28 Nov 2024, 18:11
ކުޑަކުދީންގެ މައުލޫމާތު އާންމުކުރާއިރު އެކުދީންގެ ކަރާމާތާއި ރައްކާތެރިކަމަށް އުނިކަން ނާންނާނެ ގޮތަށް ޚާއްސަ ސަމާލުކަމެއް ދިނުމަށް ފުލުހުން މިއަދު އިލްތިމާސްކޮށްފިއެވެ.
ފުލުހުން ނެރުނު ބަޔާނެއްގައި ބުނެފައި ވަނީ ގާނޫނުގައި ކުޑަކުދީންގެ ކަރާމާތަށް އުނިކަން އަންނަ ގޮތަށް އެ ކުދީންގެ ޒާތީ މައުލޫމާތު އެއްވެސް ފަރާތަކުން އާންމުކޮށްގެން ނުވާނޭކަން ސާފުކޮށް ބަޔާންކޮށްފައި ވާކަމަށެވެ. ނަމަވެސް މީޑިއާގެ ބައެއް މަންސަތަކުގައި ކުޑަކުދީންގެ މައުލޫމާތާއި ތަސްވީރު އެ ކުދީންގެ ކަރާމާތަށް އުނިކަން އަންނަ ގޮތަށް އާންމުކުރާ ކަމަށް ފުލުހުން ފާހަގަކުރިއެވެ.
އެފަދަ ކަންކަމަކީ އޭގެ ސަބަބުން ކުއްޖާ ނުރައްކަލަކަށް ހުށަހެޅިދާނެ ކަންކަން ކަމަށްވެސް ފުލުހުން ވަނީ ބުނެފައެވެ. ވަކިން ޚާއްސަކޮށް ކުޑަކުދީންގެ ފޮޓޯ މީޑިއާގައި ދައުރުކުރުމަކީ އެކުދީންގެ ނަފުސާނީ އަދި ޖިސްމާނީ ދުޅަހެޔޮކަމަށް ނޭދެވޭ އަސަރު ކޮށްފާނޭ ކަމެއް ކަމަށްވެސް ފުލުހުން ވަނީ ބުނެފައެވެ.
ފުލުހުން ވަނީ މި ކަންކަމުގެ ސަބަބުން ކުޑަކުދީން އެކި ބާވަތްތަކުގެ އަނިޔާތަކަށް ހުށަހެޅުމުގެ ފުރުސަތު އިތުރުވާ ކަމަށް ބުނެފައެވެ.
އެހެންކަމުން ކުޑަކުދީންގެ މައުލޫމާތު އާންމުކުރާއިރު އެކުދީންގެ ކަރާމާތާއި ރައްކާތެރިކަން ނެގެހެއްޓުމަށް ޚާއްސަ ސަމާލުކަމެއް ދިނުމަށާއި ކުޑަކުދީންގެ ފޮޓޯތަކާއި އެހެނިހެން ޒާތީ މައުލޫމާތު މީސްމީޑިއާ އާއި މީޑިއާގެ އެހެނިހެން ވަސީލަތްތަކުގައި ޝާއިއު ނުކުރުމަށާއި ކުޑަކުދީންނާއި ގުޅޭ މައުލޫމާތު ހާމަކުރުމުގައި ގާނޫނީ އިމުގެ ތެރެއިން އަމަލުކުރުމަށް މީޑިއާތަކާއި އާންމު ރައްޔިތުންނަށް ފުލުހުން ވަނީ އިލްތިމާސްކޮށްފައެވެ.
ފުލުހުން އެ އިލްތިމާސްކުރިއިރު، ކުށުގެ މާހައުލަށް ހުށަހެޅިފައިވާ ކުދިންނާއި އެހެނިހެން ނާޒުކު ހާލަތްތަކުގައި ތިބޭ ކުދިންގެ މައުލޫމާތު ބައެއް ފަރާތްތަކުން ފޮޓޯއާއެކު ހިއްސާކުރާ މައްސަލަތައް މީގެ ކުރިން ފެންމަތިވެފައިވެއެވެ.