11 Dec 2024, 09:24
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ މައްޗަށް އުފުލާފައިވާ މައްސަލަތަކުގެ ހެކި ބަސް ނެގުމަށް ފުރަތަމަ ފަހަރަށް ކޯޓަށް ހާޒިރުވެވަޑައިގެންފިއެވެ.
އަންގާރަ ދުވަހު ތެލް އަވީވްގެ ކޯޓަށް ހާޒިރުވެވަޑައިގެން، ނަތަންޔާހޫ ވިދާޅުވީ އޭނާގެ މައްޗަށް އުފުލާފައިވާ ދައުވާތަކަކީ ދޮގު ދައުވާތަކެއް ކަމަށެވެ.
އިސްރާއީލުގެ އެންމެ ގިނަ ދުވަހު ބޮޑުވަޒީރުކަން ކުރެއްވި ނަތަންޔާހޫގެ މައްޗަށް ވަކިވަކިން ތިން މައްސަލައެއްގައި ރިޝްވަތާއި މަކަރާއި ހީލަތާއި އާންމުންގެ އިތުބާރު ގެއްލިގެން ދިއުމުގެ ދައުވާ އުފުލާފައިވެއެވެ. އޭނާ އެ ތުހުމަތުތައް ތަކުރާރުކޮށް ދޮގުކުރައްވާފައެވެ.
ގާތްގަނޑަކަށް ހަތަރު ގަޑިއިރު ވަންދެން ޝަރީއަތް ކުރިއަށްގެންގޮސްފައިވާއިރު، މައްސަލައިގެ އިތުރު އަޑުއެހުމެއް ބުދަ ދުވަހަށް ވަނީ ތާވަލުކޮށްފައެވެ.
ނަތަންޔާހޫގެ ވަކީލު، އަމިތްލު ހަދާދު ވަނީ މައްސަލައިގެ ތަހުގީގުން ދިފާއުވުމަށް މުހިންމު ކަންތައްތައް ފާހަގަ ކޮށްފައެވެ. ދައުލަތުން ތަހުގީގުކޮށްފައި ވަނީ މައްސަލައެއް ނޫން ކަމަށާއި ދައުވާގެ ބޭނުމަކީ ވަކި މީހަކަށް އަމާޒުކޮށް ވާހަކަދެއްކުން ކަމަށް ކަމަށް އޭނާ ވަނީ ތުހުމަތު ކޮށްފައެވެ.
ތިން ފަނޑިޔާރުން ކުރިމަތީ ހެކިބަސް ދެމުން ނަތަންޔާހޫ ބުނީ މައްސަލައިގައި ހަގީގަތް އޮޅުންފިލުވައިދޭން ލިބުނު އެ ފުރުސަތަށް އޭނާ އިންތިޒާރު ކުރާތާ ގާތްގަނޑަކަށް އަށް އަހަރު ދުވަސް ވެއްޖެ ކަމެށެވެ.
" ހަގީގަތް ކިޔައިދޭން މިވަގުތަށް އިންތިޒާރު ކުރަމުން އަންނަތާ އަށް އަހަރު ވެއްޖެ ނަމަވެސް އަޅުގަނޑަކީ ބޮޑުވަޒީރެއް. އަޅުގަނޑު މި ގެންދަނީ ހަތް ފަރާތުގެ ހަނގުރާމައެއްގެ ތެރެއިން ގައުމު ލީޑް ކުރަމުން. އަދި އަޅުގަނޑަށް ހީވަނީ އެދެކަންތައް އެއްފަހަރާ ކުރެވޭނެހެން." ކޯޓުގައި ނަތަންޔާހޫ ވިދާޅުވިއެވެ.
ޝަރީއަތުގެ މަޖިލީހަށް ނަތަންޔާހޫ ހާޒިރުވެވަޑައިގަންފައިވާއިރު، އިސްރާއީލުން އަންނަނީ ފަލަސްތީނުގެ ޣައްޒާއަށް ވަރުގަދަ ހަމަލާތައް ދެމުންނެވެ.
އަޑުއެހުންތައް ކުރިއަށް ދިޔަ ވަގުތު ކޯޓު ދޮށަށް ކޮންމެވެސް ވަރަކަށް މީހުން އެއްވެ އަޑުގަދަ ކޮށްފައި ވެއެވެ. އޭގެ ތެރޭގައި ނަތަންޔާހޫއަށް ތާއީދުކުރާ މީހުންނާއި ޣައްޒާގެ މުސްލިމުންނަށް ޔަހޫދީ ދައުލަތުން ދެމުންދާ ލާއިންސާނީ އަނިޔާތަކާ ދެކޮޅަށް އަޑުގަދަ ކުރި މީހުންނާއި ހަމާސްއިން ޣައްޒާގައި ރަހީނުކޮށްފައިވާ މީހުން ސަލާމަތް ކުރުމަށް ގޮވާލައި މީހުން ވެސް ހިމެނެއެވެ.