08 Dec 2024, 22:50
އިންގްލިޝް ޕްރިމިއާ ލީގުގައި އާސެނަލް އާއި ފުލަމް ބައްދަލުކުރި މެޗު އެއްވަރު ތާވަލުގެ އެއްވަނައިގާ އުޅޭ ލިވަޕޫލާއި ދެމެދުގައިވާ ފަރަގު ކުޑަކުރުމަށް އާސެނަލްއަށް ލިބިގެންދިޔަ ފުރުސަތު ގެއްލުވާލައިފިއެވެ.
ފުލަމްގެ ދަނޑުގައި ކުޅުނު މިމެޗު ނިމުނީ އެއް ލަނޑު އެއް ލަނޑުން ދެޓީމު އެއްވަރު ވެގެންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައި ވަނީ އާސެނަލްއެވެ. ނަމަވެސް ފުލަމްއިން ވަނީ މިމެޗުގައި ވަރަށް ރަނގަޅަށް ޑިފެންޑް ކުރުމާއެކު ލިބޭ ފުރުސަތު ތަކުގައި ހަމަލާ އުފެއްދޭތޯ މަސައްކަތް ކޮށްފައެވެ. ނަތީޖާ އަކަށްވީ މެޗުގެ 11ވަނަ މިނެޓުގައި އާސެނަލްއިން ވަރަށް ފޯރިއާއެކު ކުޅެމުންދަނިކޮށް ފުލަމްއިން އުފެއްދި ކައުންޓާ އެޓޭކެއްގައި އެޓީމުންވަނީ މިމެޗުގެ ފުރަތަމަ ލަނޑު ޖަހާ މެޗުގެ ލީޑު ނަގައިފައެވެ. މިމެޗުގެ ފުރަތަމަ ހާފުގައި އިތުރު ލަނޑެއް ފެނިގެން ނުދިޔަ ނަމަވެސް ލަނޑު ޖަހާނެ ރަނގަޅު ފުރުސަތު ދެޓީމަށް ވެސް މިހާފުގައި ލިބިގެންދިޔައެވެ.
މިމެޗުގެ ދެވަނަ ހާފު އާސެނަލްއިން ފެށީ ފުރަތަަމަ ހާފަށް ވުރެ ހަމަލާތައް ވަރުގަދަކޮށް ފުލަމްގެ ޑިފެންސް ފޫއަޅުވާލުމުގެ އަޒުމާއެކުއެވެ. މިގޮތުން މެޗުގެ 52 ވަނަ މިނެޓުގައި ލިބިގެންދިޔަ ކޯނަރަކުން ވިލިއަން ސަލީބާ ވަނީ މެޗުގެ ނަތީޖާ އާސެނަލްއަށް އެއްވަރު ކޮށްދީ މެޗު ކާމިޔާބު ކުރުމަށް ކުރަމުންދިޔަ އުންމީދު އާކޮށްދިނެވެ.
ނަމަވެސް އާސެނަލް އިން އުފެއްދި ގިނަ ހަމަލާތައް ފުލަމްއިން ވަނީ ވަރަށް ހުށިޔާރު ކަމާއެކު ދިފާއުކޮށްފައެވެ. މިމެޗު ނިމެން ދެ މިނެޓަށް ވެފައިވަނިކޮށް ބުކާޔޯ ސާކާ އާސެނަލް މިމެޗުން މޮޅުކޮށްދިން ލަނޑު ޖަހައިދިން ހެން ހީވި ނަމަވެސް ވީއޭއާރުން ބެލި ބެލުމުގައި ސާކާ މިލަނޑު ކާމިޔާބު ކުރުމަށް ބޯޅަ ތަނަވަސްކޮށްދިން ގެބްރިއެލް މާޓިނެއްލީ ވަނީ އޮފް ސައިޑްގައި ހުރިކަން ފާހަގަ ވެފައެވެ. ނަތީޖާ އަކަށް ވެގެންދިޔައީ އެއް ލަނޑު އެއް ލަނޑުން ދެޓީމު އެއްވަރު ވެގެން މިމެޗު ނިމުމެވެ.
މިމެޗު އެއްވަރު ވުމާއެކު ތާވަލްގެ އެއްވަނައިގާ އުޅޭ ލިވަޕޫލާއި ހަތަރު ޕޮއިންޓަށް ގާތް ކުރުމަށް އާސެނަލްއަށް ލިބިގެންދިޔަ ފުރުސަތު މިވަނީ ގެއްލިގެން ގޮސްފައެވެ. އަދި އޭގެ ބަދަލުގައި އާސެނަލް މިހާރު އުޅެނީ ލިވަޕޫލަށް ވުރެ ހަ ޕޮއިންޓް ފަހަތުން 29 ޕޮއިންޓްގައެވެ. އަދި ފުލަމް އުޅެނީ 23 ޕޮއިންޓާއެކު ތާވަލްގެ 10 ވަނައިގައެވެ.
މިމުބާރާތުގައި ލެސްޓާ ސިޓީ އާއި ބްރައިޓަން އެންޑް ހޯވް އެލްބިއަން ބައްދަލުކުރި މެޗު ދެ ލަނޑު ދެ ލަނޑުންވީ އެއްވަރެވެ. މިމެޗުގެ ފުރަތަމަ ދެ ލަނޑު ޖަހާ މެޗުގެ ލީޑު ނަގައިފާވަނީ ބްރައިޓަންއެވެ. މި ދެ ލަނޑު އެޓީމަށް ކާމިޔާބު ކޮށްދިނީ ޓާރިގް ލެމްޕްޓޭ އާއި ޔާންކޫބާ މިންޓޭއެވެ.
މިމެޗުގައި ލެސްޓާގެ ފުރަތަމަ ލަނޑު މެޗު ނިމެން ހަތަރު މިނެޓަށް ވެފައިވަނިކޮށް ޖޭމީ ވާޑީ ކާމިޔާބު ކޮށްދިން އިރު މެޗުގެ ނަތީޖާ ހަމަހަމަ ކޮށްދިން ލަނޑު ލެސްޓާއަށް ކާމިޔާބު ކޮށްދިނީ ވާޑީ ތަނަވަސްކޮށްދިން ފުރުސަތެއްގައި ބޮބީ ޑެ ކޯޑޮވާ ރީޑްއެވެ. މިނަތީޖާ އާއެކު ލެސްޓާގެ އާ ކޯޗު ރޫޑް ވެން ރިންޓެރޯއީ މިވަނީ ބަލިނުވެ ދެ މެދު ފުރިހަމަ ކޮށްފައެވެ. ލެސްޓާ މިހާރު އުޅެނީ 14 ޕޮއިންޓާއެކު 16 ވަނައިގައެވެ. އަދި ބްރައިޓަން އުޅެނީ 24 ޕޮއިންޓާއެކު ތާވަލްގެ ހަތް ވަނައިގައެވެ.