06 Dec 2024, 15:34
ބިޓްކޮއިންގެ އަގު ތާރީޚުގައި ފުރަތަމަ ފަހަރަށް 100،000 ޑޮލަރަށް އަރައިފިއެވެ.
ބުރާސްފަތި ދުވަހު ބިޓްކޮއިންގެ އަގު ފުރަތަމަ ފަހަރަށް 100،000 ޑޮލަރަށް އަރާފައިވާއިރު، މިއީ އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް އަންނަ އަހަރު ވައިޓް ހައުސްއަށް ވަޑައިގަތުމުން ކްރިޕްޓޯކަރަންސީއަށް ފަހި މާހައުލެއް އުފައްދަވާނެކަމުގެ އުންމީދުގައި ލިބުނު ކާމިޔާބެއް ކަމަށް ޓެކް ރިޕޯޓްތައް ބުނެއެވެ.
ޓްރަމްޕް ވަނީ ސެކިއުރިޓީސް އެންޑް އެކްސްޗޭންޖް ކޮމިޝަންގެ ޗެއާމަންގެ މަޤާމަށް ޕޯލް އެޓްކިންސް ހުށަހަޅުއްވާނެ ކަމަށް އިއުލާނުކުރައްވާފައެވެ.
އެޓްކިންސްއަކީ މާކެޓް ޑީރެގިއުލޭޝަން ގެންނަވާނެ ކަމަށް ބެލެވޭ ބޭފުޅެކެވެ. ޓްރަމްޕް ވަނީ ކެމްޕޭނުގައި ވެސް ބައިޑަންގެ އެޕޮއިންޓީއެއް ކަމަށްވާ ގެރީ ގެންސްލާ ބަދަލުކުރައްވާނެ ކަމަށް ވިދާޅުވެފައެވެ.
މީގެ އިތުރުން، ޖުލައި މަހު ނޭޝްވިލްގައި ބޭއްވުނު ބިޓްކޮއިން ކޮންފަރެންސެއްގައި ޓްރަމްޕް ވަނީ ކްރިޕްޓޯއަށް ފަހި އިދާރާއެއް އުފައްދަވާނެ ކަމަށާއި އެމެރިކާގެ ސިޔާސަތު ބަދަލުކުރައްވާނެ ކަމަށް ވިދާޅުވެފައެވެ. މީގެ ތެރޭގައި އާ ކްރިޕްޓޯ އެޑްވައިޒަރީ ކައުންސިލެއް އުފެއްދެވުން ވެސް ހިމެނެއެވެ.
ބިޓްކޮއިންގެ އަގު 100،000 ޑޮލަރަށް އަރާފައިވާތީ ޓްރަމްޕް ވަނީ އޭނާގެ ޓްރޫތް ސޯޝަލް ޕްލެޓްފޯމްގައި މަރުޙަބާ ކިޔުއްވާފައެވެ. އެ ކަމުގެ ކްރެޑިޓް ވެސް ނަންގަވާފައިވެއެވެ.
ކްރިޕްޓޯއަށް ފަހި އިދާރާއެއް އުފެދޭނެކަމުގެ އުންމީދުގައި މަސްތަކެއް ވަންދެން ދުނިޔޭގެ އެންމެ މަޝްހޫރު ކްރިޕްޓޯކަރަންސީ ކަމަށްވާ ބިޓްކޮއިންގެ އަގު ވަނީ މަތިވަމުން ގޮސްފައެވެ.
އުފެއްދިތާ 16 އަހަރު ވެފައިވާ ކްރިޕްޓޯކަރަންސީއަކީ ޑިޖިޓަލް ފައިސާއެކެވެ. މުއާމަލާތްތައް ޗެކްކުރުމަށް ބޭންކްތަކަށް ބަރޯސާވާން ނުޖެހޭ ފައިސާއެކެވެ.
ބިޓްކޮއިނަކީ 2009 ވަނަ އަހަރު ތަޢާރަފުކުރެވުނު ފުރަތަމަ ޑިސެންޓްރަލައިޒްޑް ކްރިޕްޓޯކަރަންސީއެވެ. މީގެ މުޢާމަލާތްތައް ހިނގަނީ ބްލޮކްޗެއިން ޓެކްނޮލޮޖީ މެދުވެރިކޮށް، މެދުވެރިއެއް ނުލައެވެ. ފާއިތުވި އަހަރުތަކުގައި ބިޓްކޮއިންގެ އަގަށް ވަނީ ބޮޑެތި ބަދަލުތަކެއް އައިސްފައެވެ.
ކުރިން 2017 ވަނަ އަހަރު ފުރަތަމަ ފަހަރަށް 20،000 ޑޮލަރަށް އެރި ބިޓްކޮއިން، 2022 ވަނަ އަހަރުގެ ނޮވެމްބަރު މަހު ވަނީ 15،000 ޑޮލަރަށް ތިރިވެފައެވެ. ނަމަވެސް، މިދިޔަ އަހަރު ތެރޭގައި އަލުން އަރައިގަނެ، މިހާރު ވަނީ އާ ރިކޯޑެއް ހަދާފައެވެ. ބިޓްކޮއިންގެ މާކެޓް ކެޕިޓަލައިޒޭޝަން މިހާރު ވަނީ 2 ޓްރިލިއަން ޑޮލަރަށްވުރެ މަތިވެފައެވެ.