14 Dec 2024, 23:56
ޖަރުމަނު ބުންޑެސްލީގާގެ ތާވަލްގެ އެއްވަނައިގާ އުޅޭ ބަޔޭން މިޔުނިކާއި މެއިންޒް ބައްދަލުކުރި މެޗު މެއިންޒް ކާމިޔާބުކޮށްފިއެވެ.
މެއިންޒްގެ ދަނޑުގައި ކުޅުނު މި މެޗު އެޓީމު ކާމިޔާބު ކޮށްފައިވަނީ 1-2 އިންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ ބަޔޭންއިން އުފެއްދި ނަމަވެސް އެ ޓީމަށް މެއިންޒްގެ ޑިފެންސް ފޫއަޅުވާލުމުގައި މި މެޗުގައި މައްސަލަތައް ކުރިމަތިވިކަން ފާހަގަ ވެގެންދިޔައެވެ.
މި މެޗުގެ ފުރަތަމަ ލަނޑު މެޗުގެ 41 ވަނަ މިނެޓުގައި ކާމިޔާބުކޮށް މެޗުގެ ލީޑު ނަގައިފާވަނީ މެއިންޒްއެވެ. މިލަނޑު އެޓީމަށް ކާމިޔާބު ކޮށްދިނީ ލީ ޖައޭ ސުންގްއެވެ.
އަދި މި މެޗުގައި މެއިންޒްގެ ދެވަނަ ލަނޑު މެޗުގެ 60 ވަނަ މިނެޓުގައި ކާމިޔާބު ކޮށްދީފައިވަނީވެސް ޖައޭ ސުންގްއެވެ. މި މެޗުގައި ބަޔޭން އިން ކާމިޔާބުކުރި ހަމައެކަނި ލަނޑު މެޗު ނިމެން ތިން މިނެޓަށް ވެފައިވަނިކޮށް ކާމިޔާބު ކޮށްދިނީ ލިރޯއީ ސާނޭއެވެ.
މިކާމިޔާބީއާއެކު މެއިންޒް މިހާރު އުޅެނީ 22 ޕޮއިންޓާއެކު ތާވާލްގެ ހަވަނައިގައެވެ. އަދި ބަޔޭން އުޅެނީ 33 ޕޮއިންޓާއެކު އެއްވަނައިގައެވެ.