05 Dec 2024, 14:29
އިންގްލިޝް ޕްރިމިއާ ލީގުގެ އެންމެ ފަހުގެ ޗެމްޕިއަން މެންޗެސްޓާ ސިޓީ، ހަތް މެޗަށް ފަހު ފުރަތަމަ ފަހަރަށް މެޗަކުން މޮޅުވެއްޖެއެވެ.
ސިޓީ އާއި ނޮޓިންހަމް ފޮރެސްޓް ރޭ ބައްދަލުކުރި މެޗު ސިޓީއިން ކާމިޔާބު ކޮށްފައިވަނީ ތިން ލަނޑު ސުން ލަނޑުންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސިޓީއިންނެވެ.
މި މެޗު ސިޓީއިން ފަށާފައިވަނީ ވަރަށް ފޯރީގައެވެ. މިގޮތުން ފުރަތަމަ ކަށިގަނޑާއެކު ސިޓީއިން ފޮރެސްޓްގެ ގޯލަށް ނުރައްކާ ކުރަން ފެށިއެވެ. ނަތީޖާ އަކަށް ވެގެންދިޔައީ މެޗުގެ އަށް ވަނަ މިނެޓުގައި އުފެއްދި ހަމަލާއެއްގައި ސިޓީއިން މެޗުގެ ލީޑު ނެގުމެވެ. މިލަނޑު އެ ޓީމަށް ޖަހައިދިނީ ބެނާޑޯ ސިލްވާއެވެ.
މި ލަނޑާއެކު ސިޓީއިން ހަމަޖެހިލި ނަމަވެސް ފަހަކަށް އައިސް މެޗުތަކުގައި ނުކުމެފައިވާ ނަތީޖާ ތަކުގެ ސަބަބުން ސިޓީކޮޅަށް ބޯޅައެއް ދާއިރަށް އެ ޓީމުގެ ސަޕޯޓަރުން ހިތް ނުތަނަވެސް ވެގެންދާކަން ފާހަގަ ވެގެންދިޔައެވެ. އަދި ސިޓީގެ ކުޅުންތެރިންގެ ފަރާތުންވެސް ކޮންމެވެސް ވަރެއްގެ ހާސްކަމެއްގެ ތެރޭގައި އުޅުނުހެން ހީވެގެންދާ ފަހަރުވެސް އައެވެ.
ނަމަވެސް މި މެޗު ވެގެންދިޔައީ ފަހަކަށް އައިސް ސިޓީގެ ފަރާތުން ރަނގަޅު ކުޅުމެއް ފެނިގެންދިޔަ މެޗަކަަށެވެ. މި މެޗުގައި ސިޓީއިން ކާމިޔާބުކުރި ދެ ވަނަ ލަނޑު މެޗުގެ 31 ވަނަ މިނެޓުގައި ކާމިޔާބު ކޮށްދިނީ ކެވިން ޑި ބްރުއިނާއެވެ.
މި މެޗުގެ ދެވަނަ ހާފަށް ފޮރެސްޓްއިން ނިކުތީ އާ ހިތްވަރަކާއެކު ސިޓީއަށް ޕްރެޝަރު އިތުުރު ކޮށް މެޗުން ނަތީޖާއެއް ނެރުމަށްކަން އެ ޓީމުގެ ކުޅުމުން ފާހަގަ ވެގެންދިޔައެވެ. ނަމަވެސް މިއާއެކުވެސް ދެން ފެނިގެންދިޔައީ ސިޓީއިން އުފެއްދި ކައުންޓާ އެޓޭކެއްގައި ޖެރެމީ ޑޯކޫ ލަނޑެއް ޖަހާ އެ ޓީމުގެ ލީޑު އިތުރަށް ފުޅާކުރި ތަނެވެ.
މި މެޗުގައި އިތުރު ލަނޑެއް ފެނިގެން ނުދިޔަ ނަމަވެސް ލަނޑު ޖަހާނެ ފުރުސަތު ދެ ޓީމަށް ވެސް ލިބިގެންދިޔައެވެ. އަދި ފޮރެސްޓްއަށް ލަނޑު ޖަހާނެ ރަނގަޅު ދެތިން ފުރުސަތު ލިބިގެންދިޔަކަން ފާހަގަ ވެގެންދިޔައެވެ. މި ކާމިޔާބީއާއެކު ސިޓީ މިހާރު ވަނީ 26 ޕޮއިންޓާއެކު ތާވަލްގެ ހަތަރު ވަނައަށް ކުރިއަށް ޖެހިލާފައެވެ. އަދި ފޮރެސްޓް އުޅެނީ 22 ޕޮއިންޓާއެކު ތާވަލްގެ ހަ ވަނައިގައެވެ.
މި މުބާރާތުގައި އެވަޓަން އާއި ވުލްވަހެމްޕްޓަން ވޮންޑަރާސް ބައްދަލުކުރި މެޗު ހަތަރު ލަނޑު, ސުން ލަނޑުން ކާމިޔާބު ކޮށްފައިވަނީ އެވަޓަންއިންނެވެ. މި މެޗުގައި އެވަޓަންއިން ކާމިޔާބު ކުރި ހަތަރު ލަނޑުގެ ތެރެއިން ދެ ލަނޑަކީ ވުލްވްސްގެ ކްރެއިގް ޑޯސަން އަތުން ބައިކޮޅަށް ވަން ދެ ލަނޑެވެ. އަދި އަނެއް ދެލަނޑު އެ ޓީމަށް ކާމިޔާބު ކޮށްދިނީ އޭޝްލީ ޔަންގް އާއި މަންގާލާއެވެ. މި ކާމިޔާބީއާއެކު އެވަޓަން މިހާރު އުޅެނީ 14 ޕޮއިންޓާއެކު ތާވަލްގެ 15 ވަނައިގައެވެ. އަދި ވުލްވްސް އުޅެނީ ނުވަ ޕޮއިންޓާއެކު ތާވަލްގެ 19 ވަނައިގައެވެ.