05 Dec 2024, 09:09
ޗައިނާގައި ވިއްކާ އައިފޯނުތަކަށް އާޓިފިޝަލް އިންޓެލިޖެންސް (އޭއައި) ފީޗާސް ތަޢާރަފުކުރުމަށް އެޕަލް އަދި ބައިޑޫ ގުޅިގެން މަސައްކަތްކުރަމުންދާ ކަމަށް ދަ އިންފޮމޭޝަން އިން ބުދަ ދުވަހު ރިޕޯޓުކޮށްފިއެވެ.
ނަމަވެސް މި މަސައްކަތުގައި ދިމާވާ ގޮންޖެހުންތަކުގެ ސަބަބުން ޗައިނާގައި އެޕަލްގެ ފޯނު ވިއްކުމަށް އަސަރުކުރުމުގެ ފުރުސަތު އޮތް ކަމަށް ވެސް ރިޕޯޓުގައި ފާހަގަކޮށްފައިވެއެވެ.
ޗައިނާގެ އެންމެ ބޮޑު އެއް ޓެކް ކުންފުނި ބައިޑޫގެ ލާޖް ލޭންގުއޭޖް މޮޑެލްސް (އެލްއެލްއެމްސް) އައިފޯނު ބޭނުންކުރާ ފަރާތްތަކަށް ފެތޭގޮތަށް ބަދަލުކުރުމުގައި ދެ ކުންފުންޏަށް ދިމާވާ މައްސަލަތަކުގެ ތެރޭގައި އެލްއެލްއެމްސްތަކުން ޕްރޮމްޕްޓްތައް ދެނެގަތުމާއި އާންމު ހާލަތްތަކަށް ޖަވާބުދިނުމުގެ ސައްޙަކަން ހިމެނެއެވެ.
މި ރިޕޯޓާ ގުޅޭގޮތުން އެޕަލް އަދި ބައިޑޫ އިން އަދި މިހާތަނަށް ކޮމެންޓެއް ކޮށްފައެއް ނުވެއެވެ.
ޗައިނާގައި އައިފޯނުގެ ވިއްކުން 0.3 އިންސައްތަ ދަށަށް ގޮސްފައިވާއިރު، ވާވޭގެ ވިއްކުން 42 އިންސައްތަ އިތުރުވެފައިވާ ކަމަށް ރިސާޗް ފާމް އައިޑީސީ އިން އޮކްޓޯބަރު މަހު ބުނެފައިވެއެވެ. މިއީ ދުނިޔޭގެ އެންމެ ބޮޑު ސްމާޓްފޯނު މާކެޓު ޗައިނާގައި ވާދަވެރިކަން އިތުރުވަމުންދާކަމުގެ ހެއްކެކެވެ.
ސެޕްޓެމްބަރު މަހު ނެރުނު އައިފޯނު 16 ގައި އާޓިފިޝަލް އިންޓެލިޖެންސް ފީޗާސް ނެތުމުން ޗައިނާގައި ފާޑުކިޔުންތަކެއް އަމާޒުވެފައިވެއެވެ.
މީގެ އިތުރުން، އެޕަލްގެ ޕްރައިވަސީ ޕޮލިސީތަކުން އޭއައި އާ ގުޅޭ ސުވާލުތައް ކުރާ އައިފޯނު ބޭނުންކުރާ ފަރާތްތަކުގެ ޑޭޓާ އެއްކުރުމަށް ހުއްދަ ނުދޭއިރު، ބައިޑޫ އިން ބޭނުންވަނީ މި ޑޭޓާ ރައްކާކޮށް އެނަލައިޒްކުރުމަށެވެ.
ބައިޑޫގެ އެންމެ ފުރިހަމަ މޮޑެލް ކަމަށްވާ އާނީ 4.0 އަކީ އައިފޯނު، މެކް އަދި އައިޕެޑްގައި އެޕަލްގެ ޖެނެރޭޓިވް އޭއައި ސާވިސްތަކުގެ އަސާސް ކަމަށް މައުލޫމާތު ލިބިފައިވާ ފަރާތްތަކާ ހަވާލާދީ ދަ އިންފޮމޭޝަން އިން ބުނެފައިވެއެވެ. އަދި ސިރީ ވެސް ބައިޑޫގެ އޭއައި މޮޑެލްތައް ބޭނުންކުރާނެ ކަމަށް ރިޕޯޓުގައި ބުނެފައިވެއެވެ.
އެޕަލް އަދި ބައިޑޫގެ މި މަސައްކަތަކީ ޗައިނާގެ ސްމާޓްފޯނު މާކެޓުގައި އެޕަލްގެ ވާދަވެރިކަން ދެމެހެއްޓުމަށް ކުރެވޭ މުހިންމު މަސައްކަތެކެވެ.
ޗައިނާއަކީ އެޕަލްގެ އެންމެ ބޮޑު އެއް މާކެޓް ކަމަށްވެފައި، ފާއިތުވި އަހަރުތަކުގައި ޗައިނާގެ ލޯކަލް ބްރޭންޑްތަކާ ވާދަކުރުމަށް އެޕަލްއަށް ގޮންޖެހުންތަކެއް ކުރިމަތިވެފައިވެއެވެ. ޚާއްޞަކޮށް ވާވޭ ފަދަ ކުންފުނިތަކުން އޭއައި ފީޗަރސް ހިމެނޭ ފޯނުތައް ނެރެމުންދާއިރު، އެޕަލްގެ އައިފޯނުތަކުގައި މިފަދަ ފީޗާސް ނެތުމަކީ ޗައިނާގެ ބާޒާރުގައި އެޕަލްއަށް ގެއްލުންވާނެ ކަމެއް ކަމަށް ވިޔަފާރީގެ ދާއިރާގެ ތަޖުރިބާކާރުން ދެކެއެވެ.
އެހެންކަމުން، ބައިޑޫ ފަދަ ޗައިނާގެ ޓެކް ޖައިންޓަކާ ގުޅިގެން އޭއައި ފީޗާސް ތަޢާރަފުކުރުމަކީ އެޕަލްއަށް ޗައިނާގެ މާކެޓުގައި އަލުން ވާދަވެރިކަން އިތުރުކުރުމަށް ލިބޭނެ ފުރުޞަތެއް ކަމަށް ބެލެވެއެވެ.