04 Dec 2024, 00:42
ދެކުނު ކޮރެއާގެ ރައީސް ޔޫން ސުކް ޔޮލް އެގައުމުގައި ކުއްލި ގޮތަކަށް އަސްކަރީ ގާނޫނު ހިންގަވަން ފައްޓަވައި، އެކަން މިރޭ އިއުލާންކުރައްވައިފިއެވެ.
ދެހާސް ބާވީސް ވަނަ އަހަރު ވެރިކަމަށް ވަޑައިގެންނެވި ރައީސް ޔޫން އަސްކަރީ ބާރު ބޭނުންކުރައްވަން ނިންމެވީ، އިދިކޮޅުން ބަޣާވާތެއް ކުރަން އުޅޭ ކަމަށާއި އުތުރު ކޮރެއާއާ ގުޅިގެން މަސައްކަތް ކުރާ ކަމަށް ތުހުމަތު ކުރައްވައެވެ.
ރައީސް ދެއްވި ޚިތާބުގައި ވިދާޅުވީ އުތުރު ކޮރެއާގެ ނުރައްކަލުން ގައުމު ދިފާއު ކުރައްވާނެ ކަމަށާއި އުތުރަށް ތާއިދުކޮށް، ދެކުނު ކޮރެއާއާ ދެކޮޅަށް މަސައްކަތް ކުރާ މީހުން ހުއްޓުވާނެ ކަމަށެވެ.
މިއީ ދެކުނު ކޮރެއާގައި 1980ގެ ފަހުން އަސްކަރީ ގާނޫނު ހިންގާ ފުރަތަމަ ފަހަރެވެ.
ދެކުނު ކޮރެއާގެ ގާނޫނު އަސާސީގައި އޮންނަނީ ހަނގުރާމައާއި ހަތިޔާރު ބޭނުން ކޮށްގެން ހިންގާ ހަމަނުޖެހުންތަކާއި އެފަދަ އެހެނިހެން ގައުމީ ކުއްލި ހާލަތްތަކުގައި އާންމު ރައްކާތެރިކަން ކަށަވަރު ކުރުމަށް، ސިފައިންގެ ފައުޖުތައް ނެރުމަށް ޓަކައި އަސްކަރީ ގާނޫނު ހިންގޭނެ ކަމަށެވެ.
އަސްކަރީ ގާނޫނު ހިންގުމުން، މާޝަލް ލޯ ކޮމާންޑަރުގެ ގޮތުގައި އަސްކަރިއްޔާގެ ޗީފް އޮފް ސްޓާފް ޖެނެރަލް ޕާކް އަން ސޫ ވަނީ އައްޔަންކޮށްފައެވެ. އެގޮތުން އެ ގާނޫނުގެ ދަށުން މަނާވާނެ ކަމަށް އޭނާ އިއުލާން ކުރެއްވި ކަންތައްތަކުގެ ތެރޭގައި ހުރިހާ ސިޔާސީ ހަރަކާތެއް ހިމެނެއެވެ. އޭގެ ތެރޭގައި ގާނޫނު ހަދާ މަޖިލީހާއި ލޯކަލް ކައުންސިލްތަކާއި ސިޔާސީ ޕާޓީތަކާއި ސިޔާސީ އެސޯސިއޭޝަންތަކުގެ ހަރަކާތްތައް ހިމެނެއެވެ.
މީގެ އިތުރުން، ހުރިހާ މީޑިއާއަކާއި ޕަބްލިޝިން ކުންފުނިތައް އަސްކަރިއްޔާގެ ބާރުގެ ދަށަށް ގެންދެވޭނެ ކަމަށް ބުނެފައިވާއިރު، މިވަގުތު އިހުތިޖާޖު ކުރަމުންދާ ސިއްހީ މުވައްޒަފުން ވަޒީފާއަށް ނުކުތުމަށް ވެސް އަމުރުކޮށްފައިވެއެވެ.
އެ ގާނޫނާ ޚިލާފުވާ މީހުން ހައްޔަރުކުރެވޭނެއެވެ.
ދެކުނު ކޮރެއާގެ ސިފައިން ގާނޫނު ހަދާ މަޖިލީހުގެ ތެރޭގައި: އަސްކަރީ ގާނޫނު ހިންގަން ފެށުމާއެކު ގާނޫނު ހަދާ މަޖިލީހުގެ މަސައްކަތްތައް ވެސް ހުއްޓާލަން ޖެހޭ ކަމަށް އަންގައިފައިވޭ - ފޮޓޯ/ ރޮއިޓާސް
ރައީސް ޔޫން ވެރިކަމަށް ވަޑައިގެންނެވިއިރު ވެސް، އަދި މި އަހަރު އޮތް ގާނޫނު ހަދާ މަޖިލީހުގެ އިންތިޚާބަށް ފަހު ވެސް އެ މަޖިލީހުގެ އަޣުލަބިއްޔަތު ހޯދައިފައި ވަނީ އިދިކޮޅުންނެވެ.
ދެކުނު ކޮރެއާގެ ސަރުކާރަށް އޮތް ތާއިދު ދަށްވަމުން ދިޔަ ދަނޑިވަޅެއްގައި އޭޕްރިލް މަހު ބޭއްވި އިންތިޚާބުގައި އިދިކޮޅު ޑިމޮކްރެޓިކް އެލަޔަންސްއިން 173 ގޮނޑި ކާމިޔާބުކުރިއިރު، ރައީސް ނިސްބަތްވެވަޑައިގަންނަވާ ޕީޕަލް ޕަވާއަށް ލިބިފައިވަނީ 108 ގޮނޑިއެވެ.
ގާނޫނު ހަދާ މަޖިލީހުގައި އިދިކޮޅުގެ އަޣުލަބިއްޔަތު އޮތުމުން ސަރުކާރުން ބޭނުންވާ ބިލުތައް ފާސްނުވެ، ސަރުކާރުގެ ސިޔާސަތުތައް ތަންފީޒު ކުރުމުގައި ގޮންޖެހުންތައް ވަނީ ކުރިމަތިވެފައެވެ. އެގޮތުން އަންނަ އަހަރަށް ލަފާ ކުރާ ބަޖެޓު ވެސް ފާސްނުކުރެވި، ގާނޫނު ހަދާ މަޖިލީހުގައި ވަނީ ތާށިވެފައެވެ.
އެހެންނަމަވެސް، އަސްކަރީ ގާނޫނު ހިންގުމަކީ ރަނގަޅު ގޮތެއް ނޫން ކަމަށް ރައީސްގެ އަމިއްލަ ޕާޓީން ވެސް ވަނީ ބުނެފައެވެ.
ދެކުނު ކޮރެއާގެ ނޫސްތަކުގައިވާ ގޮތުން އެގައުމުގެ ގާނޫނު ހަދާ މަޖިލީހުން ވަނީ އަސްކަރީ ގާނޫނު ހިންގުމާ ދެކޮޅަށް ވޯޓަށް އަހައި، ފާސްކޮށްފައެވެ. އެގޮތުން މަޖިލީހުގެ 300 މެންބަރުންގެ ތެރެއިން 190 މެންބަރުން އެކަމާ ދެކޮޅަށް ވޯޓު ދީފައިވާ ކަމަށް އެ ނޫސްތަކުގައިވެއެވެ.
ދެކުނު ކޮރެއާގެ ގާނޫނު އަސާސީގައި އޮންނަ ގޮތުން، ގާނޫނު ހަދާ މަޖިލީހުން އަސްކަރީ ގާނޫނު ހިންގުމާ ދެކޮޅަށް ވޯޓަށް އަހައި ފާސްކޮށްފި ނަމަ، ރައީސް އެ އަމުރު ބާތިލުކުރައްވަން ޖެހިވަޑައިގަންނަވާނެއެވެ.