09 Dec 2024, 23:39
އިންގްލިޝް ޕްރިމިއާ ލީގުގެ އެންމެ ފަހުގެ ޗެމްޕިއަން މެންޗެސްޓާ ސިޓީ މާލީ ގަވާއިދުތަކާ ހިލާފުވާކަމަށް ބުނެ ޕްރިމިއާ ލީގުން އެޓީމާ ދެކޮޅަށް އުފުލި 115 ދައުވާގެ އަޑުއެހުންތައް ނިންމާލައިފިއެވެ.
ލަންޑަންގައި ހުންނަ އިންޓަނޭޝަނަލް ޑިސްޕިއުޓް ރެޒޮލޫޝަން ސެންޓާގައި ކުރިއަށް ގެންދިއަ އަޑުއެހުންތައް ނިންމާލާފައި ވަނީ ސިޓީ އާއި ޕްރިމިއާ ލީގު ތަމްސީލުކުރާ ވަކީލުންނަށް އެންމެ ފަހު ބަސް ބުނުމުގެ ފުރުސަތު ދީފައެވެ. މިއަހަރުގެ ސެޕްޓެމްބަރު މަހުގެ 16ވަނަ ދުވަހު ފެށި މިއަޑުއެހުންތައް ކުރިއަށް ގެންގޮސްފައިވަނީ ދެފަރާތުން އެއްބަސްވާ މިނިވަން ތިން ފަރާތެއްގެ މައްޗަށް އެކުލެވޭ ޕެނަލަކުންނެވެ.
ޕްރިމިއާ ލީގުން ވަނީ ސިޓީއިން ފައިނޭންޝިއަލް ފެއާ ޕްލޭ ގަވައިދުތަކާ އެތައްފަހަރެއްގެ މަތިން ހިލާފުވެފައެވެ. އަދި ޕްރިމިއާ ލީގުން ކުރިއަށް ގެންދިޔަ ތަހުގީގަށް އެއްބާރުލުން ނުދިނުމުގެ ދައުވާ ވެސް ވަނީ އުފުލާފައެވެ. ނަމަވެސް ސިޓީން އަންނަނީ އެޓީމުން ގަވައިދާ ހިލާފަށް އެއްވެސް ކަމެއް ކޮށްފައި ނުވާނެކަމަށް ފެށުނީއްސުރެ ބުނަމުންނެވެ. އަދި މި އަޑުއެހުންތަކަށްފަހު އެކަން ސާބިތުވާނެކަމަށް ވެސް ސިޓީން ހާމަކުރެއެވެ.
ނަމަވެސް ސިޓީއާ ދެކޮޅަށް އުފުލާފައިވާ ދައުވާތައް ސާބިތުވެއްޖެނަމަ އެޓީމަށް ބޮޑެތި އަދަދު ތަކެއް ލިބުމުގެ ފުރުސަތު ވަރަށް ބޮޑެވެ. މިގޮތުން މާލީ ގޮތުން ބޮޑެތި އަދަބު ތަކަކާ ކުރިމަތިވުމުގެ އިތުރުން ޕޮއިންޓް ކެނޑުމާއި ފަހަރެއްގައި ޕްރިމިއާ ލީގުން ރެލިގޭޓް ވުމާ ވެސް އެޓީމަށް ކުރިމަތިލާން ޖެހިދާނެކަމަށް ވަނީ ބެލެވިފައެވެ.
މަޢުލޫމާތު ލިބޭގޮތުގައި ތިން މެންބަރުންގެ މައްޗަށް އެކުލެވޭ ޕެނަލުން މިހާރުވަނީ ދެފަރާތުގެ ހުރިހާ ވާހަކަތަކެއް އަޑުއަހާފައެވެ. އަދި ދެން އެޕެނަލްގެ މައްސައްކަތަކަށް ވެގެންދާނީ ދެފަރާތުން ހުށަހަޅާފައިވާ ގިނަގުނަ ހެކިތައް ރަނގަޅަށް ދިރާސާކޮށް ބެލުމަށްފަހު ގޮތެއް ނިންމުކެެވެ. އަދި އުފުލާފާއިވާ ދައުވާތައް ގިނަކަމުން މިހުރިހާކަމަކަށް ގޮތެއް ނިންމަށް އިތުރު މަސްތަކެއް ނަގާނެކަމަށް ވަނީ ބެލެވިފައެވެ. މި ޕެނަލުން ނިންމާ ނިންމުން އިސްތިއުނާފީ މަރުހަލާ އާއެކު މިއަންނަ ސީޒަނާ ހަމައަށް ދިގު ލައިގެން ދިއުން ގާތްކަމަށް ގިނަ ފަރާތްތަކުން ދެކެވެ.
ބުނެވޭގޮތުގައި ސިޓީން މިހުރިހާ ކަމެއް ކުރިއަށް ގެންގޮސްފައިވަނީ 2009ވަނަ އަހަރުން 2018ވަނަ އަހަރާއި ދެމެދުގައެވެ. ސިޓީގެ ކޯޗު ޕެޕް ގާޑިއޯލާ ވަނީ މިއަޑުއެހުންތައް ފެށުމާއެކު އެކަމަށް މަރުހަބާ ކިޔާފައެވެ. އަދި މިކަން ޓީމުގެ ތެރޭގައި އެއްވެސް ވަރަކަށް މަޝްވަރާ ނުކުރާ ކަމަށްވެސް ޕެޕް ހާމަކުރިއެވެ.
އޭނާ ހާމަކުރިގޮތުގައި އާލިން ހާލަންޑަކީ ވަކީލެއް ނޫނެވެ. އަދި މިޕެނަލުން ނިންމާ ނިންމުން ސިޓީން ގަބޫލް ކުރާނެކަމަށް ވެސް ޕެޕް ހާމަކުރިއެވެ. އަދި މިކަމާ ގުޅިގެން ވާހަކަތައް ދައްކާ ފަރާތްތައް ގިނަ ވާނެކަމަށް ޕެޕް ވަނީ ބުނެފައެވެ. ސިޓީއަށް ލިބޭނެ އަދަބު އިނގޭ ގިނަ މާހިރުންތަކެއް ތިބިކަމަށް ވެސް ޕެޕް ބުނެފައި ވެއެވެ.
2008ވަނަ އަހަރު ޝެއިހް މަންސޫރު ސިޓީއާ ހަވާލުވުމަށްފަހު މިހާތަނަށްވަނީ ޕްރިމިއާ ލީގުގެ ތަށި އަށް ފަހަރު ކާމިޔާބު ކޮށް، އެފް އޭ ކަޕް ތިން ފަހަރު، ލީގް ކަޕް ހަފަހަރު، ޔުއޭފާ ޗެމްޕިއަންސް ލީގާއި ޔުއޭފާ ސުޕާ ކަޕް އަދި ފީފާ ކްލަބް ވާލްޑް ކަޕް އެއް ފަހަރު ކާމިޔާބު ކޮށްފައެވެ.
ނަމަވެސް މީގެތެރެއިން ގިނަ ކާމިޔާބީތަކާ މެދު މިވަނީ މިދައުވާތަކުގެ ސަބަބުން ސުވާލުއުފެދިފައެވެ.