27 Nov 2024, 15:49
ޔުއޭފާ ޗެމްޕިއަންސް ލީގުގެ ލީގު ފޭސްގައި ސްޕެނިޝް ލަލީގާގެ އެފްސީ ބާސެލޯނާ އާއި ފްރެންޗް ލީގު އާންގެ ބްރެސްޓް ބައްދަލު ކުރި މެޗު ބާސާއިން ކާމިޔާބު ކޮށްފިއެވެ.
ބާސާގެ ދަނޑުގައި ކުޅުނު މި މެޗު އެ ޓީމުން ކާމިޔާބު ކޮށްފައިވަނީ 0-3 އިންނެވެ. ބާސާގެ ފަރަތުން މޮޅު ކުޅުމެއް ފެނިގެންދިޔަ މިމެޗުގައި ބާސާއިން ވަނީ ގިނައިރު ބޯޅަ ގެންގުޅުމުގެ އިތުރުން ގިނަ ހަމަލާ އުފައްދާފައިވަނީ ބާސާއިންނެވެ. މި މެޗުގެ ފުރަތަމަ ލަނޑު ބާސާއިން ކާމިޔާބުކޮށް މެޗުގެ ލީޑު ނަގައިފާވަނީ މެޗުގެ 10 ވަނަ މިނެޓުގައި ލިބިގެން ދިޔަ ޕެނަލްޓީ އަކުންނެވެ.
މި ލަނޑު އެޓީމަށް ކާމިޔާބު ކޮށްދިނީ ތަޖްރިބާކާރު ފޯވަޑް ރޮބަޓް ލެވަންޑޯސްކީއެވެ. މި ލަނޑާއެކު އޭނާވަނީ ޗެމްޕިއަންސް ލީގުގައި 100 ލަނޑު ކާމިޔާބު ކުރި ތިންވަނަ ކުޅުންތެރިޔާއަށް ވެގެން ގޮސްފައެވެ. މިލިސްޓުގެ އެންމެ ކުރީގައި 141 ލަނޑާއެކު ކްރިސްޓިއާނޯ ރޮނާލްޑޯ އުޅޭއިރު ދެވަނައިގާ އުޅެނީ 129 ލަނޑާއެކު ލިއޮނެލް މެސީއެވެ.
އެހެން އެއްވެސް ކުޅުންތެރިޔަކަށް މިމުބާރާތުގައި މިހާތަނަށް 100 ލަނޑު ކާމިޔާބު ކުރެވިފައެއް ނުވެއެވެ. މިމެޗުގެ ފުރަތަމަ ހާފުގައި އިތުރު ލަނޑެއް ފެނިގެން ނުދިޔަ ނަމަވެސް ލަނޑު ޖަހާނެ ފުރުސަތު އެ ޓީމަށް ލިބިގެންދިޔަކަން ފަހަގަ ވެގެންދިޔައެވެ.
މި މެޗުގައި ބާސާގެ ދަވަނަ ލަނޑު ޖަހައިދިނީ މެޗުގެ 66 ވަނަ މިނެޓުގައި އުފެއްދި ހަމަލާއެއްގައި ޑެނީ އަލްމޯއެވެ. އަދި މެޗުގެ އިތުރު ވަގުތުގެ ދެވަނަ މިނެޓުގައި ލެވަންޑޯސްކީ ވަނީ އިތުރު ލަނޑެއް ކާމިޔާބުކޮށް ބާސާއަށް ތިންވަނަ ލަނޑު ކާމިޔާބު ކޮށްދީފައެވެ.
މިކާމިޔާބީއާއެކު ބާސެލޯނާ މިހާރު އުޅެނީ ކުޅުނު ފަސް މެޗުން ލިބިފައިވާ 12 ޕޮއިންޓާއެކު ތާވަލްގެ ދެވަނައަށް ކުރިއަށް ޖެހިލާފައެވެ. އަދި މި ފަހަރުގެ ޗެމްޕިއަންސް ލީގުގައި ރަނގަޅު ކުޅުމެއް ދައްކަމުން އަންނަ ބްރެސްޓް އުޅެނީ 10 ޕޮއިންޓާއެކު ތާވަލްގެ ނުވަ ވަނައިގައެވެ.