28 Nov 2024, 14:43
އާޓިފިޝަލް ބީޗު ކައިރީ ހުންނަ ކެފޭއެއްގައި އިންދައި މެޔަށް ތަދެއް އަރައިގެން ހޮސްޕިޓަލަށް ގެންގޮސް ފަރުވާދެމުން ދަނިކޮށް މީހަކު މިއަދު މަރުވެއްޖެއެވެ.
މި ހާދިސާގައި މަރުވެފައިވަނީ، އުމުރުން 53 އަހަރުގެ ސ. ހިތަދޫ، ސޯސަންގެ އަޙުމަދު ޝަރީފެވެ.
ފުލުހުން "ސަން"އަށް ބުނީ، މިއަދު ހެނދުނު 8:56 ހާއިރު އާޓިފިޝަލް ބީޗު ކައިރިން މަގުމައްޗަށް ވެއްޓުނު މީހަކު ފުލުހުން ނަގައިގެން އޭޑީކޭ ހޮސްޕިޓަލަށް ގެންދިޔަ ކަމަށެވެ.
އޭނާއަށް އޭޑީކޭގައި ފަރުވާ ދެމުން އަންނަނިކޮށް 10:03 ހާއިރު، އެ މީހާ މަރުވެފައިވާ ކަމަށް ހޮސްޕިޓަލާ ހަވާލާދީ ފުލުހުން ބުނެފައިވެއެވެ.
މި ހާދިސާއާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށް ފުލުހުން ބުނެފައިވެއެވެ.
މި ހާދިސާއާ ގުޅޭ އިތުރު ތަފުސީލެއް ފުލުހުން ހިއްސާކޮށްފައެއް ނުވެއެވެ.
އިއްޔެ ވެސް ވަނީ، ދަރުމަވަންތަ ހޮސްޕިޓަލާ ދިމާ ބޭރު ތޮށި ކައިރިން މޫދުން އަނިޔާވެފައި އޮއްވައި ފެނުނު މީހަކު މަރުވެފައެވެ. އެއީ، 55 އަހަރުގެ ދިވެހި ފިރިހެނެކެވެ.
އެ ހާދިސާއާ ގުޅޭ އިތުރު ތަފުސީލެއް ވެސް ފުލުހުން ހިއްސާކޮށްފައެއް ނުވެއެވެ.