27 Nov 2024, 15:54
ޔުއޭފާ ޗެމްޕިއަންސް ލީގުގެ ލީގު ފޭސްގައި އިޓާލިއަން ސެރީއާގެ އިންޓާ މިލާން އާއި ޖަރުމަނު ބުންޑެސްލީގާގެ އާރްބީ ލެއިޕްޒިގް ބައްދަލުކުރި މެޗު ކާމިޔާބުކޮށް އިންޓާއިން ތާވަލްގެ އެއްވަނައަށް އަރައިފިއެވެ.
އިންޓާގެ ދަނޑުގައި ކުޅުނު މި މެޗު އެޓީމުން ކާމިޔާބު ކޮށްފައިވަނީ އެއް ލަނޑު ސުން ލަނޑުންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ އިރު ގިނަ ހަމަލާ އުފައްދާފައިވަނީ އިންޓާއިންނެވެ.
މި މެޗުގައި އިންޓާއިން ކާމިޔާބުކުރި ހަމައެކަނި ލަނޑު ކާމިޔާބު ކޮށްފައިވަނީ މެޗުގެ 27 ވަނަ މިނެޓުގައި ލިބުނު ހިލޭ ޖެހުމަކުންނެވެ. ނަމަވެސް މި ލަނޑަކީ ލެއިޕްޒިގްގެ ކަސްޓެލޯ ލުކޭބާ އަތުން ބައިކޮޅަށް ވަން ލަނޑެކެވެ.
މި މެޗުގެ ފުރަތަމަ ހާފުގައި އިންޓާގެ ކެޕްޓަން ލައުޓާރޯ މާޓިނޭޒްއަށް ވެސް ވަނީ އެޓީމުގެ ލީޑު ފުޅާކުރާނެ ރަނގަޅު ފުރުސަތެއް ލިބިގެން ގޮސްފައެވެ. އަދި ދެވަނަ ހާފުގެ ކުރީކޮޅު ޑެންޒެލް ޑަމްފްރީސް އަށްވެސް ލަނޑު ޖަހާނެ ރަނގަޅު ފުރުސަތެއް ލިބިގެންދިޔައެވެ. މި މެޗުގައި މީގެ އިތުރުންވެސް ލަނޑު ޖަހާނެ އިތުރު ފުރުސަތު އިންޓާއަށް ލިބިގެންދިޔައެވެ.
މި މެޗުގައި ލެއިޕްޒިގް ބޮޑަށް ޑިފެންސަށް އިސްކަން ދިން ނަމަވެސް މެޗުގެ ފަހު ވަގުތު ކޮޅު އެޓީމުން ވަނީ ލަނޑެއް ޖަހާ މެޗުގެ ނަތީޖާ ހަމަހަމަ ކުރެވޭތޯ ވަރަސް މަސައްކަތްކޮށް އިންޓާ ޕްރެޝަރަށް ވައްޓާލައިފައެވެ. ނަމަވެސް ލެއިޕްޒިގަށް މިކަން ކާމިޔާބު ކުރެވޭގޮތެއް ނުވިއެވެ.
މިކާމިޔާބީއާއެކު އިންޓާ މިހާރު ވަނީއެޓީމު އެންމެ ފަހުން ކުޅުނު ހަތަރު މެޗު ކާމިޔާބު ކޮށް 13 ޕޮއިންޓާ އެކު ތާވަލްގެ އެއްވަނައަށް އަރާފައެވެ. އަދި އިންޓާއަކީ މިހާރު މިމުބާރާތުގައި އަދި ބަލިނުވާ ހަތަރު ޓީމުގެ ތެރެއިން އެއް ޓީމެވެ. މި މެޗުން ބަލިވުމުން ލެއިޕްޒިގް އުޅެނީ އެއްވެސް ޕޮއިންޓެއް ނުލިބި ތާވަލްގެ 33 ވަނައިގައެވެ.