04 Dec 2024, 12:14
ސްޕެނިޝް ލަލީގާގައި ތާވަލްގެ އެއްވަނައިގާ އުޅޭ އެފްސީ ބާސެލޯނާ އާއި މަޔޯކާ ބައްދަލުކުރި މެޗު ބާސާއިން ކާމިޔާބު ކޮށްފިއެވެ.
މަޔޯކާގެ ދަނޑުގައި ކުޅުނު މިމެޗު ބާސާއިން ކާމިޔާބު ކޮށްފައިވަނީ ފަސް ލަނޑު އެއް ލަނޑުގެ ބޮޑު ތަފާތަކުންނެވެ. ބާސާގެ ފަރާތުން މޮޅު ކުޅުމެއް ފެނިގެންދިޔަ މިމެޗުގެ ބޮޑު ބައި ކޮންޓްރޯލް ކޮށްފައިވަނީ ބާސާއިންނެވެ. މިމެޗުގެ ފުރަތަމަ ލަނޑު މެޗުގެ 12ވަނަ މިނެޓުގައި ކާމިޔާބުކޮށް މެޗުގެ ލީޑު ނަގައިފާވަނީ ބާސާއިންނެވެ. މިލަނޑު އެޓީމަށް ކާމިޔާބު ކޮށްދިނީ ފެރާން ޓޯރޭޒްއެވެ. މިލަނޑާއެކު ބާސާއިން ހަމަޖެހިލި ނަމަވެސް ފުރަތަމަ ހާފު ނިމެން ދެ މިނެޓަށް ވެފައިވަނިކޮށް މަޔޯކާއިންވަނީ ވެޑާޓް މުރީކީ ކާމިޔާބު ކޮށްދިން ލަނޑާއެކު މެޗުގެ ނަތީޖާ ހަމަހަމަ ކޮށްފައެވެ.
މިމެޗުގައި ދެވަނަ ފަހަރަށް ބާސާއިން ލީޑު ނަގާފައިވަނީ މެޗުގެ 56 ވަނަ މިނެޓުގައި ލިބުނު ޕެނަލްޓީ އަކުންނެވެ. މިޕެނަލްޓީ އެޓީމަށް ކާމިޔާބު ކޮށްދިނީ ކެޕްޓަން ރަފީނިއާއެވެ. އަދި މެޗުގެ 74ވަނަ މިނެޓުގައި ރަފީނިއާ ވަނީ ބާސާގެ ލީޑު އިތުރަށް ފުޅާކޮށްދީފައެވެ. މިމެޗުގައި ބާސާގެ ހަތަރުވަނަ ލަނޑު މެޗުގެ 79ވަނަ މިނެޓުގައި ފްރެންކީ ޑި ޖޮންގް ކާމިޔާބު ކޮށްދިން އިރު ފަހު ލަނޑު އެޓީމަށް ކާމިޔާބު ކޮށްދިނީ ޕައު ވިކްޓާއެވެ.
މިކާމިޔާބީއާއެކު ބާސާ މިހާރު އުޅެނީ 16 މެޗުން ލިބިފައިވާ 37 ޕޮއިންޓާއެކު ތާވަލްގެ އެއްވަނައިގައެވެ. އަދި ދެވަނައިގާ އުޅޭ އެންމެ ފަހުގެ ޗެމްޕިއަން ރެއާލް މެޑްރިޑާ ދެމެދުގައިވާ ފަރަގު ވެސް އަނެއްކާ ވަނީ ހަތަރު ޕޮއިންޓަށް އިތުރު ކޮށްފައެވެ. ނަމަވެސް މިރޭ ދަންވަރު ރެއާލްއާ އެތުލެޓިކް ބިލްބާއޯ ބައްދަލުކުރާ މެޗު ރެއާލަށް ރަށުން ބޭރުގައި ކާމިޔާބު ކުރެވިއްޖެނަމަ އެޓީމަށް މިފަރަގު އަނެއްކާ ވެސް އެއް ޕޮއިންޓަށް ކުޑަކުރެވޭނެއެވެ. ރޭގެ މެޗުން ބަލިވުމުން މަޔޯކާ އުޅެނީ 24 ޕޮއިންޓާއެކު ތާވަލްގެ ހަވަނައިގައެވެ.