11 Dec 2024, 08:46
ޔުއޭފާ ޗެމްޕިއަންސް ލީގުގެ ލީގު ފޭސްގައި ސްޕެނިޝް ލަލީގާގެ ރެއާލް މެޑްރިޑާއި އިޓާލިއަން ސެރީއާގެ އެޓަލާންޓާ ބައްދަލުކުރި މެޗު ރެއާލް އިން ކާމިޔާބު ކޮށްފިއެވެ.
އެޓަލާންޓާގެ ދަނޑުގައި ކުޅުނު މިމެޗު ރެއާލް އިން ކާމިޔާބު ކޮށްފައިވަނީ ތިން ލަނޑު ދެ ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ އެޓަލާންޓާއިންނެވެ. މިއާއެކުވެސް މިމެޗުގެ ފެށުން ރަނގަޅުވީ ރެއާލްގެއެވެ.
މިގޮތުން މެޗުގެ 10ވަނަ މިނެޓްގައި ރެއަލް އިން އުފެއްދި ހަމަލާއެއްގައި އެޓީމުންވަނީ ލަނޑު ޖަހާ މެޗުގެ ލީޑު ނަގައިފައެވެ. މިލަނޑު އެޓީމަށް ކާމިޔާބު ކޮށްދިނީ ކިލިއަން އެމްބާޕޭއެވެ. މިއީ އޭނާ ޗެމްޕިއަންސް ލީގުގައި ކާމިޔާބުކުރި 50ވަނަ ލަނޑެވެ. މިލަނޑާއެކު ރެއާލްއިން ވަރުގަދަކޮށް ފެށި ނަމަވެސް ފުރަތަމަ ހާފު ނިމުމުގެ ކުރިން އެޓަލާންޓާއިން ވަނީ ލަނޑެއް ޖަހާ މެޗުގެ ނަތީޖާ ހަމަހަމަ ކޮށްފައެވެ. މިލަނޑު އެޓީމަށް ކާމިޔާބު ކޮށްދިނީ ޗާލްސް ޑި ކެޓެލެއާއެވެ. މިލަނޑާއެކު އެޓާލާންޓާއިން އުންމީދާއެކު ފުރަތަމަ ހާފު ނިންމާލި ނަމަވެސް ދެވަނަ ހާފުގެ ކުޅުން ފެށިތާ 11ވަނަ މިނެޓުގައި ވިނީޝިއަސް ޖޫނިއާ ކާމިޔާބު ކޮށްދިން ލަނޑާއެކު މިމެޗުގެ ލީޑު ރެއާލް އިން ދެވަނަ ފަހަރަށް ލީޑު ނެގިއެވެ
މިލަނޑު ކާމިޔާބުކުރިތާ ތިން މިނެޓް ފަހުން ޖޫޑް ބެލިންހަމްވަނީ ރެއާލްގެ ލީޑު އިތުރަށް ފުޅާކޮށްދީފައެވެ. މިމެޗުގައި އެޓަލާންޓާއިން ކާމިޔާބުކުރި ދެވަނަ ލަނޑު މެޗުގެ 65ވަނަ މިނެޓުގައި ކާމިޔާބުކޮށްދިނީ އަޑެމޯލާ ލޫކްމަންއެވެ. މިމެޗުގައި އެޓަލާންޓާއިން އިތުރު ލަނޑެއް ކާމިޔާބުކޮށް މެޗުގެ ނަތީޖާ ހަމަހަމަ ކުރެވޭތޯ މަސައްކަތް ކުރި ނަމަވެސް ރެއާލްގެ ޑިފެންސް އިތުރަށް ފޫއަޅުވާލެވޭގޮތެއް ނުވިއެވެ.
މިކާމިޔާބީއާއެކު އެންމެ ފަހުގެ ޗެމްޕިއަން ރެއާލް މިޙާރުވަނީ ނުވަ ޕޮއިންޓާއެކު ތާވަލްގެ 18 ވަނައަށް ކުރިއަށް ޖެހިލާފައެވެ. އަދި އެޓަލާންޓާ އުޅެނީ 11 ޕޮއިންޓާއެކު ތާވަލްގެ ނުވަ ވަނައިގައެވެ. މިމުބާރާތުގައި ފްރެންޗް ލީގު އާންގެ ބްރެސްޓް އާއި ޑަޗް އެރެޑިވިސީގެ ޕީއެސްވީ އެއިންދްހޯވެން ބައްދަލުކުރި މެޗު އެއް ލަނޑު ސުން ލަނޑުން ކާމިޔާބު ކޮށްފައިވަނީ ބްރެސްޓްއެވެ.
މިމެޗުގައި ބްރެސްޓް އިން ކާމިޔާބުކުރި ހަމައެކަނި ލަނޑު މެޗުގެ 43ވަނަ މިނެޓުގައި ކާމިޔާބު ކޮށްދިނީ ޖޫލިއެން ލެ ކާޑިނަލްއެވެ. މިކާމިޔާބީއާއެކު ބްރެސްޓް 13 ޕޮއިންޓާއެކު ތާވަލްގެ ފަސް ވަނައަށް ކުރިއަށް ޖެހިލާފައިވާއިރު ޕީއެސްވީ އުޅެނީ އަށް ޕޮއިންޓާއެކު ތާވަލްގެ 21ވަނައިގައެވެ.