04 Dec 2024, 08:48
ނަމީބިއާގެ ރައީސަކަށް ނެޓޫމްބޯ ނަންދީ-ންޑައިތުވާ އިންތިޚާބުކޮށްފިއެވެ. އެއާއެކު ނަންދީ ވެގެންދާނީ އެ ގައުމުގެ ރައީސްކަން ކުރައްވާ ފުރަތަމަ އަންހެން ބޭފުޅާއަށެވެ.
އިލެކްޝަންސް ކޮމިޝަނުން އަންގާރަ ދުވަހު އިއުލާންކުރި ރަސްމީ ނަތީޖާތަކުން ދައްކާ ގޮތުގައި އުމުރުން 72 އަހަރުގެ ނަންދީ އިންތިޚާބު ކާމިޔާބު ކުރެއްވީ 57 އިންސައްތަ ވޯޓުންނެވެ.
ނަމަވެސް ވޯޓު ކަރުދާސް މަދުވުމާއި އެހެނިހެން ޓެކްނިކަލް މައްސަލަތައް ވެސް ކުރިމަތިވި، އެ އިންތިޚާބުގެ ނަތީޖާ ބަލަގަތުމަށް އިދިކޮޅުން ވަނީ ދެކޮޅު ހަދާފައެވެ. އެ މައްސަލަތަކާހެދި ހޮނިހިރު ދުވަހުގެ ނިޔަލަށް ވޯޓުލުން ވަނީ އިތުރުވެސް ކޮށްފައެވެ. ވޯޓުލާން ދިޔަ ބައެއް މީހުން ވަނީ 12 ގަޑިއިރު ވަންދެން ކިޔޫގައި މަޑުކުރުމަށް އަނބުރާ ގެއަށްވެސް ގޮސްފައި ކަމަށް އަލްޖަޒީރާއިން ރިޕޯޓުކޮށްފައިވެއެވެ.
އިދިކޮޅު ޕާޓީތަކުން ބުނާ ގޮތުގައި ވޯޓުލާ މުއްދަތު އިތުރު ކުރުމަކީ ގާނޫނާ ޚިލާފު ކަމެކެވެ. އަދި ނަތީޖާ ގަބޫލު ނުކުރާ ކަމަށާއި އެ މައްސަލަ ކޯޓަށް ހުށަހަޅާނެ ކަމަށްވެސް ބުނެފައިވެއެވެ.
ނަންދީ ނައިބު ރައީސް ކަމަށް ޕްރޮމޯޓް ކުރެއްވީ މިދިޔަ ފެބްރުއަރީ މަހު ރައީސް ހާގޭ ގޭންގޯބް ވެރިކަމުގައި ހުންނަވަނިކޮށް އަވަހާރަވުމާ ގުޅިގެންނެވެ.
ނަންދީ ފުރަތަމަ ސިޔާސީ މައިދާނަށް ނުކުމެވަޑައިގަތީ 1970ގެ އަހަރުތަކުގައި ނަމީބިއާގެ މިނިވަންކަމުގެ ހަރަކާތުގައި ބައިވެރިވެވަޑައިގެންނެވެ. އެކަމަނާ އިނގިރޭސިވިލާތުގައި ހުންނަވާފައި ގައުމަށް އެބުރި ވަޑައިގަތީ 1990ވަނަ އަހަރު ގާނޫނު ހަދާ މަޖިލީހާ ގުޅިވަޑައިގަތުމަށެވެ. އޭގެފަހުން ވަޒީރެއްގެ މަގާމުގައި ގިނަ ދުވަސްތަކެއް ވަންދެން ވަނީ ގައުމަށް ޚިދުމަތް ކުރައްވާފައެވެ.