15 Dec 2024, 08:49
ނެޓްފްލިކްސްގެ މަގުބޫލު ވެބް ސީރީސް "ޔޭ ކާލި ކާލި އާންކޭ"ގެ ތިން ވަނަ ސީޒަނެއް ގެނެސްދޭން ނިންމާފައިވާ ކަމަށް ރިޕޯޓުތައް ބުނެފިއެވެ.
މި ވެބް ސީރީސްގެ ތިން ވަނަ ސީޒަނެއް ގެނެސްދޭނެ ކަމަށް ރިޕޯޓުތަކުން ބުނެފައި މި ވަނީ ދެވަނަ ސީޒަން ރިލީޒް ކުރިތާ ތިން ހަފުތާ ވެފައި ވަނިކޮށެވެ. ޑައިރެކްޓަރު ސިދާތު ގުޕްތާ ލިޔެ ތައްޔާރު ކޮށްފައިވާ މި ފްރެންޗައިސް ވެބް ސީރީސް އަކީ ތިނެސްކަން ލޯބީގެ ވާހަކައެއްގެ މައްޗަށް ބިނާކޮށް އުފައްދަމުން އަންނަ ކްރައިމް ތުރިލާއެކެވެ.
މާ މަޝްހޫރު ނޫން ކާސްޓަކާ އެކު ގެނެސްދެމުން އަންނަ މި ވެބް ސީރީސްގެ ދެވަނަ ސީޒަން ރިލީޒް ކުރުމާ އެކު ނެޓްފްލިކްސް އިންޑިއާގެ ޓޮޕް 10 ޗާޓުން ވެސް މި ސީރީސް ވަނީ ޖާގަ ހޯދާފައެވެ.
ޓީވީ އެކްޓަރު ގުރުމީތު އަދި ބަތަލާ އާންޗަލް ވެބް ސީރީސް "ޔޭ ކާލި ކާލި އާންކޭ"ގެ މަންޒަރެއްގައި--ފޮޓޯ/ޕިންކްވިލާ
ފުރަތަމަ ސީޒަންއަށް ލިބުނު ތަރުހީބާ އެކު މި ސީރީސްގެ ދެވަނަ ސީޒަން ގެނެސްދިނީ ހަ އެޕިސޯޑުގެ މައްޗަށް ބިނާކޮށެވެ. މި ސީރީސްގެ ލީޑް އެކްޓަރު ތާހިރު ރާޖް ބާސިން މީޑިއާ ރިޕޯޓަރުންނާ ވާހަކަ ދައްކަމުން ބުނެފައި ވަނީ "ޔޭ ކާލި ކާލި އާންކޭ"ގެ ތިން ވަނަ ސީޒަންއެއް އުފައްދަން ނެޓްފްލިކްސްއިން ނިންމި ނިންމުމާ މެދު އުފާ ކުރާ ކަމަށެވެ.
ފިލްމު "މަރުދާނީ"ގައި ތާހިރު ކުޅުނު ވިލެންގެ ރޯލަށް ވަރަށް ގިނަ ބެލުންތެރިން ތައުރީފުކޮށްފައިވާއިރު "ޔޭ ކާލި ކާލި އާންކޭ"ގައި އޭނާ ކުޅޭ ރޯލަށް ވެސް ގިނަ ބައެއްގެ ތަރުހީބު އަންނަނީ ލިބެމުންނެވެ.
މި ވެބް ސީރީސްގައި ކުޅެމުން އަންނަ ރޯލަކީ ވަރަށް ޗެލެންޖިންގް ރޯލެއް ކަމަށާއި ތިން ވަނަ ސީޒަން އަދި މާބޮޑަށް ވެސް ޗެލެންޖިންގް ވާނެ ކަމަށް އެކްޓަރު ވަނީ ބުނެފައެވެ.
ތާހިރުއާ އެކު މި ސރީސްގެ ބަތަލާގެ ރޯލް ކުޅެމުން އަންނަނީ އެމޭޒަން ޕްރައިމްގެ ކާމިޔާބު ވެބް ސީރީސް "މިރުޒާޕޫރު"ގެ ބަތަލާ ޝްވޭތާ ތުރިޕާޓީ އަދި އާންޗާލް ޖީ ސިންގްއެވެ. މީގެއިތުރުން މި ވެބް ސީރީސްގެ މުހިއްމު ރޯލަކުން މަޝްހޫރު ޓެލެވިޒަން އެކްޓަރު ގުރުމީތު ޗޯދުރީ ވެސް ވަނީ ފެނިފައެވެ.