28 Nov 2024, 10:01
މަންމަ ގައިގައި ތަޅައި އަނިޔާކޮށް، މަންމަ އަތުން ގަދަކަމުން ފައިސާ ހޯދަން އުޅުމުގެ ތުހުމަތުގައި މާލެއިން މީހަކު ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ 40 އަހަރުގެ ދިވެހި ފިރިހެނެކެވެ.
އެ މީހާ މަންމަ އަތުން ގަދަކަމުން ފައިސާ ހޯދަން، މަންމަ ގައިގައި ތަޅައި އަނިޔާކުރި ކަމަށް ސީނަށް ދިޔަ ފުލުހުން ތުހުމަތުކޮށްފައިވެއެވެ. އެ މީހާ މީގެ ކުރިން ވެސް މަންމައަށް އަނިޔާކޮށްފައިވާތީ، ފެމިލީ ކޯޓުން ގެވެށި އަނިޔާއިން ރައްކާތެރިކުރުމުގެ އަމުރެއް ވެސް ނެރެފައިވާ ކަމަށް ކޯޓު އަމުރުގައިވެއެވެ.
އެ މީހާ މަންމަ ގާތަށް ގޮސް، މަންމައަށް ބިރުދައްކައި، އަނިޔާކޮށްފައިވަނީ އެ އަމުރާ ހިލާފަށެވެ.
އެހެންވެ، މި ބާވަތުގެ ކުށްތަކަށް ތަކުރާރުކޮށް އަރައިގެންފައިވާ ކަމަށް ފުލުހުން ވަނީ ތުހުމަތުކޮށްފައެވެ. ކްރިމިނަލް ކޯޓުން ވަނީ އެ މީހާ ހަތް ދުވަހަށް ބަންދުކުރަން އަމުރުކޮށްފައެވެ.
ފާހަގަކޮށްލެވޭ ގޮތުގައި ފައިސާގެ ބޭނުމުގައި މަންމައަށް އަނިޔާކުރުމުގެ މައްސަލަތައް މީގެ ކުރިން ވެސް ފެންމަތިވެފައިވެއެވެ. އެ ގޮތުން، މަންމައަށް އަނިޔާކުރި 38 އަހަރުގެ މީހަކު މިދިޔަ އޮގަސްޓް މަހު ވެސް ހައްޔަރުކޮށްފައިވެއެވެ.
ކުރިން ހިޔާ ފުލެޓެއްގައި މަންމައަށް އަނިޔާކޮށް، ފައިސާ ހޯދަން އުޅުނު މައްސަލައެއްގައި ވެސް ފިރިހެނަކު ހައްޔަރުކޮށްފައިވެއެވެ.
މި ފަދަ މައްސަލަތައް ގިނަވާތީ، އޮކްޓޫބަރު މަހުގެ ހަތަރުވަނަ ދުވަހު ކީ ހުކުރު ޚުތުބާގައި ވެސް ވަނީ އަންހެނުންނަށް އަނިޔާކުރުމުގެ ނުބައިކަން ހަނދާކޮށްދީފައެވެ.