01 Dec 2024, 23:36
އިންގްލިޝް ޕްރިމިއާ ލީގުގައި ތާވަލްގެ އެއްވަނައިގާ އުޅޭ ލިވަޕޫލާއި އެންމެ ފަހުގެ ޗެމްޕިއަން މެންޗެސްޓާ ސިޓީ ބައްދަލުކުރި މެޗު ލިވަޕޫލުން ކާމިޔާބުކޮށް ތާވަލުގައި ނުވަ ޕޮއިންޓުގެ ލީޑެއް ނަގައިފިއެވެ.
ލިވަޕޫލްގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ދެ ލަނޑު ސުން ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ސިޓީއިން ބޯޅަ ގެންގުޅުނު އިރު ގިނަ ހަމަލާ އުފައްދާފައިވަނީ ލިވަޕޫލުންނެވެ.
މިމެޗު ލިވަޕޫލުން ފަށާފައިވަނީ ވަރަށް ފޯރީގައެވެ. މިގޮތުން ރެފްރީގެ ފުރަތަމަ ކަށިގަނޑާއެކު ފެނިގެންދިޔައީ ލިވަޕޫލްއިން ހަމަލާއަށް އިސްކަންދީ ސިޓީގެ ގޯލަށް ނުރައްކާ ކުރަމުންދިޔަ ތަނެވެ. މިވަގުތު ކޮޅުގެ ތެރޭގައި ސިޓީ ފެނިގެންދިޔައީ ހަދާނެ ގޮތް ހުސްވެ ކުރެވުނު ގޮތަކަށް ޑިފެންޑް ކުރަމުންދިޔަ ތަނެވެ. އަދި މިގޮތުން މެޗުގެ 12 ވަނަ މިނެޓުގައި އުފެއްދި ހަމަލާއެއްގައި ލިވަޕޫލްއިން މެޗުގެ ލީޑު ނެގިއެވެ.
މުހަންމަދު ސަލާހް ތަނަވަސްކޮށްދިން ފުރުސަތެއްގައި ކާމިޔާބު ކޮށްދިނީ ކޯޑީ ގަކްޕޯއެވެ. މިލަނޑާއެކު ވެސް ފެނިގެންދިޔައީ ލިވަޕޫލްއިން ހަމަލާއަށް އިސްކަން ދީގެން ކުޅުނު ތަނެވެ. މިމެޗުގެ ތެރެއަށް ސިޓީއަށް ކިރިޔާވެސް ވަދެވޭވަރުވީ ފުރަތަމަ ހާފުގެ ފަހު 15 ވަނަރަށް މިނެޓަށް ވީފަހުންނެވެ. މިގޮތުން ކޮންމެވެސް ވަރަކަށް ކުރިއަށް އެރޭތޯ މަސައްކަތް ކުރިއެވެ.
މިމެޗުގެ ފުރަތަމަ ހާފާއި ހިލާފަށް ދެވަނަ ހާފުގައި ފެނިގެންދިޔައީ ސިޓީއިން މެޗު ކޮންޓްރޯލް ކޮށް ލިވަޕޫލުގެ ހާފުގެ ތެރޭގައި ގިނައިން ކުޅެމުންދިޔަ ތަނެވެ. އަދި ލިވަޕޫލްއިން ފެނިގެންދިޔައި ލިބިފައިވި ލީޑު ދިފާއު ކޮށް ކައުންޓާ އެޓޭކްގައި ހަމަލާ ދިނުމަށް ވިސްނައިގެން ކުޅެމުންދިޔަ ތަނެވެ. މިމެޗުގައި ލިވަޕޫލުން ކާމިޔާބުކުރި ދެވަނަ ލަނޑު މެޗުގެ 78ވަނަ މިނެޓުގައި ލިބިގެންދިޔަ ޕެނަލްޓީ އަކުން ކާމިޔާބު ކޮށްދިނީ ސަލާހްއެވެ.
މިއީ ސަލާހް ސިޓީއާ ދެކޮޅަށް ކާމިޔާބުކުރި 12ވަަނަ ލަނޑެވެ. އަދި މިސީޒަންގައި އޭނާ ލީގުގައި ކާމިޔާބު ކުރި 11ވަނަ ލަނޑެވެ. މިމެޗުގައި ސިޓީއަށް ލަނޑެއް ކާމިޔާބު ނުކުރެވުނު ނަމަވެސް ދެވަނަ ހާފުގައި އެޓީމުން ވަނީ ރަނގަޅު ކުޅުމެއް ދައްކާފައެވެ.
މިކާމިޔާބީއާއެކު ލިވަޕޫލް މިހާރު މިވަނީ 13 މެޗުން 34 ޕޮއިންޓް ހޯދާ ތާވަލްގައި ނުވަ ޕޮއިންޓްގެ ލީޑެއް ނަގައިފައެވެ. އަދި މިމެޗުން ބަލިވުމުން ސިޓީ މިވަނީ ލީގުގައި ޖެހިޖެހިގެން ހަތަރު މެޗުން ބަލިވި ތާވަލްގެ ފަސް ވަނައަށް ވެއްޓިގެން ގޮސްފައެވެ.
ސިޓީގެ ކޯޗު ޕެޕް ގާޑިއޯލާ ދާދިފަހުން ހާމަކުރިގޮތުގައި ސިޓީއަށް ދިމާވެފައިވާ މައްސަލައަކީ އޭނާގެ ޓީމަށް ނުކުޅެވުމުގެ ބަދަލުގައި އަނިޔާގެ ސަބަބުން ކުޅުންތެރިން ނެތުމުގެ މައްސަލައެވެ. އަދި އަލުން މި އަޑިގަނޑުން އަރައިގަންނާނެ ކަމަށެވެ. ނަމަވެސް އެކަން ވާނީ ކުޅުންތެރިން އަނިޔާއިން އެނބުރި އައިސްގެންނެވެ. އަދި މިހާރު ސިޓީ އާއި ލިވަޕޫލާއި ދެމެދުގައިވާ ފަރަގު މިވަނީ 11 ޕޮއިންޓަށް އިތުރު ވެގެން ގޮސްފައެވެ.