14 Dec 2024, 21:27
ރާއްޖޭގެ ސިޔާސީ މަސްރަހު މި ވަގުތު އޮތް ގޮތާ ގުޅޭގޮތުން މައުލޫމާތު ހިއްސާކުރުމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއީލް ދެ ގައުމަކަށް ފުރާވަޑައިގެންފިއެވެ.
އެމްޑީޕީގެ ރަސްމީ އެކްސް އެކައުންޓުގައި ކުރި ޕޯސްޓެއްގައި ވަނީ ފައްޔާޒު ފުރާވަޑައިގަތީ އިންޑިއާއަށާއި ޖަރުމަނަށް ކަމަށެވެ.
މި ދަތުރުގައި އެ ދެ ގައުމުގެ އެކި ޖަމިއްޔާތަކާއި، ބައިނަލްއަގްވާމީ ޖަމިއްޔާތަކާ ބައްދަލުކޮށް މައުލޫމާތު ހިއްސާކުރާނެ ކަމަށް އެމްޑީޕީން ބުންޏެވެ.
އިދިކޮޅު މައި ޕާޓީގެ ގޮތުގައި ސަރުކާރު ޖަވާބުދާރީ ކުރުވުމުގެ މަސައްކަތް އެމްޑީޕީން ކުރަމުން އަންނައިރު މި ނިމުނު ހަފުތާގެ އަންގާރަ ދުވަހު އެ ޕާޓީން ވަނީ ކާނީވާ ސަރަހައްދުގައި އެއްވުމެއް ވެސް ބާއްވައިފައެވެ. އަދި ދޭތެރެ ދޭތެރެއިން ޖަގަހަ ޖަލްސާތައް ވެސް ބާއްވައެެވެ.
މީގެ ކުރިން ވެސް އިދިކޮޅުގައި އެމްޑީޕީ ހަރަކާތްތެރިވި އިރު ބޭރުގެ ޖަމާއަތްތަކާ ގުޅުން ބާއްވައި، އެކުގައި މަސައްކަތް ކޮށްފައިވެއެވެ.
ފައްޔާޒު ރާއްޖެއިން ބޭރަށް މި ދަތުރުފުޅުގައި ފުރައިވައިގެންނެވިއިރު ކުރީ ސަރުކާރުން ގެއްލުމުގެ ބަދަލުގައި ބައެއް ފަރާތްތަކަށް ބަދަލުދިން ގޮތުން ކަމަށް ބުނެ، އޭނާ ހިމެނޭހެން, ކުރީގެ ރައީސް އިބްރާހީމް މުހައްމަދު ޞާލިހާއި، ރައީސް އޮފީހުގެ ކުރީގެ މިނިސްޓަރު އަލީ ޝިޔާމްގެ މައްސަލަ ބަލައި ތަހުގީގެއް ހިންގައި، ދައުވާ ކުރަން ޖެހިއްޖެ ހާލަތެއްގައި ދައުވާކުރުމަށް, ޕްރޮސެކިއުޓާ ޖެނެރަލް (ޕީޖީ) އޮފީހަށް އެންގުމަށް ސަރުކާރު ސުޕަ މެޖޯރިޓީ އޮތް ރައްޔިތުންގެ މަޖިލީހުގެ މާލިއްޔަތު ކޮމިޓީން ވަނީ ނިންމައިފައެވެ.