09 Dec 2024, 22:11
"ހޯމް އާޓް ފަރުނީޗާ" ނަމަކަށް ކިޔާ އޮންލައިން ޕޭޖާ ގުޅޭ ފްރޯޑްގެ މައްސަލަތައް ގިނަވެފައި ވާކަމަށް ދިވެހި ފުލުހުންގެ ޚިދުމަތުން މިއަދު ބުނެފިއެވެ.
މިކަމާއި ގުޅުވާ ފުލުހުން މިއަދު ބުނެފައި ވަނީ މިހާރަކަށް އައިސް އޮންލައިންކޮށް މުދާ ގަތުމަށް ފައިސާ ދެއްކުމުން މުދާ ޑެލިވަރީ ކޮށްނުދޭ މައްސަލަތައް ރިޕޯޓުކުރާ މިންވަރު އިތުރުވަމުންދާކަން ފާހަގަކުރެވިފައި ވާކަމަށެވެ.
"ހޯމް އާޓް ފަރުނީޗާ" އަކީ ރާއްޖޭގައި ރަޖިސްޓްރީކޮށްގެން ހިންގާ ވިޔަފާރިއަކަށް ކިޔާ ނަމެކެވެ. ނަމަވެސް އެ ފިހާރައިން ބުނާގޮތުން މި ޕޭޖަކީ އެ ވިޔަފާރީގެ ނަމުގައި އޮޅުވާލައިގެން ހިންގާ ޕޭޖެކެވެ.
އަދި ވަކިން ހާއްސަކޮށް ފަރުނީޗަރު ވިއްކުމަށް ފޭސްބުކްގައި ހިންގާ "ހޯމް އާޓް ފަރުނީޗާ" ޕޭޖާ ގުޅޭ ފްރޯޑް މައްސަލަތައް ގިނަ އަދަދަކަށް ހުށަހަޅަމުންދާކަން ފުލުހުން ވަނީ ފާހަގަކޮށްފައެވެ.
އެހެންކަމުން އޮންލައިންކޮށް މުދާ ގަންނައިރު މުދާ އަތަށް ލިބުމުން ނޫނީ ފައިސާ ނުދެއްކެވުމަށާއި "ހޯމް އާޓް ފަރުނީޗާ" ޕޭޖުން މުދާ ގަތުމުގައި ވަރަށް ބޮޑަށް ސަމާލުވުމަށާއި އޮންލައިންކޮށް ވިޔަފާރިކުރާނަމަ އެ ވިޔަފާރިއެއްގެ ސައްހަކަން ކަށަވަރު ކުރެއްވުމަށް ފުލުހުން ވަނީ އާންމުންނަށް އިލްތިމާސްކޮށްފައެވެ.
އަދި މިފަދަ ފްރޯޑް މައްސަލައެއްގެ ޝިކާރައަކަށް ވެއްޖެނަމަ ލަސްނުކޮށް ދިވެހި ފުލުހުންގެ ޚިދުމަތަށް ރިޕޯޓުކުރެއްވުމަށް ފުލުހުން ވާނީ އާންމުންނަށް އިލްތިމާސްކޮށްފައެވެ.
އޮޅުވާލައިގެން ފައިސާ ހޯދުމުގައި ތަފާތު އުކުޅުތައް މީހުން ބޭނުންކުރެއެވެ. އެހެންކަމުން މިކަމުން ސަލާމަތް ވުމަށް ފުލުހުން ދޭތެރެއަކުން އިލްތިމާސް ކުރެއެވެ.