14 Dec 2024, 23:42
އިންގްލިޝް ޕްރިމިއާ ލީގުގައި އާސެނަލް އާއި އެވަޓަން ބައްދަލުކުރި މެޗު އެއްވަރުވެ ތާވަލްގެ އެއްވަނައިގާ އުޅޭ ލިވަޕޫލާއި ގާތަށް ޖެހިލުމަށް އާސެނަލް އަށް ލިބިގެންދިޔަ ފުރުސަތު ގެއްލުވާލައިފިއެވެ.
އާސެނަލްގެ ދަނޑުގައި ކުޅުނު މި މެޗުގައި ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވޭގޮތެެއްނުވިއެވެ. މެޗުގެ ބޮޑުބައި އާސެނަލް އިން ކޮންޓްރޯލް ކުރި މި މެޗުގައި އާސެނަލްއިން ހަމަލާއަށް އިސްކަން ދީގެން ކުޅުނު އިރު އެވަޓަން އިން ވަނީ ވަރަށް ވަރުގަދައަށް ޑިފެންޑްކޮށް އާސެނަލްގެ ހަމަލާތައް ލަނޑަކަށް ބަދަލުވިޔަ ނުދީ ހިފަހައްޓާލައިފައެވެ.
މި މެޗުގައި އެވަޓަން އަށް އުފެއްދިފައިވަނީ އެންމެ ދެ ހަމަލާއެވެ. ނަމަވެސް މީގެތެރެއިން މެޗުގެ ދެވަނަ މިނެޓުގައި އެޓީމުން އުފެއްދި ހަމަލާއަކީ މުޅި މެޗަށް ބަލާއިރުވެސް ލަނޑެއް ޖެހުމަށް ލިބިގެންދިޔަ އެންމެ ރަނގަޅު ފުރުސަތެވެ.
ނަމަވެސް އަބްދުލާޔޭ ޑޮކޫރޭ މާގިނައިރު ބޯޅަ ހިފެހެއްޓުމުގެ ނަތީޖާ އަކަށް ވެގެންދިޔައީ ގެބްރިއެލް އެހަމަލާ ދިފާއު ކުރުމެވެ. މި ނަތީޖާއާއެކު އާސެނަލް މިވަނީ ޖެހިޖެހިގެން ދެވަނަ މެޗު އެއްވަރު ވެފައެވެ. އަދި މިއާއެކު ތާވަލްގެ އެއްވަނައިގާ އުޅޭ ލިވަޕޫލާއި ދެމެދުގައިވާ ފަރަގު ކުޑާ ކުރުމަށް ލިބިގެންދިޔަ ރަނގަޅު ފުރުސަތެއް މިވަނީ ގެއްލުވާލައިފައެވެ.
މި ނަތީޖާ އާއެކު އާސެނަލް މިހާރު އުޅެނީ 30 ޕޮއިންޓާއެކު ތާވަލްގެ ތިން ވަނައިގައެވެ. އަދި އެވަޓަން އުޅެނީ 15 ޕޮއިންޓާއެކު ތާވަލްގެ 15 ވަނައިގައެވެ.