14 Dec 2024, 11:00
ހުޅުމާލޭގައި މިދިޔަ ބުދަ ދުވަހު ޓެކްސީ ޑްރައިވަރުން ކުރިއަށްގެންދިޔަ މުޒާހަރާއާ ގުޅިގެން ރޭ އިތުރު މީހަކު ހައްޔަރުކޮށްފިއެވެ.
ފުލުހުން ބުނީ، ޓެކްސީ ޑްރައިވަރުން ކުރިޔަށްގެންދިޔަ މުޒާހަރާގައި އާންމު ދަތުރުފަތުރަށް ހުރަސް އަޅައި މަގު ބްލޮކުކޮށް ފުލުހުންގެ ދައުރު އަދާކުރުމަށް ހުރަސް އެޅި މައްސަލައިގައި ކޯޓު އަމުރެއްގެ ދަށުން މީހަކު ހައްޔަރުކޮށްފައިވާ ކަމަށެވެ.
އެއީ މއ. ނަހީދީ މަންޒިލް، މިސްބާރު ޝަރީފު (31އ) އެވެ.
އެ މައްސަލައިގައި މީގެ ކުރިން ތިން މީހަކު ހައްޔަރުކުރިއެވެ. އެއީ:
މުޙައްމަދު ޝާމިން، 39އ، މއ. ވިރާހު،
- އަހުމަދު ޝަބީން، 33އ، ސަންރޭ، ލ. ދަނބިދޫ
- ނުއުމާން އަހުމަދު، 36އ، ހޮލިޑޭވިލެޖް، ހދ. ކުމުންދޫ
އޭގެ ތެރެއިން ޝާމިން އާއި ޝަބީން ފަސް ދުވަހު ބަންދުގައި ބޭތިއްބުމަށް ކޯޓުން އަމުކުރިއެވެ. ނަމަވެސް ނުއުމާން ވަނީ ޝަރުތުތަކާއެކު ދޫކޮށްލައިފައެވެ.
ބަންދަށް ޖެހި މީހުންގެ އަމުރު ހައިކޯޓުގައި ވަނީ އިސްތިއުނާފުކޮށްފައެވެ.
ޓެކްސީ ޑްރައިވަރުން މުޒާހަރާ ކުރީ ސަރުކާރަށް އަހަރެއްވީއިރު، ޓެކްސީ ޑްރައިވަރުން ފާޅުކުރި ކަންބޮޑުވުންތަކަށް ހައްލު ހޯދައިދީފައިނުވާ ކަމަށް ބުނެއެވެ.
އިހުތިޖާޖެއްގެ ގޮތުގައި ފެށި އެއްވުމެއް ހޫނުވީ، އެ ޑްރައިވަރުންގެ ޑިމާންޑުތަކަށް ޖަވާބެއް ލިބުމެއް ނެތި ގިނައިރުވެ، ހުޅުމާލެއިން ހައިވޭއަށް އެރެން އޮންނަ މަގަށް ޑްރައިވަރުން ނިކުމެ ބަންދުކުރުމުންނެވެ.
ފުލުހުން އެ ސަރަހައްދުގައި ހަރަކާތްތެރިވެ އިހުތިޖާޖު ރޫޅާލައި މަގު ހުޅުވޭތޯ މަސައްކަތްކުރިއެވެ. އަދި އިހުތިޖާޖުގައި ބޭނުންކުރި 22 އުޅަނދެއް ފުލުހުން ވަނީ ޓޯކޮށްފައެވެ.
ފުލުހުން ދަނީ މި މައްސަލަ އިތުރަށް ތަހުގީގުކުރަމުންނެވެ.