޮއިންޓާއެކު ތާވަލްގެ ދެ ވަނައިގައެވެ. އަދި އުދިނޭސީ އުޅެނީ 20 ޕޮއިންޓާއެކު ތާވަލްގެ ނުވަ ވަނައިގައެވެ. މިމުބާރާތުގައި ތާވަލުގެ އެއްވަނައިގާ އުޅޭ އެޓަލާންޓާ މިހަފުތާގައި ކުޅުނު މެޗުވަނީ ކަގްލިއާރީއާ ބައްދަލުކޮށް އެއް ލަނޑު ސުން ލަނޑުން ކާމިޔާބު ކޮށްފައެވެ. މިމެޗުގައި އެޓަލާންޓާގެ ހަމައެކަނި ލަނޑު އެޓީމަށް ކާމިޔާބު ކޮށްދިނީ މެޗުގެ 66ވަނަ މިނެޓުގައި ނިކޮލޯ ޒަނިއޯލޯއެވެ.
މިނަތީޖާ އާއެކު އެޓަލާންޓާ އެއްވަނައިގައި އުޅެނީ 37 ޕޮއިންޓާއެކުއެވެ. އަދި ދެވަނައިގާ އުޅޭ ނަޕޯލީ އާއި ދެމެދު ދެ ޕޮއިންޓްގެ ލީޑެއް އެބައޮތެވެ. ކަގްލިއާރީ އުޅެނީ 14 ޕޮއިންޓާއެކު 15ވަނައިގައެވެ.
މީގެއިތުރުން ޔުވެންޓާސް އާއި ތާވަލްގެ އެންމެ ފުލުގައި އުޅޭ ވެނެޒިއާ ބައްދަލުކުރި މެޗު ދެ ލަނޑު ދެ ލަނޑުންވީ އެއްވަރެވެ. މިމެޗުގައި ޔޫވޭއަށް 19ވަނަ މިނެޓުގައި ފެޑެރީކޯ ގާޓީ ލީޑު ނަގައިދިން އިރު މިކައިލް އެޖީލް އެލާޓްސަން އާއި ޖޭ އިޑްޒެސް ދެވަނަ ހާފުގައި ކާމިޔާބު ކޮށްދިން ދެ ލަނޑާއެކު މެޗުގެ ލީޑު އެޓީމުން ނެގިއެވެ.
މިމެޗުގެ ނަތީޖާ ޔޫވޭއަށް އެއްވަރު ކޮށްދިނީ މެޗުގެ އިތުރު ވަގުތުގެ ފަސްވަނަ މިނެޓުގައި ޔޫވޭއަށް ލިބިގެންދިޔަ ޕެނަލްޓީ އަކުން ޑުސާން ވުލަހޮވިޗްއެވެ. މިމެޗު އެއްވަރު ވުމުން ޔޫވޭ މިހާރު އުޅެނީ 28 ޕޮއިންޓާއެކު ތާވާލްގެ ހަ ވަނައިގައެވެ. އަދި ވެނެޒިއާ އުޅެނީ 10 ޕޮއިންޓާއެކު ތާވަލްގެ އެންމެ ފުލުގައެވެ.